ಪಂಚರಾಜ್ಯ ಚುನಾವಣಾ ಸಮೀಕ್ಷೆ – ಯಾವ ರಾಜ್ಯದಲ್ಲಿ ಯಾವ ಪಕ್ಷ ಮೈಲುಗೈ ಸಾಧಿಸಲಿದೆ ? ಇಲ್ಲಿದೆ ಸಂಪೂರ್ಣ ವಿವರ..

ರಾಜಸ್ಥಾನ, ಮಧ್ಯಪ್ರದೇಶ, ಛತ್ತೀಸ್​ಗಢ, ತೆಲಂಗಾಣ ಮತ್ತು ಮಿಜೋರಾಂ ಈ ಐದೂ ರಾಜ್ಯಗಳ ವಿಧಾನಸಭೆ ಚುನಾವಣೆ ಅಂತ್ಯವಾಗಿದ್ದು, ಈಗ ಚುನಾವಣೋತ್ತರ ಸಮೀಕ್ಷಾ ವರದಿ ಕೂಡ ಬಹಿರಂಗವಾಗಿದೆ. ಹಾಗಿದ್ರೆ ಎಕ್ಸಿಟ್​ಪೋಲ್​ ರಿಸಲ್ಟ್​​ನಲ್ಲಿ ಯಾವ ರಾಜ್ಯದಲ್ಲಿ ಯಾವ ಪಕ್ಷ ಗೆಲ್ಲುವ ಸಾಧ್ಯತೆ ಇದೆ? ನೆಕ್​ ಟು ನೆಕ್ ಫೈಟ್ ಇರುವ ರಾಜ್ಯ ಯಾವುದು? ಚುನಾವಣೋತ್ತರ ಸಮೀಕ್ಷಾ ವರದಿ ಪ್ರಕಾರ ಯಾರಿಗೆ ಎಷ್ಟು ಸ್ಥಾನ ಸಿಗಬಹುದು? ಇವೆಲ್ಲದರ ಕುರಿತ ವಿವರವಾದ ಮಾಹಿತಿ ಇಲ್ಲಿದೆ.

ಜನ್​ಕೀ ಬಾತ್ ಚುನಾವಣೋತ್ತರ ಸಮೀಕ್ಷಾ ವರದಿ ಪ್ರಕಾರ 230 ಕ್ಷೇತ್ರಗಳ ಮಧ್ಯಪ್ರದೇಶದಲ್ಲಿ ಬಿಜೆಪಿ 100-123 ಸ್ಥಾನಗಳನ್ನ ಗೆಲ್ಲಬಹುದಂತೆ. ಇನ್ನು ಮಧ್ಯಪ್ರದೇಶದಲ್ಲಿ ಕಾಂಗ್ರೆಸ್ 102-125 ಸ್ಥಾನಗಳನ್ನ ಗೆಲ್ಲುವ ಸಾಧ್ಯತೆ ಇದೆ. ಮಧ್ಯಪ್ರದೇಶದಲ್ಲಿ ಮ್ಯಾಜಿಕ್ ನಂಬರ್ 116. ಹೀಗಾಗಿ ಡಿಸೆಂಬರ್​ 3ರಂದು ರಿಸಲ್ಟ್​​ ದಿನದಂದು ಮಧ್ಯಪ್ರದೇಶ ಚುನಾವಣಾ ಫಲಿತಾಂಶ ಅತ್ಯಂತ ಇಂಟ್ರೆಸ್ಟಿಂಗ್ ಆಗಿರಲಿದೆ. ಬಿಜೆಪಿ ಮತ್ತು ಕಾಂಗ್ರೆಸ್​ ಮಧ್ಯೆ ಭಾರಿ​ ಫೈಟ್ ನಡೀಬಹುದು.

ಜನ್​ಕೀ ಬಾತ್ ಚುನಾವಣೋತ್ತರ ಸಮೀಕ್ಷಾ ವರದಿ ಪ್ರಕಾರ 199 ಕ್ಷೇತ್ರಗಳಿರುವ ರಾಜಸ್ಥಾನದಲ್ಲಿ ಕಾಂಗ್ರೆಸ್​ನ್ನ ಮಣಿಸಿ ಬಿಜೆಪಿ ಈ ಬಾರಿ ಅಧಿಕಾರಕ್ಕೇರಲಿದೆ. ರಾಜಸ್ಥಾನದಲ್ಲಿ ಬಿಜೆಪಿಗೆ 100-122 ಸ್ಥಾನಗಳು ಸಿಗಬಹುದು. ಕಾಂಗ್ರೆಸ್​ 62-85 ಕ್ಷೇತ್ರಗಳನ್ನ ಗೆಲ್ಲಬಹುದು. ಸ್ಥಳೀಯ ಪಕ್ಷಗಳು ಮತ್ತು ಸ್ವತಂತ್ರ ಅಭ್ಯರ್ಥಿಗಳು ಸೇರಿದಂತೆ 14 ರಿಂದ 15 ಕ್ಷೇತ್ರ ಇತರರ ಪಾಲಾಗಬಹುದು ಅಂತಾ ಜನ್​ಕೀ ಬಾತ್​​ ಭವಿಷ್ಯ ನುಡಿದಿದೆ.

ಇದನ್ನೂ ಓದಿ:CBI ಕಗ್ಗಂಟು.. ಡಿಕೆಶಿ ಮುಂದಿವೆ ಸಾಲು ಸಾಲು ಸವಾಲು – ಡಿಸಿಎಂಗೆ ಅಕ್ರಮ ಆಸ್ತಿಯೇ ಉರುಳು?

ಹಾಗೆಯೇ ಛತ್ತೀಸ್​ಗಢದ 90 ಕ್ಷೇತ್ರಗಳಿಗೆ ಚುನಾವಣೆ ನಡೆದಿದ್ದು, ಜನ್​ಕೀ ಬಾತ್ ಚುನಾವಣೋತ್ತರ ಸಮೀಕ್ಷೆ ವರದಿ ಪ್ರಕಾರ ಈಗ ಅಧಿಕಾರದಲ್ಲಿರುವ ಕಾಂಗ್ರೆಸ್ 41-53 ಕ್ಷೇತ್ರಗಳನ್ನ ಗೆಲ್ಲಬಹುದು. ಛತ್ತೀಸ್​​ಗಢದಲ್ಲಿ ಅಧಿಕಾರಕ್ಕೇರಲು ಬೇಕಾಗಿರೋದು 46 ಸ್ಥಾನಗಳು. ಹೀಗಾಗಿ ಮತ್ತೊಮ್ಮೆ ಕಾಂಗ್ರೆಸ್ ಆಡಳಿತಕ್ಕೇರುವ ಸಾಧ್ಯತೆ ಹೆಚ್ಚಾಗಿದೆ. ಇನ್ನು ಎದುರಾಳಿ ಬಿಜೆಪಿ ಛತ್ತೀಸ್​ಗಢದಲ್ಲಿ 36-48 ಸ್ಥಾನಗಳನ್ನ ಗೆಲ್ಲಬಹುದು ಅಂತಾ ಜನ್​ಕೀ ಬಾತ್ ವರದಿ ಮಾಡಿದೆ. ಹೀಗಾಗಿ ಛತ್ತೀಸ್​ಗಢದಲ್ಲಿ ಒಂದಷ್ಟು ಫೈಟ್ ಏರ್ಪಡುವ ಸಾಧ್ಯತೆ ಕೂಡ ಇದೆ.

ಇನ್ನು ಜನ್​​ಕೀ ಬಾತ್ ಚುನಾವಣೋತ್ತರ ಸಮೀಕ್ಷಾ ವರದಿ ಪ್ರಕಾರ 119 ಕ್ಷೇತ್ರಗಳ ತೆಲಂಗಾಣ ಚುನಾವಣೆಯಲ್ಲಿ ಕೆಸಿಆರ್​ ನೇತೃತ್ವದ ಬಿಆರ್​​ಎಸ್​ 40-55 ಕ್ಷೇತ್ರಗಳನ್ನ ಗೆಲ್ಲಬಹುದಂತೆ. ಕಾಂಗ್ರೆಸ್ 48-64 ಸ್ಥಾನಗಳನ್ನ ಗೆಲ್ಲುವ ಸಾಧ್ಯತೆ ಇದ್ಯಂತೆ. ತೆಲಂಗಾಣದಲ್ಲಿ ಬಿಜೆಪಿ 7-13 ಕ್ಷೇತ್ರಗಳನ್ನ ಗೆಲ್ಲುವ ಸಾಧ್ಯತೆ ಇದೆ. ಹಾಗೆಯೇ ಅಸಾದುದ್ದೀನ್ ಓವೈಸಿ ನೇತೃತ್ವದ ಎಐಎಂಐಎಂ 4-7 ಕ್ಷೇತ್ರಗಳನ್ನ ಗೆಲ್ಲಬಹುದು ಅಂತಾ ಜನ್​ಕೀ ಬಾತ್ ಸಮೀಕ್ಷಾ ವರದಿಯಲ್ಲಿ ಉಲ್ಲೇಖವಾಗಿದೆ. ಇಲ್ಲಿ ಕಾಂಗ್ರೆಸ್​ ಮೇಲುಗೈ ಸಾಧಿಸಿದ್ದ ಕಳೆದ 10 ವರ್ಷಗಳಿಂದ ಅಧಿಕಾರದಲ್ಲಿ ಕೆಸಿಆರ್​​ ಈ ಬಾರಿ ಹೊಡೆತ ತಿಂತಿರೋದು ಸ್ಪಷ್ಟವಾಗಿದೆ.

ಹಾಗೆಯೇ ಜನ್​​ಕೀ ಬಾತ್ ಚುನಾವಣೋತ್ತರ ಸಮೀಕ್ಷಾ ವರದಿ ಪ್ರಕಾರ 40 ಕ್ಷೇತ್ರಗಳ ಮಿಜೋರಾಮ್​ನಲ್ಲಿ ಸ್ಥಳೀಯ ಪಕ್ಷ ಎಂಎನ್​ಎಫ್ 10-14 ಕ್ಷೇತ್ರಗಳನ್ನ ಗೆಲ್ಲಬಹುದು. ZPM 15-25 ಕ್ಷೇತ್ರಗಳನ್ನ ಗೆಲ್ಲುವ ಸಾಧ್ಯತೆ ಇದೆ. ಕಾಂಗ್ರೆಸ್​ 5-9 ಕ್ಷೇತ್ರಗಳನ್ನ ಗೆಲ್ಲಬಹುದು. ಹಾಗೆಯೇ ಬಿಜೆಪಿ 2 ಸ್ಥಾನಗಳನ್ನ ಗೆದ್ರೂ ಗೆಲ್ಲಬಹುದು ಅಂತಾ ಜನ್​ ಕೀ ಬಾತ್ ವರದಿ ಮಾಡಿದೆ.

ಇನ್ನು ದೈನಿಕ್ ಭಾಸ್ಕರ್ ಚುನಾವಣೋತ್ತರ ಸಮೀಕ್ಷಾ ವರದಿ ಪ್ರಕಾರ ಮಧ್ಯಪ್ರದೇಶದಲ್ಲಿ ಬಿಜೆಪಿ 95-115 ಸ್ಥಾನಗಳನ್ನ ಗೆಲ್ಲಬಹುದಂತೆ. ಕಾಂಗ್ರೆಸ್ 105-120 ಸ್ಥಾನಗಳನ್ನ ಗೆಲ್ಲುವ ಸಾಧ್ಯತೆ ಇದ್ಯಂತೆ. ಹೀಗಾಗಿ ಮಧ್ಯಪ್ರದೇಶದಲ್ಲಿ ಬಿಜೆಪಿ-ಕಾಂಗ್ರೆಸ್ ಮಧ್ಯೆ ನೆಕ್​ ಟು ನೆಕ್​ ಫೈಟ್ ಗ್ಯಾರಂಟಿ ಅನ್ನೋದು ದೈನಿಕ್ ಭಾಸ್ಕರ್ ಸಮೀಕ್ಷಾ ವರದಿಯಿಂದ ಬಹಿರಂಗವಾಗಿದೆ.

ಹಾಗೆಯೇ ದೈನಿಕ್ ಭಾಸ್ಕರ್​ ರಾಜಸ್ಥಾನ ಚುನಾವಣೆ ವಿಚಾರವಾಗಿ ನಡೆಸಿರುವ ಸಮೀಕ್ಷಾ ವರದಿ ಪ್ರಕಾರ ಬಿಜೆಪಿ 98-105 ಸ್ಥಾನಗಳನ್ನ ಗೆಲ್ಲಬಹುದು. ಅಂದ್ರೆ ರಾಜಸ್ಥಾನದಲ್ಲಿ ಬಿಜೆಪಿ ಅಧಿಕಾರಕ್ಕೇರೋದು ಗ್ಯಾರಂಟಿ. ಹಾಗೆಯೇ ಗೆಹ್ಲೋಟ್ ನೇತೃತ್ವದ ಕಾಂಗ್ರೆಸ್ 85-95 ಕ್ಷೇತ್ರಗಳನ್ನ ಗೆಲ್ಲಬಹುದು ಅಂತಾ ದೈನಿಕ್ ಭಾಸ್ಕರ್ ಎಕ್ಸಿಟ್​ ಪೋಲ್​ನಲ್ಲಿ ವರದಿಯಾಗಿದೆ.

ಇನ್ನು ರಿಪಬ್ಲಿಕ್ ಟಿವಿ ಮತ್ತು ಮ್ಯಾಟ್ರಿಜ್ ಜಂಟಿಯಾಗಿ ನಡೆಸಿರುವ ಚುನಾವಣೋತ್ತರ ಸಮೀಕ್ಷಾ ವರದಿ ಪ್ರಕಾರ ತೆಲಂಗಾಣದಲ್ಲಿ ಕಾಂಗ್ರೆಸ್ 58-68 ಸ್ಥಾನಗಳನ್ನ ಗೆಲ್ಲೋ ಮೂಲಕ ಮೊದಲ ಬಾರಿಗೆ ಅಧಿಕಾರಕ್ಕೇರುವ ಸಾಧ್ಯತೆ ಇದೆ. ತೆಲಂಗಾಣದಲ್ಲಿ ಅಧಿಕಾರಕ್ಕೇರಲು ಬೇಕಾಗಿರೋದು 60 ಸ್ಥಾನಗಳು. ಇನ್ನು ಕೆಸಿಆರ್​​ ಪಕ್ಷ ಬಿಆರ್​ಎಸ್ 40-55 ಕ್ಷೇತ್ರಗಳನ್ನ ತೆಲಂಗಾಣದಲ್ಲಿ ಗೆಲ್ಲಬಹುದಂತೆ. ಹೀಗಾಗಿ ಮ್ಯಾಜಿಕ್ ನಂಬರ್ ಮುಟ್ಟುವಲ್ಲಿ ಕೆಸಿಆರ್​ ಫೇಲ್ ಆಗ್ತಿದ್ದಾರೆ ಅಂತಾ ರಿಪಬ್ಲಿಕ್ ಟಿವಿ ಮತ್ತು ಮ್ಯಾಟ್ರಿಜ್ ಸಮೀಕ್ಷಾ ವರದಿ ಭವಿಷ್ಯ ನುಡಿದಿದೆ.

ಇನ್ನು CNN NEWS 18 ವರದಿ ಪ್ರಕಾರ ಮಧ್ಯಪ್ರದೇದಲ್ಲಿ ಬಿಜೆಪಿ 116 ಸ್ಥಾನಗಳನ್ನ ಗೆಲ್ಲಬಹುದಂತೆ. ಕಾಂಗ್ರೆಸ್​ 11 ಕ್ಷೇತ್ರಗಳನ್ನ ಗೆಲ್ಲಬಹುದು ಅಂತಾ ಭವಿಷ್ಯ ನುಡಿದಿದೆ. ಹಾಗೆಯೇ ರಾಜಸ್ಥಾನದಲ್ಲಿ ಬಿಜೆಪಿ 115, ಕಾಂಗ್ರೆಸ್ 71 ಸ್ಥಾನಗಳನ್ನ ಗೆಲ್ಲಬಹುದು ಅಂತಾ ವರದಿ ಮಾಡಿದೆ. ತೆಲಂಗಾಣದಲ್ಲಿ ಕಾಂಗ್ರೆಸ್ 54, ಬಿಆರ್​ಎಸ್ 52 ಮತ್ತು ಬಿಜೆಪಿ 7 ಸ್ಥಾನಗಳನ್ನ ಗೆಲ್ಲಬಹುದು ಅಂತಾ CNN NEWS 18 ಸಮೀಕ್ಷಾ ವರದಿಯಲ್ಲಿ ಉಲ್ಲೇಖವಾಗಿದೆ. ಇದನ್ನ ನೋಡಿದ್ರೆ ಕಾಂಗ್ರೆಸ್ ಮತ್ತು ಬಿಆರ್​ಎಸ್ ಮಧ್ಯೆ ತೆಲಂಗಾಣದಲ್ಲಿ ಭಾರಿ ಹಗ್ಗ-ಜಗ್ಗಾಟ ನಡೆಯಲಿದೆ. ಇನ್ನು ಛತ್ತೀಸ್​ಗಢದಲ್ಲಿ ಕಾಂಗ್ರೆಸ್ 49 ಕ್ಷೇತ್ರಗಳನ್ನ ಗೆಲ್ಲಬಹುದು. ಬಿಜೆಪಿ 38 ಸ್ಥಾನಗಳನ್ನ ಗೆಲ್ಲಬಹುದು ಅಂತಾ CNN NEWS 18 ವರದಿ ಮಾಡಿದೆ.

ಒಟ್ಟಾರೆಯಾಗಿ ಪಂಚರಾಜ್ಯ ವಿಧಾನಸಭೆ ಚುನಾವಣೆಯಲ್ಲಿ ಮಧ್ಯಪ್ರದೇಶದಲ್ಲಿ ಬಿಜೆಪಿ ಹೆಚ್ಚು ಫೇವರ್ ಆಗಿದ್ರೂ ನೆಕ್​ ಟು ನೆಕ್ ಫೈಟ್ ನಡೆಯೋ ಸಾಧ್ಯತೆಯೇ ಹೆಚ್ಚಿದೆ. ಇನ್ನು ರಾಜಸ್ಥಾನವನ್ನ ಬಿಜೆಪಿ ಕ್ಲೀನ್​ಸ್ವೀಪ್​ ಮಾಡೋದು ಆಲ್​ಮೋಸ್ಟ್ ಗ್ಯಾರಂಟಿ ಅಂತಾನೆ ಹೇಳಬಹುದು. ಕಳೆದ ಕೆಲ ದಶಕಗಳಿಂದ ರಾಜಸ್ಥಾನದಲ್ಲಿ ಒಂದೇ ಪಕ್ಷ ನಿರಂತರವಾಗಿ ಗೆದ್ದಿದ್ದೇ ಇಲ್ಲ. ಪ್ರತೀ ಐದು ವರ್ಷಕ್ಕೊಮ್ಮೆ ಸರ್ಕಾರ ಬದಲಾಗ್ತಾನೆ ಇದೆ. ಇನ್ನು ಛತ್ತೀಸ್​ಗಢದಲ್ಲಿ ಕಾಂಗ್ರೆಸ್​​ ಅಧಿಕಾರ ಉಳಿಸಿಕೊಳ್ಳುವಲ್ಲಿ ಮತ್ತೊಮ್ಮೆ ಯಶಸ್ವಿಯಾಗುವ ಸಾಧ್ಯತೆ ಹೆಚ್ಚಾಗಿದೆ. ಎಲ್ಲಕ್ಕಿಂತ ಇಂಟ್ರೆಸ್ಟಿಂಗ್ ಆಗಿರೋದು ತೆಲಂಗಾಣದ ರಿಸಲ್ಟ್. ಕೆಸಿಆರ್​ಗೆ ಈ ಬಾರಿ ಕಾಂಗ್ರೆಸ್​ ಅಕ್ಷರಶ: ಶಾಕ್ ನೀಡುವಂತೆ ಕಾಣ್ತಾ ಇದೆ. ಒಂದು ವೇಳೆ ಕಾಂಗ್ರೆಸ್​​ಗೂ ಮೆಜಾರಿಟಿ ಸಿಕ್ಕಿಲ್ಲ ಅಂದ್ರೆ, ಇತ್ತ ಬಿಜೆಪಿಯೂ ಕೆಲ ಸ್ಥಾನಗಳನ್ನ ಗೆಲ್ಲುವಲ್ಲಿ ಸಕ್ಸಸ್ ಆಯ್ತು ಅಂದ್ರೆ ಬಿಜೆಪಿ ಮತ್ತು ಕೆಸಿಆರ್​​ ಕೈಜೋಡಿಸುತ್ತಾ? ಈವರೆಗೆ ಬದ್ಧ ವೈರಿಗಳಾಗಿದ್ದವರು ಸರ್ಕಾರ ರಚನೆಗೆ ಒಂದಾಗ್ತಾರಾ ಅನ್ನೋ ಕುತೂಹಲ ಇದೆ. ಹಾಗೆಯೇ ಅಸಾದುದ್ದೀನ್ ಓವೈಸಿಗೆ ಕೂಡ ತೆಲಂಗಾಣದಲ್ಲಿ ಕಿಂಗ್​ ಮೇಕರ್ ಆಗುವ ಅವಕಾಶ ಇದೆ. ಫೈನಲ್ ರಿಸಲ್ಟ್ ಡೇನಂದು ತೆಲಂಗಾಣ ರಿಸಲ್ಟ್ ನಿಜಕ್ಕೂ ತುಂಬಾನೆ ಇಂಟ್ರೆಸ್ಟಿಂಗ್ ಆಗಿದೆ. ಡಿಸೆಂಬರ್​ 3ರಂದು ಕೌಟಿಂಗ್​ ನಡೆಯಲಿದ್ದು, ಐದು ರಾಜ್ಯಗಳ ಚುಕ್ಕಾಣಿ ಹಿಡಿಯೋರು ಯಾರು ಅನ್ನೋದು ಸ್ಪಷ್ಟವಾಗಲಿದೆ. ನಿಮ್ಮ ಪ್ರಕಾರ, ಫೈನಲ್ ರಿಸಲ್ಟ್ ಏನಾಗಬಹುದು? ಮಧ್ಯಪ್ರದೇಶದಲ್ಲಿ ನೆಕ್​ ಟು ನೆಕ್ ಫೈಟ್ ಆಗುತ್ತಾ? ರಾಜಸ್ಥಾನದಲ್ಲಿ ಬಿಜೆಪಿಯೇ ಗೆಲ್ಲೋದು ಗ್ಯಾರೆಂಟೀನಾ? ಛತ್ತೀಸ್​ಗಢದಲ್ಲಿ ಕಾಂಗ್ರೆಸ್​​ಗೆ ಟಕ್ಕರ್​ ಕೊಡೋ ಚಾನ್ಸಸ್ ಇದ್ಯಾ? ಇಲ್ಲಾ ಮತ್ತೊಮ್ಮೆ ಭೂಪೇಶ್ ಭಘೇಲ್ ಸಿಎಂ ಆಗ್ತಾರಾ? ಹಾಗೆಯೇ ತೆಲಂಗಾಣದಲ್ಲಿ ಕಾಂಗ್ರೆಸ್ ಇತಿಹಾಸ ಸೃಷ್ಟಿಸುತ್ತಾ? ಇಲ್ಲಾ ಬದ್ಧ ವೈರಿಗಳು ದೋಸ್ತಿಯಾಗ್ತಾರಾ? ಅನ್ನೋದನ್ನು ಚುನಾವಣಾ ಫಲಿತಾಂಶ ಬರುವವರೆಗೂ ಕಾದು ನೋಡಬೇಕಾಗಿದೆ.