ಗುರು ಪೂರ್ಣಿಮೆಯ ಮಹತ್ವವೇನು? – ಆಷಾಢ ಹುಣ್ಣಿಮೆಗೆ ಆಚರಿಸುವ ಪವಿತ್ರಹಬ್ಬದ ವಿಶೇಷತೆಗಳೇನು?

ಗುರು ಪೂರ್ಣಿಮೆ. ಆಷಾಢ ಹುಣ್ಣಿಮೆಯಂದು ಆಚರಿಸಲಾಗುವ ಪವಿತ್ರ ಹಬ್ಬ. ಗುರುಗಳ ಪ್ರತಿ ಕ್ರತಜ್ಞತೆಯನ್ನು ವ್ಯಕ್ತಪಡಿಸುವ ದಿನವಿದು. ಮಹರ್ಷಿ ವೇದವ್ಯಾಸರ ಜನ್ಮದಿನವಾಗಿಯೂ ಇದನ್ನು ಆಚರಿಸಲಾಗುತ್ತದೆ.

ಇದನ್ನೂ ಓದಿ: ಒಂದೇ ಕ್ಷಣದಲ್ಲಿ ಯುದ್ಧವೇ ಮುಗಿಸುವ ಸಾಮರ್ಥ್ಯ ಹೊಂದಿದವನ್ನು ತಡೆದಿದ್ಯಾಕೆ ಶ್ರೀಕೃಷ್ಣ – ಶಿವಭಕ್ತ ಬಾರ್ಬರಿಕನ ಬಗ್ಗೆ ನಿಮಗೆಷ್ಟು ಗೊತ್ತು?

ಗುರು ಪೂರ್ಣಿಮಾ  ಹಬ್ಬವು ಗುರು ಮತ್ತು ಶಿಷ್ಯರ ನಡುವಿನ ಪವಿತ್ರ ಸಂಬಂಧದ ಸಂಕೇತವಾಗಿದೆ. ಈ ದಿನದಂದು, ಶಿಷ್ಯರು ತಮ್ಮ ಗುರುಗಳಿಗೆ ಕೃತಜ್ಞತೆಯನ್ನು ವ್ಯಕ್ತಪಡಿಸಿ ಅವರಿಂದ ಆಶೀರ್ವಾದವನ್ನು ಪಡೆಯುವ ಶುಭ ದಿನ. ಓರ್ವ ಶಿಷ್ಯನು ಯಾವ ರೀತಿಯ ಸಾಧನೆಯನ್ನು ಮಾಡಬೇಕು ಎಂಬುದು ಗುರುಗಳಿಗೆ ಗೊತ್ತಿರುತ್ತದೆ. ಅವನಿಗೆ ಸಾಧನೆಯ ಮಾರ್ಗವನ್ನು ತೋರಿಸುವುದಲ್ಲದೆ, ಅವನಿಂದ ಸಾಧನೆಯನ್ನು ಮಾಡಿಸಿಕೊಳ್ಳುತ್ತಾರೆ. ಇದುವೇ ನಮಗೆ ಗುರುಗಳಿಂದ ಸಿಗುವ ನಿಜವಾದ ಶಿಕ್ಷಣ.

ವೈದಿಕ ಕ್ಯಾಲೆಂಡರ್ ಪ್ರಕಾರ, ಆಷಾಢ ಮಾಸದ ಹುಣ್ಣಿಮೆ ಜುಲೈ 10 ರಂದು ಮಧ್ಯಾಹ್ನ 01:36 ಕ್ಕೆ ಪ್ರಾರಂಭವಾಗಿ ಮರುದಿನ ಅಂದರೆ ಜುಲೈ 11 ರಂದು ಮಧ್ಯಾಹ್ನ 02:06 ಕ್ಕೆ ಕೊನೆಗೊಳ್ಳುತ್ತದೆ. ಈ ರೀತಿಯಾಗಿ, ಗುರು ಪೂರ್ಣಿಮೆ ಹಬ್ಬವನ್ನು ಜುಲೈ 10 ರಂದು ಆಚರಿಸಲಾಗುತ್ತದೆ.

ಧಾರ್ಮಿಕ ನಂಬಿಕೆಯ ಪ್ರಕಾರ, ಮಹರ್ಷಿ ವೇದವ್ಯಾಸರು ಆಷಾಢ ಮಾಸದ ಹುಣ್ಣಿಮೆಯಂದು ಜನಿಸಿದರು. ಆ ದಿನವನ್ನು ಗುರು ಪೂರ್ಣಿಮಾ ಅಥವಾ ವ್ಯಾಸ ಪೂರ್ಣಿಮಾ ಎಂದು ಆಚರಿಸಲಾಗುತ್ತದೆ. ವೇದವ್ಯಾಸರು ಅನೇಕ ವೇದಗಳು ಮತ್ತು ಪುರಾಣಗಳನ್ನು ರಚಿಸಿದ್ದಾರೆ. ಸನಾತನ ಧರ್ಮದಲ್ಲಿ, ಮಹರ್ಷಿ ವ್ಯಾಸರನ್ನು ದೇವರ ರೂಪವೆಂದು ಪರಿಗಣಿಸಲಾಗುತ್ತದೆ. ಮಹರ್ಷಿ ವೇದ ವ್ಯಾಸರು ಬಾಲ್ಯದಿಂದಲೂ ಆಧ್ಯಾತ್ಮಿಕತೆಯಲ್ಲಿ ಆಳವಾದ ಆಸಕ್ತಿಯನ್ನು ಹೊಂದಿದ್ದರು. ಮಹರ್ಷಿ ವೇದ ವ್ಯಾಸರು ಆಷಾಢ ಮಾಸದ ಹುಣ್ಣಿಮೆಯಂದು ತಮ್ಮ ಶಿಷ್ಯರು ಮತ್ತು ಋಷಿಗಳಿಗೆ ಶ್ರೀಮದ್ ಭಾಗವತ ಪುರಾಣದ ಜ್ಞಾನವನ್ನು ನೀಡಿದರು ಎಂದು ಹೇಳಲಾಗುತ್ತದೆ. ಅಂದಿನಿಂದ, ಮಹರ್ಷಿ ವ್ಯಾಸರ ಶಿಷ್ಯರು ಈ ದಿನವನ್ನು ಗುರು ಪೂರ್ಣಿಮೆಯಾಗಿ ಆಚರಿಸುವ ಸಂಪ್ರದಾಯವನ್ನು ಪ್ರಾರಂಭಿಸಿದರು, ಇದನ್ನು ಇಂದಿಗೂ ಅನುಸರಿಸಲಾಗುತ್ತದೆ. ಧಾರ್ಮಿಕ ಗ್ರಂಥಗಳ ಪ್ರಕಾರ, ಗುರುವಿಗೆ ದೇವರುಗಳಿಗಿಂತ ಹೆಚ್ಚಿನ ಸ್ಥಾನವಿದೆ. ದೇವಾಧಿದೇವ ಮಹಾದೇವ ಸ್ವತಃ ‘ಗುರುದೇವೋ ಗುರುರ್ಧರ್ಮೋ, ಗುರು ನಿಷ್ಠಾ ಪರಮ ತಪಃ. ಗುರು: ಪರತರಂ ನಾಸ್ತಿ, ತ್ರಿವರಂ ಕಥ್ಯಾಮಿ ತೇ’ ಎಂದು ಹೇಳಿದ್ದಾರೆ. ಅಂದರೆ ಗುರುವೇ ಸರ್ವಸ್ವ, ಗುರುವಿಗೆ ನಿಷ್ಠೆಯೇ ಅಂತಿಮ ಧರ್ಮ. ಅಂದರೆ, ಮನುಷ್ಯರ ಜೊತೆಗೆ, ದೇವರುಗಳಿಗೂ ಗುರು ಬೇಕು. ಆದ್ದರಿಂದ ಜೀವನದಲ್ಲಿ ಗುರು ಇರುವುದು ಬಹಳ ಮುಖ್ಯ.