ನೋಡಿರಿ
10 ಬಾಲ್.. 50 ರನ್.. ಸಿಡಿಲಬ್ಬರ! – ವಿಲ್ ಜಾಕ್ಸ್ 6 ನಿಮಿಷದ ಸೀಕ್ರೆಟ್
ಟಚ್ ಮಾಡಿದ್ರೆ ಫೋರ್.. ಬೀಸಿದ್ರೆ ಸಿಕ್ಸ್.. ಭಾನುವಾರ ವಿಲ್ ಜಾಕ್ಸ್ ಮುಟ್ಟಿದ್ದೆಲ್ಲಾ ಚಿನ್ನ. ಒಂದೊಂದು ಬಾಲ್ ಗ್ಯಾಲರಿಯತ್ತ ಹಾರುತ್ತಿದ್ರೆ ಅಭಿಮಾನಿಗಳು ಹುಚ್ಚೆದ್ದು ಕುಣೀತಿದ್ರು. ವೀಕೆಂಡ್ ಮೂಡ್ನಲ್ಲಿ ಮಸ್ತ್ ಎಂಜಾಯ್ ಮಾಡ್ತಿದ್ರು. ಅಹ್ಮದಾಬಾದ್ನ ನಮೋ ಅಂಗಳದಲ್ಲಿ ಆರ್ಸಿಬಿಯ ಅಬ್ಬರದ ಆಟಕ್ಕೆ ಗುಜರಾತ್ ಟೈಟನ್ಸ್ ಥಂಡಾ ಹೊಡೆದು ಹೊಯ್ತು. ವಿಲ್ ಜಾಕ್ಸ್ ಮತ್ತು ವಿರಾಟ್ ಕೊಹ್ಲಿ ಜಿಟಿ ಬೌಲರ್ಗಳನ್ನ ಸಿಕ್ಸ್ ಫೋರ್ಗಳ ಮೂಲಕವೇ ಬೆಂಡೆತ್ತಿದ್ರು. ಆರ್ಸಿಬಿಯ ಮತ್ತೊಂದು ರಣರೋಚಕ ಗೆಲುವಿನ ರೋಚಕ ಮಾಹಿತಿ ಇಲ್ಲಿದೆ.
ಇದನ್ನೂ ಓದಿ: ಪತಿರಾನ ಸೆಲೆಬ್ರೇಷನ್ ಸೀಕ್ರೆಟ್ – ಬೇಬಿ ಮಾಲಿಂಗನಿಗೆ ಧೋನಿಯೇ ಪವರ್ – CSK ಬೌಲರ್ ಸಕ್ಸಸ್ ಸ್ಟೋರಿ
ಅಹಮದಾಬಾದ್ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಭಾನುವಾರ ನಡೆದ ಆರ್ಸಿಬಿ ಮ್ಯಾಚ್ ಅಭಿಮಾನಿಗಳಿಗೆ ಫುಲ್ ಮೀಲ್ಸ್ ಬಡಿಸಿದಂತಿತ್ತು. ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿದ್ದ ಆರ್ಸಿಬಿ ಬೌಲಿಂಗ್ನಲ್ಲಿ ಅಷ್ಟೇನು ಮ್ಯಾಜಿಕ್ ಮಾಡಲಿಲ್ಲ. ಮೊದಲು ಬ್ಯಾಟ್ ಬೀಸಿದ ಗುಜರಾತ್ ತಂಡಕ್ಕೆ ಆರಂಭದಲ್ಲೇ ಆರ್ಸಿಬಿ ಬೌಲರ್ಸ್ ಶಾಕ್ ಕೊಟ್ಟಿದ್ರು. ಫಸ್ಟ್ ಓವರ್ನಲ್ಲೇ ಸ್ವಪ್ನಿಲ್ ಸಿಂಗ್ ಬೌಲಿಂಗ್ ದಾಳಿಗೆ ವೃದ್ಧಿಮಾನ್ ಸಹ ಕರ್ಣ್ ಶರ್ಮಾ ಕೈಗೆ ಕ್ಯಾಚ್ ಕೊಟ್ಟು ಪೆವಿಲಿಯನ್ ಸೇರಿದ್ರು. ಬಳಿಕ ಕ್ಯಾಪ್ಟನ್ ಶುಭ್ಮನ್ ಗಿಲ್ ಕೂಡ 19 ಬಾಲ್ಗಳಲ್ಲಿ ಜಸ್ಟ್ 16 ರನ್ ಹೊಡೆದು ಮ್ಯಾಕ್ಸ್ವೆಲ್ ಬೌಲಿಂಗ್ನಲ್ಲಿ ಔಟಾದ್ರು. ಸಂಕಷ್ಟದಲ್ಲಿದ್ದ ಜಿಟಿಗೆ ಆಸರೆಯಾಗಿದ್ದು ಸಾಯಿ ಸುದರ್ಶನ್. 49 ಬಾಲ್ಗಳಲ್ಲಿ 8 ಫೋರ್, 4 ಸಿಕ್ಸರ್ ಸಮೇತ 84 ರನ್ ಗಳಿಸಿ ಅಜೇಯರಾಗಿ ಉಳಿದ್ರು. ಇನ್ನು ಶಾರುಖ್ ಖಾನ್ 30 ಬಾಲ್ಗಳಲ್ಲಿ 58 ರನ್ ಬಾರಿಸಿದ್ರು. ಇನ್ನು ಡೇವಿಡ್ 26 ರನ್ ಗಳಿಸಿ ಅಜೇಯರಾಗಿ ಉಳಿದ್ರು. ಹೀಗೆ ಜಿಟಿ ತಂಡ ನಿಗದಿತ 20 ಓವರ್ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 200 ರನ್ ಗಳಿಸುವ ಮೂಲಕ 201 ರನ್ ಗಳ ಟಾರ್ಗೆಟ್ ನೀಡಿತು. ಈ ಬೃಹತ್ ಟಾರ್ಗೆಟ್ ಬೆನ್ನತ್ತಿದ ಬೆಂಗಳೂರು ತಂಡದ ಪರ ವಿಲ್ ಜಾಕ್ಸ್ ಸಿಡಿಲಿನಂತೆ ಅಬ್ಬರಿಸಿದ್ರು. ಜಸ್ಟ್ 16 ಓವರ್ನಲ್ಲಿ 1 ವಿಕೆಟ್ ನಷ್ಟಕ್ಕೆ 206 ರನ್ ಗಳಿಸುವ ಮೂಲಕ 9 ವಿಕೆಟ್ ಗಳ ಭರ್ಜರಿ ಗೆಲುವು ದಾಖಲಿಸಿದರು.
ಆರ್ಸಿಬಿ ಪರ ಓಪನರ್ ಆಗಿ ನಾಯಕ ಫಾಫ್ ಡುಪ್ಲೆಸಿಸ್ ಮತ್ತು ಕಿಂಗ್ ವಿರಾಟ್ ಕೊಹ್ಲಿ ಇನ್ನಿಂಗ್ಸ್ ಆರಂಭಿಸಿದ್ರು. ಆದ್ರೆ ಫಾಫ್ 12 ಬಾಲ್ಗಳಲ್ಲಿ 24 ರನ್ ಸಿಡಿಸಿ ಔಟಾದ್ರು. ಬಳಿಕ ಕ್ರೀಸ್ಗೆ ಬಂದ ವಿಲ್ ಜಾಕ್ಸ್ ಸುನಾಮಿಯಂತೆ ಅಬ್ಬರಿಸಿದ್ರು. ಜಸ್ಟ್ 41 ಎಸೆತಗಳಲ್ಲಿ 10 ಸಿಕ್ಸ್ ಮತ್ತು 5 ಬೌಂಡರಿ ಮೂಲಕ 243.90 ಸ್ಟ್ರೈಕ್ ರೇಟ್ನಲ್ಲಿ ಭರ್ಜರಿ 100 ರನ್ ಸಿಡಿಸಿ ಅಜೇಯರಾಗಿ ಉಳಿದ್ರು. ಜಾಕ್ಸ್ಗೆ ಕಿಂಗ್ ಕೊಹ್ಲಿ ಕೂಡ ಉತ್ತಮ ಸಾಥ್ ನೀಡಿದರು. ಕೊಹ್ಲಿ ಅಂತಿಮವಾಗಿ 44 ಎಸೆತದಲ್ಲಿ 3 ಸಿಕ್ಸ್ ಮತ್ತು 6 ಫೋರ್ ಮೂಲಕ 70 ರನ್ ಸಿಡಿಸಿ ಅಜೇಯರಾಗಿ ಉಳಿದರು. ಗುಜರಾತ್ ವಿರುದ್ಧದ ಪಂದ್ಯದಲ್ಲಿ ವಿಲ್ ಜಾಕ್ಸ್ ಆಟದ ಬಗ್ಗೆ ಹೇಳಲೇಬೇಕು.
ವಿಲ್ ಜಾಕ್ಸ್ ಮೊದಲ 17 ಎಸೆತಗಳಲ್ಲಿ ಕೇವಲ 17 ರನ್ ಮಾತ್ರ ಗಳಿಸಿದ್ರು. ಈ ವೇಳೆ ಆರ್ಸಿಬಿ ಫ್ಯಾನ್ಸ್ ಈ ಮ್ಯಾಚ್ನೂ ದೇವ್ರಿಗೇ ಬಿಡ್ತಾರೇನೋ ಅಂತಾ ಬೇಸರಗೊಂಡಿದ್ರು. ಆದ್ರೆ, ನಂತರದ 24 ಎಸೆತಗಳಲ್ಲಿ ಗುಜರಾತ್ ಬೌಲರ್ಸ್ಗೆ ಜಾಕ್ಸ್ ಅಕ್ಷರಶಃ ನರಕ ದರ್ಶನ ಮಾಡಿಸಿಬಿಟ್ರು. ಬೌಂಡರಿ, ಸಿಕ್ಸರ್ಗಳಲ್ಲಿ ರನ್ ಡೀಲ್ ಮಾಡಿ 83 ರನ್ ಚಚ್ಚಿದ್ರು. ಗಳಿಸಿದ 100 ರನ್ಗಳ ಪೈಕಿ 60 ರನ್ ಬಂದಿದ್ದು ಬರೀ ಸಿಕ್ಸರ್ಗಳಿಂದ. ರಶೀದ್ ಖಾನ್ ಟಿ20 ಕ್ರಿಕೆಟ್ ಲೋಕ ಕಂಡ ಲೆಜೆಂಡರಿ ಬೌಲರ್. ಆದ್ರೆ ಇಂಥಾ ಲೆಜೆಂಡ್ಗೆ 25 ವರ್ಷದ ವಿಲ್ ಜಾಕ್ಸ್ ನರಕ ದರ್ಶನ ಮಾಡಿಸಿದ್ರು. 4 ಸಿಕ್ಸರ್, 5 ಬೌಂಡರಿ ಸಿಡಿಸಿ ರಶೀದ್ ಖಾನ್ಗೆ ಶಾಕ್ ಕೊಟ್ರು. ಅದಕ್ಕೂ ಹಿಂದಿನ ಮೋಹಿತ್ ಶರ್ಮಾ ಓವರ್ನಲ್ಲಿ 29 ರನ್ ಚಚ್ಚಿದ್ರು. ಭಾನುವಾರ ಸಂಜೆ 6.41ಕ್ಕೆ ಅರ್ಧಶತಕ ಪೂರೈಸಿದ ವಿಲ್ಜಾಕ್ಸ್, 6.47ಕ್ಕೆ ಸೆಂಚುರಿ ಸಿಡಿಸಿದ್ರು. ಜಸ್ಟ್ ಆರೇ ನಿಮಿಷದಲ್ಲಿ ಇಡೀ ಗೇಮ್ ಬದಲಾಯಿಸಿದ್ರು. ಒಂದ್ಕಡೆ ವಿಲ್ ಜಾಕ್ಸ್ ಬೌಲರ್ಗಳನ್ನ ಬೆಂಡೆತ್ತುತ್ತಾ ಇದ್ರೆ ಅತ್ತ ಕಿಂಗ್ ಕೊಹ್ಲಿ ಕೂಡ ದಂಗಾಗಿದ್ರು. ವಿಲ್ ಜಾಕ್ಸ್ ಸಿಡಿಸಿದ ಒಂದೊಂದು ಸಿಕ್ಸರ್ಗಳನ್ನ ವಿರಾಟ್ ಕೊಹ್ಲಿ ಸಖತ್ ಎಂಜಾಯ್ ಮಾಡಿದ್ರು. ಶತಕ ಸಿಡಿಸಿದ ಬೆನ್ನಲ್ಲೇ ಜಾಕ್ಸ್ನ ತಬ್ಬಿಕೊಂಡು ಸಂಭ್ರಮಿಸಿದ್ರು.
ಪಂದ್ಯ ಮುಗಿದ ಬಳಿಕ ಮಾತನಾಡಿದ ವಿಲ್ ಜಾಕ್ಸ್, ಆರಂಭದಲ್ಲಿ ನಾನು ತುಂಬಾ ಕಷ್ಟಪಟ್ಟೆ. ಮೊದಲ 15 ಬಾಲ್ಗಳನ್ನು ಎದುರಿಸುವಾಗ ನರ್ವಸ್ ಆಗಿದ್ದೆ. ವಿರಾಟ್ ಕೊಹ್ಲಿ ಜೊತೆಯಲ್ಲಿದ್ದರು, ಅವರು ಸಾಕಷ್ಟು ಸಹಾಯ ಮಾಡಿದ್ದರು. ಕೊಹ್ಲಿ ಸ್ಪಿನ್ ಬಾಲ್ಗೆ ಚೆನ್ನಾಗಿ ಬ್ಯಾಟಿಂಗ್ ಮಾಡುತ್ತಿದ್ದರು. ಅವರು ನನಗೆ ಮಾರ್ಗದರ್ಶನ ಮಾಡಿ ಪಿಚ್ ಬಗ್ಗೆ ಆಗಾಗ ಮಾಹಿತಿ ನೀಡುತ್ತಿದ್ದರು. ಅವರಲ್ಲಿರುವ ಅನುಭವವನ್ನು ಹಂಚಿಕೊಂಡರು. ನಿರಂತರವಾಗಿ ನನ್ನ ಬಳಿ ಮಾತನಾಡುತ್ತಲೇ ಇದ್ದರು ಜೊತೆಗೆ ವಿರಾಟ್ ಬೆನ್ನು ತಟ್ಟಿದ್ರು. ಕೊಹ್ಲಿ ಅವರಿಂದ ನಾನು ಬಹಳ ಕಲಿತಿದ್ದೇನೆ ಎಂದು ಕಿಂಗ್ ಕೊಹ್ಲಿಯನ್ನ ಕೊಂಡಾಡಿದ್ರು. ಇನ್ನು ಗುಜರಾತ್ ವಿರುದ್ಧ ಗೆದ್ದ ಬಳಿಕ ಕೊಹ್ಲಿ ಎಮೋಷನಲ್ ಆಗಿ ಕಣ್ಣೀರಿಟ್ಟಿದ್ದಾರೆ. ಫಾಫ್ ಔಟಾದ ಬಳಿಕ ನಾನು ಸ್ಟ್ರೈಕ್ ರೇಟ್ ರೊಟೇಟ್ ಮಾಡುತ್ತಿದ್ದೆ. ವಿಲ್ ಜಾಕ್ಸ್ ಕ್ರೀಸ್ಗೆ ಬಂದಾಗಲೂ ಮಿಡಲ್ನಲ್ಲಿ ಪ್ರತಿ ಬಾಲ್ ಹೇಗೆ ಆಡೋದು? ಎಂದು ಡಿಸ್ಕಸ್ ಮಾಡುತ್ತಿದ್ದೆವು. ಜಾಕ್ಸ್ ಆಟ ನೋಡಿ ಸಖತ್ ಖುಷಿ ಆಯ್ತು. ಎಲ್ಲರೂ ನನ್ನ ಸ್ಟ್ರೈಕ್ ರೇಟ್ ಬಗ್ಗೆ ಮಾತಾಡುತ್ತಾರೆ. ಯಾವಾಗಲೂ ಒಂದೇ ರೀತಿ ಆಡಲು ಆಗುವುದಿಲ್ಲ. ರಿಯಾಲಿಟಿಗೆ ಹತ್ತಿರವಾಗಿರಬೇಕು. ಸಂದರ್ಭಕ್ಕೆ ತಕ್ಕಂತೆ ಸ್ಟ್ರೈಕ್ ರೊಟೇಟ್ ಮಾಡಬೇಕು. ಕಳೆದ 15 ವರ್ಷದಿಂದ ಆರ್ಸಿಬಿಗಾಗಿ ಆಡಿದ್ದೇನೆ. ಎಷ್ಟೋ ಪಂದ್ಯಗಳು ಗೆಲ್ಲಿಸಿದ್ದೇನೆ. ಗೆಲ್ಲೋದೊಂದೇ ನಮ್ಮ ಗುರಿ. ನಾನು ಯಾರ ಮಾತಿಗೂ ತಲೆ ಕೆಡಿಸಿಕೊಳ್ಳಲ್ಲ ಎಂದು ಭಾವುಕರಾದ್ರು.
ಗುಜರಾತ್ ಎದುರು ಆರ್ಸಿಬಿ ಗೆಲ್ತು ಅನ್ನೋದಕ್ಕಿಂತ ಅಭಿಮಾನಿಗಳನ್ನ ಅತೀ ಹೆಚ್ಚು ರಂಜಿಸಿದ್ದು ವಿಲ್ ಜಾಕ್ಸ್ ಬ್ಯಾಟಿಂಗ್. ಬ್ಯಾಟಿಂಗ್ ಅಂದ್ರೆ ಹಿಂಗಿರಬೇಕು. ಬೌಲರ್ ಯಾರು ಅನ್ನೋ ಉಸಾಬರಿ ಬೇಡ. ಬಾಲ್ ಬಂತಾ ಸಿಕ್ಸರ್, ಬೌಂಡರಿಗೆ ಅಟ್ಟೋದಷ್ಟೇ ಕೆಲಸ ಎನ್ನುವಂತೆ ಆಡಿದ್ದು ವಿಲ್ ಜಾಕ್ಸ್. ಒಂದೊಂದು ಏಟು ಕೂಡ ಸೂಪರ್.. ಸ್ವತಃ ಕಿಂಗ್ ಕೊಹ್ಲಿ ಕೂಡ ಜಾಕ್ಸ್ ಜಬರ್ದಸ್ತ್ ಆಟವನ್ನ ಕಂಡು ವಾರೆ ವ್ಹಾ ಅಂತಾ ಬೆನ್ನು ತಟ್ಟಿದ್ರು. ಸತತ ಸೋಲನ್ನ ಕಂಡು ಬೇಸತ್ತಿದ್ದ ಫ್ಯಾನ್ಸ್ ಸಖತ್ ಥ್ರಿಲ್ ಆದ್ರು.
ಇನ್ನು ಜಿಟಿ ವಿರುದ್ಧದ ಗೆಲುವಿನ ಮೂಲಕ ಆರ್ಸಿಬಿ ಪ್ಲೇಆಫ್ ಕನಸು ಇನ್ನೂ ಜೀವಂತವಾಗಿದೆ. ಮುಂದಿನ 4 ಪಂದ್ಯಗಳು ಹೇಗಾದ್ರೂ ಮಾಡಿ ಗೆಲ್ಲಲೇಬೇಕಿದೆ. ಭಾರೀ ರನ್ಗಳ ಅಂತರದಿಂದ ಗೆದ್ದು ರನ್ ರೇಟ್ ಹೆಚ್ಚಿಸಿಕೊಂಡರೆ ಪ್ಲೇ ಆಫ್ಗೆ ಹೋಗೋ ಅವಕಾಶ ಇನ್ನೂ ಇದೆ. ಸದ್ಯ ಆರ್ಸಿಬಿ 10 ಪಂದ್ಯಗಳಲ್ಲಿ 3 ಗೆಲುವು ಸಾಧಿಸಿ 6 ಅಂಕ ಪಡೆದುಕೊಂಡಿದೆ. ತಂಡದ ರನ್ ರೇಟ್ ಕೂಡ ಸುಧಾರಿಸಿದೆ. ಆರ್ಸಿಬಿ ಇನ್ನೂ 4 ಪಂದ್ಯಗಳನ್ನ ಆಡಲಿದ್ದು 4ಕ್ಕೆ 4 ಗೆಲ್ಲಬೇಕಿದೆ. ಆಗ ಆರ್ಸಿಬಿಗೆ ಮತ್ತೆ 8 ಅಂಕ ದೊರೆಯಲಿದ್ದು, ಟೋಟಲ್ 14 ಪಾಯಿಂಟ್ಸ್ ಆಗಲಿವೆ. ಸಾಮಾನ್ಯವಾಗಿ 16 ಅಂಕ ಪಡೆದ್ರೆ ಪ್ಲೇ ಆಫ್ ಕನ್ಫರ್ಮ್. 14 ಅಂಕ ಪಡೆದ್ರೂ ಪ್ಲೇ ಆಫ್ಗೆ ಹೋಗಬಹುದು, ಅದು ಸಂಪೂರ್ಣ ಇತರ ತಂಡಗಳ ಪ್ರದರ್ಶನದ ಮೇಲೆ ಡಿಪೆಂಡ್ ಆಗಿರಲಿದೆ.
