ನೋಡಿರಿ
ಆರ್ಸಿಬಿ ಭವಿಷ್ಯ ಈ ತಂಡಗಳ ಮೇಲೆ ನಿಂತಿದ್ಯಾ? – ಬೆಂಗಳೂರು ತಂಡದ ಮುಂದೆ ಸಾಲು ಸಾಲು ಸವಾಲು!
ಫಸ್ಟ್ ಆಫ್ನಲ್ಲಿ ಸತತ ಸೋಲು ಕಂಡ್ರೂ ಸೆಕೆಂಡ್ ಆಫ್ ನಲ್ಲಿ ಆರ್ಸಿಬಿ ಥೂಫಾನ್ ನಂತೆ ಎದ್ದು ಬಂದಿದೆ. ಸತತ ನಾಲ್ಕು ಪಂದ್ಯಗಳಿಂದ ಎದುರಾಳಿ ಪಡೆ ವಿರುದ್ಧ ರಣರೋಚಕ ಗೆಲುವು ಸಾಧಿಸಿದೆ. ಪ್ಲೇ ಆಫ್ಗೆ ಹೋಗೋದು ಕಷ್ಟಸಾಧ್ಯವಿದ್ರೂ ಆಸೆ ಮಾತ್ರ ಇನ್ನೂ ಜೀವಂತವಾಗಿದೆ. ಸದ್ಯ ಫಾಫ್ ನೇತೃತ್ವದ ಆರ್ಸಿಬಿ ತಂಡವು 5 ಪಂದ್ಯಗಳನ್ನು ಗೆದ್ದುಕೊಂಡು 10 ಪಾಯಿಂಟ್ಸ್ ಗಳಿಸಿದೆ. 10 ಪಾಯಿಂಟ್ಸ್ ಗಳಿಸಿರುವ ಆರ್ಸಿಬಿ ಪಾಯಿಂಟ್ಸ್ ಟೇಬಲ್ನಲ್ಲಿ 7ನೇ ಸ್ಥಾನದಲ್ಲಿದೆ. ಖುಷಿಯ ವಿಚಾರ ಏನೆಂದರೆ ನೆಟ್ ರನ್ ರೇಟ್ ಸದ್ಯ ಚೆನ್ನಾಗಿಯೇ ಇಟ್ಟುಕೊಂಡಿರುವ ಆರ್ಸಿಬಿ ಮುಂದೆ ಎರಡು ಪಂದ್ಯಗಳು ಎದುರಾಗಲಿದೆ. ಭಾನುವಾರ ರಿಷಬ್ ಪಂತ್ ನೇತೃತ್ವದ ಡಿಸಿ ವಿರುದ್ಧ ಆರ್ಸಿಬಿ ಸೆಣಸಾಡಲಿದೆ. ಡೆಲ್ಲಿ ಕ್ಯಾಪಿಟಲ್ಸ್ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಆರ್ಸಿಬಿ ಸೆಣಸಾಟ ನಡೆಸಲಿದೆ. ಈ ಎರಡೂ ಪಂದ್ಯಗಳನ್ನು ಆರ್ಸಿಬಿ ಗೆಲ್ಲಬೇಕು. ಆಗ ಮಾತ್ರ ಆರ್ಸಿಬಿ ಪಾಯಿಂಟ್ಸ್ 14ಕ್ಕೇ ಏರಿಕೆ ಆಗಲಿದೆ. 14 ಅಂಕ ಗಳಿಸಿದರೂ ಆರ್ಸಿಬಿ ಭವಿಷ್ಯ ಹೈದರಾಬಾದ್, ಚೆನ್ನೈ, ಡೆಲ್ಲಿ ಕ್ಯಾಪಿಟಲ್ಸ್, ಲಕ್ನೋ ಸೂಪರ್ ಪಂದ್ಯಗಳ ಫಲಿತಾಂಶವನ್ನು ಅವಲಂಭಿಸಿರುತ್ತದೆ.
ಇದನ್ನೂ ಓದಿ: ಧೋನಿ LOSS.. ಕೊಹ್ಲಿಗೆ LUCK – CSK ಸೋತಿದ್ದಕ್ಕೆ RCBಗೆ ಪ್ಲೇಆಫ್
RCB ಮುಂದೆ ಸವಾಲು!
ಪಾಯಿಂಟ್ಸ್ ಟೇಬಲ್ನಲ್ಲಿ ಮೊದಲ 2 ಸ್ಥಾನದಲ್ಲಿ ಕೊಲ್ಕತ್ತಾ ಹಾಗೂ ರಾಜಸ್ಥಾನ್ ತಂಡಗಳು ಉಳಿಯೋದು ಬಹುತೇಕ ಕನ್ಫರ್ಮ್. ಇದೀಗ ಉಳಿದ 2 ಸ್ಥಾನಗಳಲ್ಲಿ ಪ್ಲೇ ಆಫ್ಗೆ ಕ್ವಾಲಿಫೈ ಆಗೋ ರೇಸ್ ಜೋರಾಗಿದೆ. 3 ಹಾಗೂ 4ನೇ ಸ್ಥಾನಕ್ಕಾಗಿ ಹಗ್ಗಜಗ್ಗಾಟ ತೀವ್ರಗೊಂಡಿದೆ. ಸನ್ರೈಸರ್ಸ್ ಹೈದ್ರಾಬಾದ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್, ಸದ್ಯ 3 ಹಾಗೂ 4ನೇ ಸ್ಥಾನದಲ್ಲಿವೆ. ಈಗಾಗಲೇ 12 ಪಂದ್ಯಗಳನ್ನು ಆಡಿ 7 ಪಂದ್ಯಗಳನ್ನು ಗೆದ್ದಿರುವ ಹೈದರಾಬಾದ್ 14 ಅಂಕಗಳನ್ನು ಹೊಂದಿದೆ. ಇತ್ತ ಚೆನ್ನೈ 11 ಪಂದ್ಯಗಳನ್ನು ಆಡಿ 6 ರಲ್ಲಿ ಗೆದ್ದು 12 ಅಂಕಗಳೊಂದಿಗೆ ಪ್ಲೇ-ಆಫ್ ಲೆಕ್ಕಾಚಾರ ಹಾಕ್ತಿದೆ. ಡಿಸಿ ಐದನೇ ಸ್ಥಾನದಲ್ಲಿದ್ರೆ ಎಲ್ಎಸ್ಜಿ 6ನೇ ಸ್ಥಾನದಲ್ಲಿದೆ. ಆಡಿದ 12 ಪಂದ್ಯಗಳಲ್ಲಿ 6 ಪಂದ್ಯ ಗೆದ್ದು 12 ಪಾಯಿಂಟ್ಸ್ ಹೊಂದಿರೋ ಡೆಲ್ಲಿ ಕ್ಯಾಪಿಟಲ್ಸ್, ಲಕ್ನೋ ಸೂಪರ್ ಜೈಂಟ್ಸ್ ತಂಡಗಳಿಗೆ ಇನ್ನೂ ಎರಡೆರಡು ಪಂದ್ಯಗಳು ಬಾಕಿ ಇವೆ. ಈ ಎರಡೂ ಪಂದ್ಯಗಳನ್ನ ಗೆದ್ರೆ ಪ್ಲೇ ಅಫ್ ಕನಸು ಜೀವಂತವಾಗಿರಲಿದೆ. ಹೈದ್ರಾಬಾದ್ ಹಾಗೂ ಚೆನ್ನೈ ಸೋಲು ಗೆಲುವಿನ ಮೇಲೆ ಭವಿಷ್ಯ ನಿರ್ಧಾರವಾಗಲಿದೆ. ಆರ್ಸಿಬಿ ಕಥೆ ನೋಡೋದಾದ್ರೆ ಸತತ 4 ಪಂದ್ಯಗಳಲ್ಲಿ ಗೆದ್ದು ರಾಯಲ್ ಕಮ್ಬ್ಯಾಕ್ ಮಾಡಿರುವ ಆರ್ಸಿಬಿ ಪಾಲಿಗೂ ಪ್ಲೇ ಆಫ್ ಎಂಟ್ರಿಗೆ ಸಣ್ಣ ಅವಕಾಶವಿದೆ. ಉಳಿದ 2 ಪಂದ್ಯಗಳನ್ನೂ ಜಯಿಸಿ, ರನ್ರೇಟ್ ಜಾಸ್ತಿ ಇದ್ದು, ಇತರೆ ತಂಡಗಳ ರನ್ರೇಟ್ ಕಡಿಮೆ ಆದ್ರೆ ಆರ್ಸಿಬಿ ಪ್ಲೇ ಆಫ್ಗೇರಲಿದೆ. ಪ್ರಮುಖವಾಗಿ ಆರ್ಸಿಬಿ ಎಂಟ್ರಿ ಕೊಡಬೇಕಂದ್ರೆ ಉಳಿದ ಪಂದ್ಯಗಳಲ್ಲಿ ಸಿಎಸ್ಕೆ, ಹೈದ್ರಾಬಾದ್, ಡೆಲ್ಲಿ ಹಾಗೂ ಲಕ್ನೋ ತಂಡಗಳು ಸೋಲಬೇಕಿದೆ.
ಇನ್ನು ಐಪಿಎಲ್ನ ಬಾಸ್ ಅಂತಾನೇ ಕರೆಸಿಕೊಳ್ಳೋ ಕಿಂಗ್ ವಿರಾಟ್ ಕೊಹ್ಲಿ ಪ್ರತೀ ಸಲದಂತೆ ಈ ಸಲವೂ ಆರ್ಸಿಬಿಯ ಆಪತ್ಬಾಂಧವರಾಗಿದ್ದಾರೆ. ಏಕಾಂಗಿಯಾಗಿ ಹೋರಾಡಿ ತಂಡವನ್ನ ಗೆಲುವಿನ ದಡ ಮುಟ್ಟಿಸುತ್ತಿದ್ದಾರೆ. ಅದ್ರಲ್ಲೂ ಕಳೆದ ಪಂದ್ಯದಲ್ಲಿ ಧರ್ಮಶಾಲಾದಲ್ಲಿ ನಡೆದ ಪಂಜಾಬ್ ಕಿಂಗ್ಸ್ ಎದುರು ಭರ್ಜರಿ 92 ರನ್ ಚಚ್ಚಿದ್ರು. ಇದೇ ಅದ್ಭುತ ಇನ್ನಿಂಗ್ಸ್ ಆರ್ಸಿಬಿ ಗೆಲುವಿಗೆ ಕಾರಣವಾಗಿದೆ.
