‘ರೇವಣ್ಣ ಜ್ಯೋತಿಷಿಯನ್ನು ಬದಲಾಯಿಸಿದ್ರು ಅದಕ್ಕೆ ಖುರ್ಚಿಯೂ ಬದಲಾಯ್ತು’ – ನಿಂಬೆಹಣ್ಣಿನ ವಿಚಾರ ಹೇಳುತ್ತಾ ರೇವಣ್ಣನ ಕಾಲೆಳೆದ ಆರ್. ಅಶೋಕ್..!

ವಿಧಾನಸಭೆಯಲ್ಲಿ ಜಿಎಸ್‌ಟಿ ಮಸೂದೆ ವಿಚಾರವಾಗಿ ಗಂಭೀರವಾಗಿಯೇ ಚರ್ಚೆ ಸಾಗುತ್ತಿತ್ತು. ಇದರ ಮಧ್ಯೆ ಹಿರಿಯ ಶಾಸಕರಾದ ಹೆಚ್.ಡಿ ರೇವಣ್ಣ ಮತ್ತು ಆರ್. ಅಶೋಕ್ ನಡುವೆ ನಡೆದ ಸ್ವಾರಸ್ಯಕರ ಮಾತಿಗೆ ಸದನ ನಗೆಗಡಲಲ್ಲಿ ತೇಲಿದೆ. ಆರ್. ಅಶೋಕ್ ನನ್ನ ಸ್ನೇಹಿತ ಎಂದು ಹೆಚ್.ಡಿ ರೇವಣ್ಣ ಮಾತು ಶುರು ಮಾಡಿದ್ದಷ್ಟೇ, ಆಗ ತಮಾಷೆ, ಕಾಲೆಳೆಯುವ ಮಾತುಕತೆಗೆ ಕಲಾಪದಲ್ಲಿ ನಗು ತೇಲಿಬಂತು.

ಇದನ್ನೂ ಓದಿ: ಗೃಹಲಕ್ಷ್ಮೀ ಯೋಜನೆ ಅರ್ಜಿ ಸಲ್ಲಿಕೆಗೆ ಮುಂದಿನ ವಾರದ ಮುಹೂರ್ತ – ಪ್ರಿಯಾಂಕ ಗಾಂಧಿ ಚಾಲನೆ!

ವಿಧಾನಸಭೆಯಲ್ಲಿ ಜಿಎಸ್ ಟಿ ಮಸೂದೆ ವಿಚಾರವಾಗಿ ಚರ್ಚೆ ವೇಳೆ ಎದ್ದು ನಿಂತ ಜೆಡಿಎಸ್ ಶಾಸಕ ಹೆಚ್. ಡಿ ರೇವಣ್ಣ, ನಂಗೆ ಆರ್. ಅಶೋಕ್, ಬಸವರಾಜ ಬೊಮ್ಮಾಯಿ ಭಾರೀ ಒಳ್ಳೆಯ ಸ್ನೇಹಿತರು ಎಂದರು. ಆಗ ಎದ್ದು ನಿಂತ ಆರ್. ಅಶೋಕ್, ಈ ಬಾರಿಯ ಚುನಾವಣೆಯಲ್ಲಿ ಎಚ್ ಡಿ ರೇವಣ್ಣ ಸರಿಯಾಗಿ ನಿಂಬೆಹಣ್ಣು ಮಂತ್ರಿಸಿಲ್ಲ ಎಂದು ಕಾಲೆಳೆದರು. ನಾನು ಯಾರತ್ರನೂ ವಿರೋಧಿ ಕಟ್ಟಿಕೊಳ್ಳಲ್ಲ ಎಂದ ರೇವಣ್ಣಗೆ ಟಾಂಗ್ ಕೊಟ್ಟ ಅಶೋಕ್, ನಿನ್ನೆಯೆಲ್ಲಾ ಸಿದ್ರಾಮಣ್ಣ ಫ್ರೆಂಡ್ ಅಂದ್ರಿ, ಅವರ ವಿರುದ್ಧ ಚುನಾವಣಾ ಪ್ರಚಾರಕ್ಕೆ ನೀವು ಬರಲೇ ಇಲ್ಲ. ಅನೇಕರು ನಿಮ್ಮನ್ನು ಬಿಟ್ಟು ಹೋದ್ರು. ಈಗ ನೋಡಿದ್ರೆ ನನ್ನ ಹಿಡ್ಕೊಂಡಿದ್ರಲ್ಲಾ ಎಂದು ಕಾಲೆಳೆದರು. ಮುಂದುವರಿದು, ನೀನು ಮಂತ್ರಿಸೋದು ಮಂತ್ರಿಸ್ತೀಯ, ಈ ಸಲ ಚುನಾವಣೆಗೆ ಸರಿಯಾಗಿ ಮಂತ್ರಿಸಿಲ್ಲ ನಿಂಬೆಹಣ್ಣು. ಸರಿಯಾಗಿ ನಿಂಬೆಹಣ್ಣು ಮಂತ್ರಿಸಿದ್ರೆ ಈ ಸಲ ಚುನಾವಣೆಯಲ್ಲಿ ಗೇಮ್ ಏನೋ ಆಗುತ್ತಿತ್ತು ಎಂದರು. ಕನಿಷ್ಠ 40 ಸ್ಥಾನ ಬಂದಿದ್ರೆ ಏನಾದ್ರೂ ಆಟ ಆಡಿಸಬಹುದಿತ್ತು. ಶಿವಲಿಂಗೇಗೌಡ ಓಡೋದ್ರು, ಎಲ್ಲಾ ಓಡೋದ್ರು ಅದ್ಕೆ ಈ ಸಮಸ್ಯೆ ಆಯ್ತು ನಮಗೆ ಎಂದು ಪರೋಕ್ಷವಾಗಿ ಮೈತ್ರಿಯ ಸಾಧ್ಯತೆಯ ಬಗ್ಗೆ ಉಲ್ಲೇಖ ಮಾಡಿದರು. ನಿಮಗೆ ಕನಿಷ್ಠ 40 ಸ್ಥಾನ ಬಂದಿದ್ರೆ ಬುಗುರಿ ಆಡಿಸಬಹುದಿತ್ತು. ಮೊನ್ನೆ ನಿಮ್ಮ ಹಳೆಯ ಜ್ಯೋತಿಷರು ಸಿಕ್ಕಿದ್ದರು. ಮೊದಲಿದ್ದವರನ್ನು ಈಗ ನೀವು ಬಿಟ್ಟಿದ್ದೀರಾ ಅಂತೆ. ಈಗ ಬೇರೆ ಜ್ಯೋತಿಷ್ಯದವರನ್ನು ಇಟ್ಟುಕೊಂಡಿದ್ದೀರಂತೆ. ಅದಕ್ಕೆ ಅವರು ಸರಿಯಾಗಿ ರಾಹುಕಾಲ, ಗುಳಿಕಕಾಲ ತೋರಿಸಿಲ್ಲ ಎಂದು ತಮಾಷೆಗೆ ಕಿಚಾಯಿಸಿದರು. ಇದನ್ನು ಸರಿಯಾಗಿ ನೋಡಿದರೆ ಕರೆಕ್ಟ್ ಸೀಟ್ ಅಲ್ಲಿ ಕೂರ್ತಾ ಇದ್ದೆ. ಜ್ಯೋತಿಷ್ಯ ಚೇಂಜ್ ಮಾಡಿದ್ರಿ, ಸೀಟೂ ಚೇಂಜ್ ಆಯ್ತು. ಪಿಡಬ್ಯುಡಿ ಮತ್ತು ಇಂಧನ ಎರಡು ಇಲಾಖೆ ನಿಮಗೆ ಫಿಕ್ಸ್ ಆಗ್ತಾ ಇತ್ತು. ನಿಮ್ಮಿಂದ ನಾವು ಇಲ್ಲಿ ಕೂರೋ ಹಾಗೆ ಆಯ್ತು ಎಂದರು. ಇದಕ್ಕೆ ರೇವಣ್ಣ ಪ್ರತಿಕ್ರಿಯೆ ನೀಡಿ, ನೀವಿಬ್ರು ಸೇರಿಕೊಂಡು ನಮ್ಮನ್ನು ತೆಗೆಯೋಗೆ ಹೋಗಿ, ನೀವೂ ಹೋದ್ರಿ, ಅವರಿಗೆ ಅನುಕೂಲ ಆಯ್ತು ಅಷ್ಟೆ. ಇದು ಕಾಲ ಚಕ್ರ ತಿರುಗ್ತಾ ಇರುತ್ತದೆ, ಭಯ ಪಡಬೇಡಿ ಎಂದರು.