ಈ ಸಲ ಕಪ್ ನಮ್ದೇ – 1 ಗೆಲುವು.. TOP 5 ಗೆ RCB
Playoffs ರೇಸ್ ಗೆ ಇನ್ನೊಂದೇ ಹೆಜ್ಜೆ

ಇದಪ್ಪ ಆರ್​ಸಿಬಿ ಪವರ್ ಅಂದ್ರೆ. ಫಸ್ಟ್ ಆಫ್​ನಲ್ಲಿ ವರ್ಸ್ಟ್ ಪರ್ಫಾಮೆನ್ಸ್ ತೋರಿಸಿದ್ರೂ ಸೆಕೆಂಡ್ ಆಫ್​ನಲ್ಲಿ ಎದುರಾಳಿಗಳ ಎದೆ ನಡುಗಿಸಿದ್ದಾರೆ. ಒಂದರ ಹಿಂದೆ ಒಂದರಂತೆ ಸತತ ಐದು ಪಂದ್ಯಗಳಿಂದ್ಲೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಟೀಂನ ಕಟ್ಟಿ ಹಾಕೋಕೆ ಯಾರಿಂದಲೂ ಸಾಧ್ಯವಾಗೇ ಇಲ್ಲ. ಭಾನುವಾರ ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಮ್​ನಲ್ಲಿ ನಡೆದ ಪಂದ್ಯದಲ್ಲೂ ಫಾಫ್ ಪಡೆ ಮತ್ತೊಮ್ಮೆ ಗೆಲುವಿನ ನಗಾರಿ ಬಾರಿಸಿದೆ. ರಾಜಧಾನಿ ದೆಹಲಿ ತಂಡವನ್ನ ಬೆಂಗಳೂರಿನಲ್ಲಿ ಬಗ್ಗು ಬಡಿದಿದೆ. ಈ ಗೆಲುವು ಆರ್​ಸಿಬಿಗೆ ಅತಿದೊಡ್ಡ ಶಕ್ತಿ ನೀಡಿದೆ. ಪ್ಲೇಆಫ್​ ಹೊಸ್ತಿಲಿಗೆ ತಂದು ನಿಲ್ಲಿಸಿದೆ. ಅಷ್ಟಕ್ಕೂ ಆರ್​ಸಿಬಿ ವರ್ಸಸ್ ಡಿಸಿ ನಡುವಿನ ಪಂದ್ಯ ಹೇಗಿತ್ತು..? ಆರ್​ಸಿಬಿಗೆ ಏನೆಲ್ಲಾ ಪ್ಲಸ್ ಆಯ್ತು..? ಪ್ಲೇ ಆಫ್ ಗೆ ಇರೋ ಸವಾಲೇನು..? ಗೆಲ್ಲಬೇಕಿದ್ದ ಮ್ಯಾಚ್​ನ ಡೆಲ್ಲಿ ಕೈಚೆಲ್ಲಿಕೊಂಡಿದ್ದೇಗೆ..?  ಈ ಕುರಿತ ಮಾಹಿತಿ ಇಲ್ಲಿದೆ.

ಇದನ್ನೂ ಓದಿ: ಪ್ಲೇ ಆಫ್ಗೆ ಒಂದೇ ಮೆಟ್ಟಿಲು! – RCBಯೇ ದೊಡ್ಡ ಸವಾಲು!- OUTನಲ್ಲೂ ಜಡೇಜಾ ದಾಖಲೆ!

ಐಪಿಎಲ್​ನ ಫಸ್ಟ್ ಆಫ್​ನಲ್ಲಿ ಪಾಯಿಂಟ್ಸ್ ಟೇಬಲ್​ನಲ್ಲಿ ಟಾಪ್ ಟೆನ್​ನಲ್ಲಿದ್ದ ಆರ್​ಸಿಬಿ ಗುಜರಾತ್ ವಿರುದ್ಧದ ಗೆಲುವಿನ ಮೂಲಕ 7ನೇ ಸ್ಥಾನಕ್ಕೆ ಜಿಗಿದಿತ್ತು. ಇದೀಗ ಭಾನುವಾರ ಡೆಲ್ಲಿ ತಂಡವನ್ನ ಮಣಿಸಿ ಅಂಕಪಟ್ಟಿಯಲ್ಲಿ 5ನೇ ಸ್ಥಾನಕ್ಕೆ ಜಿಗಿದಿದೆ. ಈ ಮೂಲಕ ಐಪಿಎಲ್ ಸೀಸನ್ 17 ರ ಪ್ಲೇಆಫ್ ರೇಸ್​ನಲ್ಲಿ ಜಿದ್ದಾಜಿದ್ದಿನ ಪೈಪೋಟಿ ಏರ್ಪಟ್ಟಿದೆ. ನಿಧಾನಗತಿಯ ಓವರ್​ನಿಂದಾಗಿ ಡೆಲ್ಲಿ ಕ್ಯಾಪಿಟನ್ಸ್ ತಂಡದ ನಾಯಕ ರಿಷಬ್ ಪಂತ್​ಗೆ ಆರ್​ಸಿಬಿ ವಿರುದ್ಧದ ಪಂದ್ಯದಲ್ಲಿ ನಿಷೇಧ ಹೇರಲಾಗಿತ್ತು. ಹೀಗಾಗಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಅಕ್ಸರ್ ಪಟೇಲ್ ಮುನ್ನಡೆಸಿದ್ದರು. ಟಾಸ್​ ಗೆದ್ದ ಡೆಲ್ಲಿ ಕ್ಯಾಪಿಟಲ್ಸ್​ ಆರ್​ಸಿಬಿಯನ್ನು ಬ್ಯಾಟಿಂಗ್​ಗೆ ಆಹ್ವಾನಿಸಿತ್ತು. ಆದ್ರೆ ಆರ್​ಸಿಬಿಗೆ ಅಂದುಕೊಂಡಂಥ ಓಪನಿಂಗ್ ಸಿಗಲಿಲ್ಲ. ಎಂದಿನಂತೆ ನಾಯಕ ಫಾಫ್ ಡುಪ್ಲೆಸಿಸ್ ನೀರಸ ಪ್ರದರ್ಶನ ನೀಡಿದ್ರು. ಜಸ್ಟ್ 6 ರನ್ ಗಳಿಸಿ ಪೆವಿಲಿಯನ್ ಸೇರಿದ್ರು. ವಿರಾಟ್ ಕೊಹ್ಲಿ ಉತ್ತಮ ಇನ್ನಿಂಗ್ಸ್ ಆರಂಭಿಸಿದ್ರೂ ಯಶಸ್ವಿಯಾಗಲಿಲ್ಲ. 13 ಎಸೆತಗಳ್ಲಲಿ 27 ರನ್ ಸಿಡಿಸಿ ಇಶಾಂತ್ ಶರ್ಮಾಗೆ ವಿಕೆಟ್ ಒಪ್ಪಿಸಿದ್ರು. ಬಳಿಕ ಒಟ್ಟುಗೂಡಿದ ರಜತ್ ಪಟೀದಾರ್ ಮತ್ತು ವಿಲ್ ಜಾಕ್ಸ್ ಒಳ್ಳೆ ಪಾರ್ಟರ್​ಶಿಪ್ ಮೂಲಕ ಉತ್ತಮ ರನ್ ಕಲೆ ಹಾಕಿದ್ರು.  3 ಬೌಂಡರಿ ಮತ್ತು 3 ಸಿಕ್ಸರ್‌ ಮೂಲಕ ಪಟೀದಾರ್ ಅಮೋಘ 52 ರನ್‌ ಸಿಡಿಸಿದರು. ಇವರಿಗೆ ಉತ್ತಮ ಸಾಥ್‌ ನೀಡಿದ ವಿಲ್‌ ಜ್ಯಾಕ್ಸ್‌ ಸಹ 29 ಎಸೆದತಲ್ಲಿ 2 ಸಿಕ್ಸ್ ಹಾಗೂ 3 ಬೌಂಡರಿಗಳ ಮೂಲಕ 41 ರನ್‌ ಗಳಿಸಿದರು. ಉಳಿದಂತೆ ಕ್ಯಾಮರೂನ್ ಗ್ರೀನ್ 24 ಎಸೆದತಲ್ಲಿ 2 ಸಿಕ್ಸ್‌ ಸಹಿತ ಅಜೇಯ 32 ರನ್ ಮತ್ತು ಮಹಿಪಾಲ್ ಲೋಮ್ರೋರ್‌ 8 ಎಸೆತದಲ್ಲಿ 13 ರನ್ ಗಳಿಸಿದರು. ಆದ್ರೆ ಭಾನುವಾರದ ಪಂದ್ಯದಲ್ಲಿ ದಿನೇಶ್ ಕಾರ್ತಿಕ್ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದ್ರು. ಹೀಗೆ ನಿಗದಿತ 20 ಓವರ್​ನಲ್ಲಿ ಆರ್​ಸಿಬಿ 9 ವಿಕೆಟ್ ಕಳೆದುಕೊಂಡ ಆರ್​ಸಿಬಿ 187 ರನ್​ಗಳ ಸಾಧಾರಣ ಟಾರ್ಗೆಟ್ ನೀಡಿತ್ತು. ಆದ್ರೆ ಈ ಗುರಿ ರೀಚ್ ಮಾಡೋಕೆ ಡೆಲ್ಲಿಗೆ ಆಗ್ಲೇ ಇಲ್ಲ. ಆರ್​ಸಿಬಿಯ ಮಾರಕ ಬೌಲಿಂಗ್ ದಾಳಿ ಹಾಗೂ ಫೀಲ್ಡಿಂಗ್​ನಲ್ಲಿ ನಡೆದ ಚಮತ್ಕಾರದಿಂದ 187 ರನ್​ಗಳನ್ನು ಡಿಫೆನ್ಸ್​ ಮಾಡಿಕೊಳ್ಳುವಲ್ಲಿ ಯಶಸ್ವಿ ಆಯಿತು. 19.1 ಓವರ್​​ನಲ್ಲಿ 140 ರನ್​ಗಳಿಸಿ ಡೆಲ್ಲಿ ಕ್ಯಾಪಿಟಲ್ಸ್ ಆಲ್​ಔಟ್ ಆಯಿತು. ಈ ಮೂಲಕ ಆರ್​ಸಿಬಿ 46 ರನ್​ಗಳ ಭರ್ಜರಿ ಗೆಲುವು ಸಾಧಿಸಿತು. ಯಶ್ ದಯಾಳ್, ಗ್ರೀನ್ ತಲಾ ಒಂದೊಂದು ರನೌಟ್​ ಮೂಲಕ ವಿಕೆಟ್ ಪಡೆದರು. ಆರ್​ಸಿಬಿ ಪರ ಯಶ್ ದಯಾಳ್ 3, ಸಿರಾಜ್ 1, ಫರ್ಗುಸನ್ 2, ಸ್ವಪ್ನಿಲ್ ಸಿಂಗ್ 1, ಗ್ರೀನ್ 1 ವಿಕೆಟ್​​ ಪಡೆದು ಮಿಂಚಿದ್ರು. ಆದ್ರೆ ಇಲ್ಲಿ ಆರ್​ಸಿಬಿ ಗೆಲುವಿಗೆ ಮೇನ್ ರೀಸನ್ ಡೆಲ್ಲಿ ತಂಡದ ಆಟಗಾರರ ಫೇಲ್ಯೂರ್. ರಜತ್ ಪಟೀದಾರ್ ಮತ್ತು ವಿಲ್ ಜಾಕ್ಸ್​ ರ ತಲಾ ಎರಡೆರಡು ಕ್ಯಾಚ್​ಗಳನ್ನ ಕೈ ಚೆಲ್ಲಿದ್ರು. ‘ ಡೆಲ್ಲಿ ಕ್ಯಾಪಿಟಲ್ಸ್ ಫೀಲ್ಡರ್ಸ್ ಬರೋಬ್ಬರಿ 4 ಕ್ಯಾಚ್​ಗಳನ್ನು ಕೈಚೆಲ್ಲಿದ್ದೇ ದುಬಾರಿಯಾಯ್ತು. ಈ ಮೂಲಕ ಆರ್​ಸಿಬಿ ಸತತ ಐದನೇ ಪಂದ್ಯವನ್ನ ಗೆದ್ದು ಪ್ಲೇಆಫ್ ಹೊಸ್ತಿಲಿಗೆ ಬಂದು ನೀಂತಿದೆ. ಆದ್ರೆ ಪ್ಲೇಆಫ್ ಬಾಗಿಲು ತೆರೀಬೇಕು ಅಂದ್ರೆ ಮತ್ತೊಂದು ಮ್ಯಾಜಿಕ್ ನಡೆಯಬೇಕಿದೆ. ಅದೇನು ಅನ್ನೋದನ್ನೂ ಹೇಳ್ತೇನೆ.

ಐಪಿಎಲ್ ಸೀಸನ್ 17 ರಲ್ಲಿ ಆರ್​ಸಿಬಿ ತಂಡವು ಒಟ್ಟು 13 ಪಂದ್ಯಗಳನ್ನಾಡಿದೆ. ಈ ಹದಿಮೂರು ಮ್ಯಾಚ್​ಗಳ ಪೈಕಿ 6 ಪಂದ್ಯಗಳಲ್ಲಿ ಗೆಲುವು ಸಾಧಿಸಿರುವ ಫಾಫ್ ಪಡೆ ಇದೀಗ ಅಂಕ ಪಟ್ಟಿಯಲ್ಲಿ 5ನೇ ಸ್ಥಾನಕ್ಕೇರಿದೆ. ಇನ್ನು ಆರ್​ಸಿಬಿ ತಂಡದ ಕೊನೆಯ ಎದುರಾಳಿ ಚೆನ್ನೈ ಸೂಪರ್ ಕಿಂಗ್ಸ್​. ಮೇ 18ರಂದು ನಡೆಯಲಿರುವ ಈ ಪಂದ್ಯವು ಉಭಯ ತಂಡಗಳ ಪಾಲಿಗೆ ನಿರ್ಣಾಯಕವಾಗಿದೆ. ಯಾಕಂದ್ರೆ ಒಂದೆಡೆ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಭಾನುವಾರದ ಮೊದಲ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ವಿರುದ್ಧ ಗೆದ್ದಿದೆ. ಈ ಮೂಲಕ ಸಿಎಸ್​ಕೆ ಅಂಕ ಪಟ್ಟಿಯಲ್ಲಿ 3ನೇ ಸ್ಥಾನಕ್ಕೇರಿದರೆ, ಆರ್​ಸಿಬಿ ಕೂಡ ಡಿಸಿ ತಂಡವನ್ನ ಮಣಿಸಿ 5ನೇ ಸ್ಥಾನಕ್ಕೆ ಬಂದು ನಿಂತಿದೆ. ಕೊನೆಯ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಹಾಗೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮುಖಾಮುಖಿಯಾಗಲಿದೆ. ಹೀಗಾಗಿ ಈ ಪಂದ್ಯವು ಪ್ಲೇಆಫ್ ಹಂತಕ್ಕೇರಲು ಉಭಯ ತಂಡಗಳಿಗೆ ನಿರ್ಣಾಯಕ. ಈ ಮ್ಯಾಚ್​ನಲ್ಲಿ ಆರ್​ಸಿಬಿ ಗೆದ್ದರೆ ಟಾಪ್-4 ಹಂತಕ್ಕೇರಲಿದೆ. ಆದರೆ ಇದೊಂದೇ ಪಂದ್ಯದ ಗೆಲುವಿನಿಂದ ಆರ್​ಸಿಬಿ ತಂಡದ ಪ್ಲೇಆಫ್ ಖಚಿತವಾಗುವುದಿಲ್ಲ. ಬದಲಾಗಿ ಅತ್ತ ಡೆಲ್ಲಿ ಕ್ಯಾಪಿಟಲ್ಸ್, ಲಕ್ನೋ ಸೂಪರ್ ಜೈಂಟ್ಸ್ ಹಾಗೂ ಗುಜರಾತ್ ಟೈಟಾನ್ಸ್ ತಂಡಗಳು ಕೂಡ 12 ಅಂಕಗಳೊಂದಿಗೆ ಪ್ಲೇಆಫ್ ರೇಸ್​ನಲ್ಲಿದೆ. ಹೀಗಾಗಿ ಈ ತಂಡಗಳ ಫಲಿತಾಂಶ ಕೂಡ ಇಲ್ಲಿ ಮುಖ್ಯವಾಗುತ್ತದೆ. ಅದರಲ್ಲೂ ಲಕ್ನೋ ಸೂಪರ್ ಜೈಂಟ್ಸ್ ತಂಡಕ್ಕೆ ಇನ್ನೂ 2 ಪಂದ್ಯಗಳಿವೆ. ಈ ಮ್ಯಾಚ್​ಗಳಲ್ಲಿ ಜಯ ಸಾಧಿಸಿದರೆ ಕೆಎಲ್ ರಾಹುಲ್ ಪಡೆ 16 ಅಂಕಗಳೊಂದಿಗೆ ಪ್ಲೇಆಫ್ ಹಂತಕ್ಕೇರುವುದು ಬಹುತೇಕ ಖಚಿತ. ಹೀಗಾಗಿ ಎಲ್​ಎಸ್​ಜಿ ತಂಡವು ಮುಂದಿನ 2 ಪಂದ್ಯಗಳಲ್ಲೂ ಸೋಲನುಭವಿಸಬೇಕು. ಅಥವಾ ಒಂದು ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಅಥವಾ ಮುಂಬೈ ಇಂಡಿಯನ್ಸ್ ಜಯ ಸಾಧಿಸಬೇಕು. ಮತ್ತೊಂದೆಡೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಒಂದು ಪಂದ್ಯವಿದ್ದು, ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧದ ಈ ಪಂದ್ಯದಲ್ಲಿ ರಿಷಭ್ ಪಂತ್ ಪಡೆ ಸಾಧಾರಣ ಗೆಲುವು ಸಾಧಿಸಬೇಕು. ಒಂದು ವೇಳೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಭರ್ಜರಿ ಜಯ ಸಾಧಿಸಿದರೆ ಉತ್ತಮ ನೆಟ್​ ರನ್​ ರೇಟ್​ನೊಂದಿಗೆ ಪ್ಲೇಆಫ್ ಪ್ರವೇಶಿಸಬಹುದು. ಇನ್ನು ಗುಜರಾತ್ ಟೈಟಾನ್ಸ್ ತಂಡವು 12 ಪಂದ್ಯಗಳಿಂದ ಒಟ್ಟು 10 ಅಂಕಗಳನ್ನು ಕಲೆಹಾಕಿದೆ. ಮುಂದಿನ 2 ಮ್ಯಾಚ್​ಗಳಲ್ಲಿ ಗುಜರಾತ್ ತಂಡವು ಅಮೋಘ ಗೆಲುವು ಸಾಧಿಸಿದರೆ 14 ಅಂಕಗಳೊಂದಿಗೆ ಪ್ಲೇಆಫ್ ಪ್ರವೇಶಿಸುವ ಅವಕಾಶ ಹೊಂದಿದೆ. ಹೀಗಾಗಿ ಜಿಟಿ ತಂಡದ ಒಂದು ಸೋಲು ಆರ್​ಸಿಬಿಗೆ ಪ್ಲಸ್ ಆಗಲಿದೆ.

ಸದ್ಯ ಡೆಲ್ಲಿ ವಿರುದ್ಧದ ಪಂದ್ಯದ ಮೂಲಕ ಆರ್​ಸಿಬಿ ಮುಂದಿನ ಪಂದ್ಯದಲ್ಲೂ ಗೆಲ್ಲೂ ವಿಶ್ವಾಸದಲ್ಲಿದೆ. ಭಾನುವಾರದ ಪಂದ್ಯದ ಗೆಲುವಿನ ಬಳಿಕ ಪೋಸ್ಟ್ ಮ್ಯಾಚ್ ಪ್ರೆಸೆಂಟೇಷನ್ ವೇಳೆ ಮಾತನಾಡಿದ ಫಾಫ್ ಡುಪ್ಲೆಸಿಸ್, ನಾವು ಅತ್ಯುತ್ತಮ ಪ್ರದರ್ಶನವನ್ನು ನೀಡಿದ್ದೇವೆ, ನಿಜವಾಗಿಯೂ ಸಂತೋಷವಾಗುತ್ತಿದೆ. ಈ ಋತುವಿನ ಮೊದಲಾರ್ಧದಲ್ಲಿ ನಾವು ಬ್ಯಾಟಿಂಗ್ ದೃಷ್ಟಿಕೋನದಿಂದ ಮತ್ತು ಬೌಲಿಂಗ್​ನಲ್ಲಿ ಅಂದುಕೊಂಡಂತೆ ಸಾಗಲಿಲ್ಲ. ಆದರೀಗ ನಾವು ಎರಡೂ ವಿಭಾಗಗಳಲ್ಲಿ ಫಾರ್ಮ್ ಕಂಡುಕೊಂಡು ಉತ್ತಮವಾಗಿ ಆಟವಾಡುತ್ತಿದ್ದೇವೆ ಎಂದಿದ್ದಾರೆ. ಹಾಗೇ ಮುಂದಿನ ಪಂದ್ಯವನ್ನೂ ಗೆಲ್ಲೋ ಭರವಸೆಯಲ್ಲಿದ್ದಾರೆ. ಸದ್ಯದ ಮಟ್ಟಿಗೆ ಆರ್​ಸಿಬಿ ಫಾರ್ಮ್ ನೋಡಿದ್ರೆ ಮುಂದಿನ ಮ್ಯಾಚ್​ನಲ್ಲಿ ಸಿಎಸ್​ಕೆ ವಿರುದ್ಧ ಗೆದ್ದು ಕಳೆದ ಪಂದ್ಯದ ಸೋಲಿನ ಸೇಡನ್ನ ತೀರಿಸಿಕೊಳ್ಳಬಹುದು. ಆದ್ರೆ ಇದೊಂದೇ ಗೆಲುವು ಆರ್​ಸಿಬಿಯನ್ನ ಟಾಪ್ 4ಗೆ ಕೊಂಡೊಯ್ಯಲ್ಲ. ಬೇರೆ ತಂಡಗಳ ಸೋಲೂ ನೆರವಾಗಬೇಕು. ಒಟ್ಟಾರೆ ಐಪಿಎಲ್​ ಸೀಸನ್ 17 ಕ್ಲೈಮ್ಯಾಕ್ಸ್ ಹಂತಕ್ಕೆ ಬಂದಿದ್ದು ಟಾಪ್ 7 ರೇಸ್ ಜೋರಾಗಿದೆ. ಫೈನಲಿ ಯಾವ ತಂಡಗಳು ರೇಸ್​ನಲ್ಲಿ ಉಳಿಯಲಿವೆ.