ಮನೆಯಲ್ಲಿ ಪೂಜೆ ಮಾಡೋ ಶಿವಲಿಂಗದ ಗಾತ್ರ ಎಷ್ಟಿರಬೇಕು, ಪೂಜೆ ಹೇಗಿರಬೇಕು? – ಯಾವೆಲ್ಲಾ ನಿಯಮ ಪಾಲಿಸಬೇಕು?

ಮನೆಯ ದೇವಾಲಯದಲ್ಲಿ ದೇವರ ವಿಗ್ರಹ ಅಥವಾ ಶಿವಲಿಂಗವನ್ನ ಸ್ಥಾಪನೆ ಮಾಡೋ ವಿಚಾರದಲ್ಲಿ ಸಾಕಷ್ಟು ಗೊಂದಲಗಳಿವೆ.  ಆ ಗೊಂದಲಗಳಿಗೆ ಇಲ್ಲಿದೆ ಪರಿಹಾರ.. ಅಂದಹಾಗೇ ಮನೆಯಲ್ಲಿ ಶಿವಲಿಂಗ ಸ್ಥಾಪಿಸಬೇಕಾದರೆ ಕೆಲವು ವಿಶೇಷ ನಿಯಮಗಳನ್ನು  ಮಾಡಲಾಗಿದೆ. ಅವುಗಳನ್ನು ಅನುಸರಿಸುವುದು ಬಹಳ ಮುಖ್ಯ. ಸಾಮಾನ್ಯವಾಗಿ ಮನೆಯಲ್ಲಿ ದೇವರ ಮೂರ್ತಿಗಳನ್ನು ಇರಿಸುವುದಿಲ್ಲ. ಯಾಕೆಂದರೆ ಅದಕ್ಕೆ ಕೆಲವು ನಿಯಮಗಳಿವೆ. ಶಿವಲಿಂಗವನ್ನು ಮನೆಯ ದೇವಾಲಯದಲ್ಲಿ ಇಟ್ಟುಕೊಳ್ಳುವುದಾದರೆ ಅದಕ್ಕೆ ಸಂಬಂಧಿಸಿ ಕೆಲವು ವಿಶೇಷ ನಿಯಮಗಳನ್ನು ಪಾಲಿಸಬೇಕು. ಶಿವಲಿಂಗವನ್ನು ಕೆಲವು ವಿಶಿಷ್ಠ ಅನುಷ್ಠಾನಗಳನ್ನು ಪಾಲಿಸಿ ಪೂಜಿಸುವುದರಿಂದ ಮನೆಯ ಸಮೃದ್ಧಿ ಸದಾ ನೆಲೆಸುತ್ತಂತೆ..

ಜನರು ತಮ್ಮ ನಂಬಿಕೆಗೆ ಅನುಗುಣವಾಗಿ ಶಿವಲಿಂಗವನ್ನು ವಿವಿಧ ರೀತಿಯಲ್ಲಿ ಪೂಜಿಸುತ್ತಾರೆ. ಕೆಲವರು ನಿಯಮಿತವಾಗಿ ಶಿವಲಿಂಗದ ಮೇಲೆ ನೀರನ್ನು ಸುರಿದರೆ, ಇನ್ನು ಕೆಲವರು ಶಿವಲಿಂಗದ ಮೇಲೆ ಹಸಿ ಹಾಲನ್ನು ಸುರಿಯುವ ಮೂಲಕ ತಮ್ಮ ಭಕ್ತಿಯನ್ನು ಪ್ರದರ್ಶಿಸುತ್ತಾರೆ. ಮನೆಯ ದೇವಾಲಯದಲ್ಲಿ ಶಿವಲಿಂಗವನ್ನು ಸ್ಥಾಪಿಸುವುದರಿಂದ ಮನೆಯಲ್ಲಿ ಸಂತೋಷ ಮತ್ತು ಸಮೃದ್ಧಿ ಉಳಿಯುತ್ತದೆ. ಆದರೆ ಇದಕ್ಕಾಗಿ ಕೆಲವು ವಿಶೇಷ ನಿಯಮಗಳನ್ನು ಅನುಸರಿಸಬೇಕಾಗುತ್ತೆ..

ಶಿವಲಿಂಗದ ಗಾತ್ರ ಹೇಗಿರಬೇಕು 

ಮನೆಯಲ್ಲಿ ಶಿವಲಿಂಗವನ್ನು ಪ್ರತಿಷ್ಠಾಪಿಸುವುದಾದರೆ ಅದರ ಗಾತ್ರದ ಬಗ್ಗೆ ಹೆಚ್ಚು ಕಾಳಜಿ ಅಗತ್ಯ. ದೊಡ್ಡ ಶಿವಲಿಂಗವನ್ನು ಮನೆಯಲ್ಲಿ ಇಟ್ಟುಕೊಳ್ಳುವುದು ಶುಭವಲ್ಲ. ಮನೆಯಲ್ಲಿ ಸ್ಥಾಪಿಸಲಾದ ಶಿವಲಿಂಗದ ಗಾತ್ರ ಸದಾ ಚಿಕ್ಕದಾಗಿರಬೇಕು. ಅದು ನಮ್ಮ ಹೆಬ್ಬೆರಳಿನ ಗಾತ್ರಕ್ಕಿಂತ ದೊಡ್ಡದಾಗಿರಬಾರದಂತೆ.

ಶಿವಲಿಂಗಗಳ ಸಂಖ್ಯೆ ಎಂದಿಗೂ ಒಂದಕ್ಕಿಂತ ಹೆಚ್ಚಿರಬಾರದು

ಮನೆಯಲ್ಲಿ ಶಿವಲಿಂಗಗಳ ಸಂಖ್ಯೆ ಎಂದಿಗೂ ಒಂದಕ್ಕಿಂತ ಹೆಚ್ಚಿರಬಾರದು. ಶಿವಲಿಂಗವು ಶಿವನ ಸಂಕೇತ ಮತ್ತು ಶಿವನು ಒಬ್ಬನೇ ಆಗಿರುವುದರಿಂದ ನಾವು ಒಂದು ಸ್ಥಳದಲ್ಲಿ ಅವನ ವಿಭಿನ್ನ ಚಿಹ್ನೆಗಳನ್ನು ಬಳಸಬಾರದು. ಮನೆಯ ದೇವಾಲಯದಲ್ಲಿ ಯಾವುದೇ ದೇವರ ಒಂದಕ್ಕಿಂತ ಹೆಚ್ಚು ವಿಗ್ರಹಗಳನ್ನು ಸ್ಥಾಪಿಸಬಾರದು..   ಯಾಕೆಂದರೆ ಇದು ಶಿವನನ್ನ ಅವಮಾನಿಸಿದಂತೆ ಎನ್ನುತ್ತದೆ ವಾಸ್ತು ಶಾಸ್ತ್ರ.

ಮನೆಯಲ್ಲಿ ಶಿವಲಿಂಗವನ್ನು ಇಡುವುದಾದರೆ ನರ್ಮದಾ ನದಿಯಲ್ಲಿ ಕಂಡುಬರುವ ಕಲ್ಲಿನಿಂದ ಮಾಡಿದ ಶಿವಲಿಂಗವನ್ನು ಇಡುವುದು ಅತ್ಯಂತ ಮಂಗಳಕರವೆಂದು ಪರಿಗಣಿಸಲಾಗಿದೆ. ಶಿವಲಿಂಗವನ್ನು ತಯಾರಿಸಿದ ವಸ್ತುವು ಈ ಕಲ್ಲಿನಿಂದ ಮಾಡಲ್ಪಟ್ಟಿರಬೇಕು. ಲೋಹದಿಂದ ಮಾಡಿದ ಶಿವಲಿಂಗವಾದರೆ ಅದು ಚಿನ್ನ, ಬೆಳ್ಳಿ ಅಥವಾ ತಾಮ್ರದಿಂದ ಮಾಡಲ್ಪಟ್ಟಿರಬೇಕು. ಶಿವಲಿಂಗದ ಸುತ್ತಲೂ ಲೋಹದ ಹಾವು ಕುಳಿತಿರಬೇಕು ಎಂಬುದು ನೆನಪಿರಲಿ.

ಮನೆಯಲ್ಲಿ ಶಿವಲಿಂಗವನ್ನು ಸ್ಥಾಪಿಸಿದರೆ ಅದಕ್ಕೆ ನಿಯಮಿತ ಪೂಜೆ ಅಗತ್ಯ. ದಿನದಲ್ಲಿ ಎರಡು ಬಾರಿ ಶಿವಲಿಂಗವನ್ನು ಪೂಜಿಸಿ ಮತ್ತು ಅದಕ್ಕೆ ನಿಯಮಿತ ಸ್ನಾನ ಮಾಡಿಸಿ. ಬೆಳಗ್ಗೆ ಮತ್ತು ಸಂಜೆ ಎರಡೂ ಬಾರಿ ಪೂಜಿಸಲು ಸಾಧ್ಯವಾಗದಿದ್ದರೆ ಅದನ್ನು ಮನೆಯಲ್ಲಿ ಇಟ್ಟುಕೊಳ್ಳಬೇಡಿ. ಪ್ರತಿದಿನ ಬೆಳಗ್ಗೆ ಸ್ನಾನ ಮಾಡಿದ ಬಳಿಕ ಅದರ ಮೇಲೆ ಶ್ರೀಗಂಧದ ತಿಲಕವನ್ನು ಹಚ್ಚಿ. ಶಿವಲಿಂಗಕ್ಕೆ ಸಿಂಧೂರ ಅಥವಾ ಅರಿಶಿನ ತಿಲಕವನ್ನು ಎಂದಿಗೂ ಹಚ್ಚಬಾರದು. ಸೋಮವಾರ ಹಾಲು, ನೀರು ಮತ್ತು ಗಂಗಾಜಲವನ್ನು ಬೆರೆಸಿ ಶಿವಲಿಂಗವನ್ನು ಸ್ನಾನ ಮಾಡಿಸುವುದು ಮನೆಗೆ ಶುಭಕರವಾಗಿದೆ.  ಶಿವಲಿಂಗವನ್ನು ಪಶ್ಚಿಮ ದಿಕ್ಕಿಗೆ ಇರಿಸಿ, ಶಿವಲಿಂಗದ ನೀರಿನ ಪಾತ್ರೆ ಯಾವಾಗಲೂ ಉತ್ತರ ದಿಕ್ಕಿನ ಕಡೆಗೆ ಇರಬೇಕು. ಇದರ ಹೊರತಾಗಿ ಶಿವಲಿಂಗದ ನೀರಿನ ಪಾತ್ರೆಯನ್ನು ಪೂರ್ವ ದಿಕ್ಕಿಗೆ ಇಡಬಹುದು. ಉತ್ತರ ದಿಕ್ಕಿಗೆ ಮುಖ ಮಾಡಿ ಕೂಡ ಶಿವನನ್ನು ಪೂಜಿಸಬಹುದು.