ವಾಹನಗಳಿಗೂ ಬಂತು ‘ರಕ್ಷಾ ಕ್ಯೂಆರ್’ ಕೋಡ್ – ಅಪಘಾತವಾದ್ರೆ ಮನೆಯವರು, ಪೊಲೀಸರು, ಆಸ್ಪತ್ರೆಗೆ ಬರುತ್ತೆ ಸಂದೇಶ!

ಬೆಂಗಳೂರು: ಅಪಘಾತ ಸಂಭವಿಸಿದ ವೇಳೆ ಅಪಘಾತಕ್ಕೀಡಾದಾಗ ವ್ಯಕ್ತಿಯ ಬಗ್ಗೆ ನೆರವಿಗೆ ಧಾವಿಸಿದ ಜನರಿಗೆ ಗೊತ್ತಿರುವುದಿಲ್ಲ. ಇದರಿಂದಾಗಿ ಗಾಯಗೊಂಡವರ ಗುರುತು ಪತ್ತೆಹಚ್ಚಲು ತುಂಬಾ ಕಷ್ಟವಾಗುತ್ತದೆ. ಆ ವ್ಯಕ್ತಿಯ ಗುರುತು ಪತ್ತೆಗಾಗಿ ಆತನ ಬಳಿ ಇರುವ ದಾಖಲೆಗಳನ್ನು ಪರಿಶೀಲಿಸಬೇಕಾಗುತ್ತದೆ. ಇಲ್ಲದಿದ್ದರೆ ಆತನಿಗೆ ಪ್ರಜ್ಞೆ ಬರುವವರೆಗೆ ಕಾಯಬೇಕಾಗುತ್ತದೆ. ಈ ಸಮಸ್ಯೆಗೆ ಪರಿಹಾರವಾಗಿ ಮೊಬಿಲಿಟಿ ಸೇವಾ ವೇದಿಕೆ ಹೈವೇ ಡಿಲೈಟ್, ತುರ್ತು ಪ್ರತಿಕ್ರಿಯೆ ನೆರವು ಉತ್ಪನ್ನ ರಕ್ಷಾ ಕ್ಯೂಆರ್ ನ್ನು ಬಿಡುಗಡೆ ಮಾಡಿದೆ. ಈ ‘ರಕ್ಷಾಕ್ಯೂಆರ್’ ಕೋಡ್‌ ಅನ್ನು ಬಳಸಿ ಅಪಘಾತಕ್ಕೀಡಾದ ವ್ಯಕ್ತಿಯ ಕುಟುಂಬ, ಪೊಲೀಸರು ಮತ್ತು ಆಸ್ಪತ್ರೆಗೆ ವರದಿ ಮಾಡಬಹುದಾಗಿದೆ.

ಈ ಕ್ಯೂಆರ್‌ ಕೋಡ್‌ ಸ್ಕ್ಯಾನ್‌ ಮಾಡಿ ಅಪಘಾತವನ್ನು ನೋಡಿದ ಪ್ರತ್ಯಕ್ಷದರ್ಶಿಗಳು ಅಪಘಾತಕ್ಕೀಡಾದ ಕುಟುಂಬದ ಸದಸ್ಯರಿಗೆ ಕರೆ ಮಾಡಿ ವಿಚಾರ ತಿಳಿಸಬಹುದಾಗಿದೆ. ಕ್ಯೂ ಆರ್‌ ಕೋಡ್‌ನಲ್ಲಿ ವರ್ಚುವಲ್ ಸಂಖ್ಯೆಯ ಮೂಲಕ ಸಂಪರ್ಕಗೊಳ್ಳುತ್ತದೆ, ಮಾಹಿತಿದಾರ ಮತ್ತು ಸಂತ್ರಸ್ತರ ಕುಟುಂಬದ ಸದಸ್ಯರ ಗೌಪ್ಯತೆಯನ್ನು ಕಾಪಾಡುತ್ತದೆ.

ಇದನ್ನೂ ಓದಿ: ಯೋಧನನ್ನು ಉಳಿಸಲು ಪ್ರಾಣ ತ್ಯಾಗ ಮಾಡಿದ ಶ್ವಾನ- ಭಾರತೀಯ ಸೇನೆಯ ‘ಕೆಂಟ್’ ಇನ್ನಿಲ್ಲ!

ಅಪಘಾತ ವರದಿಯಾದ ನಂತರ, ಹೈವೇ ಡಿಲೈಟ್ ಸ್ಥಳದ ಮಾಹಿತಿಯನ್ನು ತೆಗೆದುಕೊಳ್ಳುತ್ತದೆ. ಅವರ ಬ್ಯಾಕೆಂಡ್ ಕಾಲ್ ಸೆಂಟರ್ ತಂಡವು ಹತ್ತಿರದ ಆಸ್ಪತ್ರೆಗಳು ಮತ್ತು ಪೊಲೀಸ್ ಠಾಣೆಗೆ ತಿಳಿಸುತ್ತದೆ. ಸಂತ್ರಸ್ತರ ವೈಯಕ್ತಿಕ ವಿವರಗಳನ್ನು ಗೌಪ್ಯವಾಗಿಡುತ್ತದೆ ಎಂದು ಹೆದ್ದಾರಿ ಡಿಲೈಟ್‌ನ ಸಂಸ್ಥಾಪಕ ರಾಜೇಶ್ ಘಟಾನಟ್ಟಿ ವಿವರಿಸಿದ್ದಾರೆ.

ಯಾವುದೇ ರಸ್ತೆ ಅಪಘಾತದಲ್ಲಿ, ಅಪಘಾತದ ನಂತರದ ಸಮಯೋಚಿತ ಕ್ಷಿಪ್ರ ಕಾರ್ಯಾಚರಣೆ ಮತ್ತು ಗಾಯಗೊಂಡವರಿಗೆ ಸೂಕ್ತ ಚಿಕಿತ್ಸೆ ಮುಖ್ಯವಾಗುತ್ತದೆ. ಭಾರತದಲ್ಲಿ, ಪ್ರಸ್ತುತ ಸಾವಿನ ಸಂಖ್ಯೆ ಪ್ರತಿ ವರ್ಷ 1.5 ಲಕ್ಷದಲ್ಲಿ, ಅಪಘಾತಕ್ಕೊಳಗಾದವರು ಗೋಲ್ಡನ್ ಅವರ್‌ನಲ್ಲಿ ಸಮಯೋಚಿತವಾಗಿ ಚಿಕಿತ್ಸೆ ಪಡೆದರೆ ಸುಮಾರು ಶೇಕಡಾ 50ರಷ್ಟು ಜೀವಗಳನ್ನು ಉಳಿಸಬಹುದು. ರಕ್ಷಾ ಕ್ಯೂಆರ್ ಕೋಡ್ ವಾಹನ ಮಾಲೀಕರಿಗೆ ರಕ್ತದ ಗುಂಪು, ವಾಹನ ವಿಮೆ, ವೈದ್ಯಕೀಯ ವಿಮೆ ಮತ್ತು ಕುಟುಂಬದ ತುರ್ತು ವಿವರಗಳನ್ನು ಒಳಗೊಂಡಂತೆ ತಮ್ಮ ವೈಯಕ್ತಿಕ ಮಾಹಿತಿಯನ್ನು ಸೇರಿಸಲು ಅನುವು ಮಾಡಿಕೊಡುತ್ತದೆ. ಉತ್ಪನ್ನದ ಬೆಲೆ ದಿನಕ್ಕೆ 1 ರೂಪಾಯಿ ಆಗಿದೆ ಎಂದು ಮಾಹಿತಿ ನೀಡಿದ್ದಾರೆ.