RCB ಪ್ಲೇ ಆಫ್ ಕನಸು ಭಗ್ನ? – 4 ಮ್ಯಾಚ್ ಗಳಿಗಿಲ್ಲ ವಿಲ್ ಜಾಕ್ಸ್!
ಅಭಿಮಾನಿಗಳ ಕನಸು ಛಿದ್ರವಾಗುತ್ತಾ?

ಸನ್ ರೈಸರ್ಸ್ ಹೈದ್ರಾಬಾದ್ ಮತ್ತು ಗುಜರಾತ್ ಟೈಟನ್ಸ್ ವಿರುದ್ಧದ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಭರ್ಜರಿ ಜಯ ದಾಖಲಿಸಿತ್ತು. ಸತತ ಸೋಲುಗಳಿಂದ ಕುಗ್ಗಿ ಹೋಗಿದ್ದ ಆರ್ಸಿಬಿ ಫ್ಯಾನ್ಸ್ಗೆ ಹೊಸ ಹುರುಪು ತಂದಿತ್ತು. ಇನ್ನೇನು ಪ್ಲೇಆಫ್ ಹಾದಿ ಮುಚ್ಚೇಹೋಯ್ತು ಅನ್ನುವಾಗ್ಲೇ, ಇಲ್ಲ ಇನ್ನೂ ಅವಕಾಶ ಇದೆ ಅನ್ನೋ ಲೆಕ್ಕಾಚಾರ ಹಾಕಿದ್ರು. ಆದ್ರೆ ಆರ್ಸಿಬಿಗೆ ಇನ್ನೂ ನಾಲ್ಕು ಪಂದ್ಯಗಳು ಬಾಕಿ ಇರುವಂತೆಯೇ ಬಿಗ್ ಶಾಕ್ ಎದುರಾಗಿದೆ. ಬೆಂಗಳೂರು ತಂಡದ ಸ್ಟಾರ್ ಪ್ಲೇಯರ್ ಮುಂದಿನ ಪಂದ್ಯಗಳಿಗೆ ಅಲಭ್ಯರಾಗಲಿದ್ದಾರೆ. ಅಷ್ಟಕ್ಕೂ ಯಾರು ಆ ಪ್ಲೇಯರ್..? ಆರ್ಸಿಬಿ ತಂಡಕ್ಕೆ ಹೊಡೆತ ಬೀಳುತ್ತಾ..? ಪ್ಲೇಆಫ್ ಕಥೆ ಏನು ಅನ್ನೋ ಮಾಹಿತಿ ಇಲ್ಲಿದೆ.
ಇದನ್ನೂ ಓದಿ: 10 ಪಂದ್ಯ.. 7 ಸೋಲು.. 3 ಜಯ – RCB ಪ್ಲೇ ಆಫ್ ಚಾನ್ಸ್ ಇನ್ನೂ ಇದ್ಯಾ?
ಭಾರತದಲ್ಲಿ ಐಪಿಎಲ್ ಫೀವರ್ ಜೋರಾಗಿದ್ದು ಇದಾದ ಬೆನ್ನಲ್ಲೇ 2024ರ ಐಸಿಸಿ ಮೆಗಾ ಸಮರ ಟಿ20 ವಿಶ್ವಕಪ್ ಶುರುವಾಗಲಿದೆ. ವಿಶ್ವಯುದ್ಧಕ್ಕೆ ಈಗಾಗಲೇ ಬಲಿಷ್ಠ ಟೀಮ್ ಇಂಡಿಯಾ ಪ್ರಕಟವಾಗಿದೆ. ಐಪಿಎಲ್ ಬೆನ್ನಲ್ಲೇ ಎಲ್ಲರ ಗಮನ ಟಿ20 ವಿಶ್ವಕಪ್ನತ್ತ ನೆಟ್ಟಿದೆ. ಇದರ ಮಧ್ಯೆ ಆರ್ಸಿಬಿ ಬಿಗ್ ಶಾಕ್ ಎದುರಾಗಿದೆ. ಜೂನ್ನಲ್ಲಿ ನಡೆಯಲಿರೋ ಟಿ20 ವಿಶ್ವಕಪ್ ಟೂರ್ನಿಗೆ ನ್ಯೂಜಿಲೆಂಡ್, ಸೌಥ್ ಆಫ್ರಿಕಾ, ಇಂಗ್ಲೆಂಡ್, ಭಾರತ ಮತ್ತು ಆಸ್ಟ್ರೇಲಿಯಾ 15 ಸದಸ್ಯರನ್ನು ಒಳಗೊಂಡ ಬಲಿಷ್ಠ ತಂಡ ಪ್ರಕಟಿಸಿವೆ. ಟಿ20 ವಿಶ್ವಕಪ್ಗಾಗಿ ಇಂಗ್ಲೆಂಡ್ ತಂಡದ ಆಟಗಾರರು ಐಪಿಎಲ್ನಿಂದ ದೂರ ಸರಿಯಬೇಕಿದೆ. ಆದ್ದರಿಂದ ಇದು ಐಪಿಎಲ್ ತಂಡಗಳ ಮೇಲೆ ಪ್ರಭಾವ ಬೀರಲಿದ್ದು, ಆರ್ಸಿಬಿಗೂ ಸಂಕಷ್ಟ ಎದುರಾಗಲಿದೆ. ಗುಜರಾತ್ ವಿರುದ್ಧದ ಪಂದ್ಯದಲ್ಲಿ ಆರ್ಸಿಬಿಯ ಹೀರೋ ಆಗಿದ್ದ ವಿಲ್ ಜಾಕ್ಸ್ ಕೂಡ ತವರಿಗೆ ಮರಳಲಿದ್ದಾರೆ.
ವಿಲ್ ಜಾಕ್ಸ್ ಶಾಕ್!
ಐಪಿಎಲ್ ಪ್ಲೇ ಆಫ್ ಗೂ ಮುನ್ನವೇ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಸ್ಟಾರ್ ಆಲ್ರೌಂಡರ್ ಇಂಗ್ಲೆಂಡ್ ತಂಡ ಸೇರಿಕೊಳ್ಳಲಿದ್ದಾರೆ. ಟಿ20 ವಿಶ್ವಕಪ್ಗೆ ಮುನ್ನ ಮೇ 22ರಿಂದ ಇಂಗ್ಲೆಂಡ್ ತಂಡವು ಪಾಕ್ ವಿರುದ್ಧ 4 ಟಿ20 ಪಂದ್ಯಗಳ ಸರಣಿ ಆಡಲಿದೆ. ಹಾಗಾಗಿ ಆರ್ಸಿಬಿ ಸ್ಟಾರ್ ಆಲ್ರೌಂಡರ್ ವಿಲ್ ಜಾಕ್ಸ್ ಇಂಗ್ಲೆಂಡ್ ತಂಡವನ್ನು ಸೇರಿಕೊಳ್ಳಲಿದ್ದಾರೆ. ಹೀಗಾಗಿ ಮುಂದಿನ ಪಂದ್ಯಗಳಲ್ಲಿ ವಿಲ್ ಜಾಕ್ಸ್ ಆರ್ಸಿಬಿ ಪರ ಆಡೋದು ಡೌಟಿದೆ. ಗುಜರಾತ್ ವಿರುದ್ಧದ ಪಂದ್ಯದಲ್ಲಿ ವಿಲ್ ಜಾಕ್ಸ್ ಕೇವಲ 41 ಬಾಲ್ನಲ್ಲಿ 100 ರನ್ ಚಚ್ಚಿದ್ರು. ಬರೋಬ್ಬರಿ 10 ಸಿಕ್ಸರ್, 5 ಫೋರ್ ಸಿಡಿಸಿದ್ರು. ಇವರನ್ನು ಆರ್ಸಿಬಿ ತಂಡದ ಜೂನಿಯರ್ ಎಬಿಡಿ ಎಂದೇ ಹೇಳಲಾಗುತ್ತಿದೆ. ಇದರ ಮಧ್ಯೆ ವಿಲ್ ಜಾಕ್ಸ್ ಇಂಗ್ಲೆಂಡ್ ಮತ್ತೆ ವಾಪಸ್ ಆಗಲಿದ್ದು, ಇದು ಆರ್ಸಿಬಿಗೆ ಆಘಾತ ತಂದಿದೆ.ಇನ್ನು, ಆಂಗ್ಲರ ತಂಡವನ್ನು ಜೋಸ್ ಬಟ್ಲರ್ ಮುನ್ನಡೆಸಲಿದ್ದಾರೆ. ಪ್ರಸ್ತುತ ನಡೆಯುತ್ತಿರುವ ಐಪಿಎಲ್ ನಲ್ಲಿಯೂ ಬಟ್ಲರ್ ರಾಜಸ್ತಾನ ರಾಯಲ್ಸ್ ಪರ 2 ಬಾರಿ ಶತಕ ಸಿಡಿಸಿ ಭರ್ಜರಿ ಫಾರ್ಮ್ನಲ್ಲಿದ್ದಾರೆ. ಇವರೊಂದಿಗೆ ಫಿಲ್ ಸಾಲ್ಟ್, ರೀಸ್ ಟೋಪ್ಲಿ, ವಿಲ್ ಜ್ಯಾಕ್ಸ್ ಮತ್ತು ಲಿಯಾಮ್ ಲಿವಿಂಗ್ಸ್ಟೋನ್, ಸ್ಯಾಮ್ ಕರ್ರನ್, ಜಾನಿ ಬೇರ್ಸ್ಟೋ, ಮೊಯೀನ್ ಅಲಿ ಕೂಡ ತವರಿಗೆ ಮರಳಲಿದ್ದಾರೆ. ವಿಶ್ವಕಪ್ ತಂಡವು ಮೇ 31 ರಂದು ಸ್ಕಾಟ್ಲೆಂಡ್ ವಿರುದ್ಧ ಇಂಗ್ಲೆಂಡ್ನ ಆರಂಭಿಕ ಗುಂಪು ಪಂದ್ಯದ ಮೊದಲು ಕೆರಿಬಿಯನ್ಗೆ ಹಾರಲಿದೆ.
ಐಪಿಎಲ್ ಸೀಸನ್ 17ರಲ್ಲಿ ಸತತ ಸೋಲುಗಳಿಂದಲೇ ಆರ್ಸಿಬಿ ಅಭಿಮಾನಿಗಳಿಗೆ ಬಾರೀ ನಿರಾಸೆ ಮೂಡಿಸಿತ್ತು. ಹೊಸ ಅಧ್ಯಾಯ ಅಂತಾ ಬಂದವ್ರು ಹಳೇ ಸಂಪ್ರದಾಯವನ್ನೇ ಮುಂದುವರಿಸಿದ್ರು. ಆದ್ರೆ ಕಳೆದ ಎರಡು ಪಂದ್ಯಗಳ ಬಳಿಕ ಆರ್ಸಿಬಿ ಕಮ್ಬ್ಯಾಕ್ ಕಂಡು ಫುಲ್ ಹ್ಯಾಪಿಯಾಗಿದ್ದಾರೆ. ಜೊತೆಗೆ ಪ್ಲೇ ಆಫ್ ಲೆಕ್ಕಾಚಾರ ಕೂಡ ನಡೀತಿದೆ.
ನಾಲ್ಕು ಪಂದ್ಯ ಸ್ಪೆಷಲ್!
ಆರ್ ಸಿಬಿ ಪ್ರಸ್ತುತ ಐಪಿಎಲ್ ಸೀಸನ್ನಲ್ಲಿ ಈವರೆಗೂ 10 ಪಂದ್ಯಗಳನ್ನ ಆಡಿದೆ. ಆದ್ರೆ ಆಡಿರೋ 10 ಮ್ಯಾಚ್ಗಳಲ್ಲಿ ಗೆದ್ದಿರೋದು 3 ಪಂದ್ಯಗಳನ್ನ ಅಷ್ಟೇ. ಇನ್ನು ಉಳಿದ 7 ಪಂದ್ಯಗಳನ್ನ ಕೈ ಚೆಲ್ಲಿದೆ. ಸದ್ಯ 6 ಪಾಯಿಂಟ್ಗಳನ್ನ ಹೊಂದಿದ್ದು ಪಾಯಿಂಟ್ಸ್ ಟೇಬಲ್ ನಲ್ಲಿ ಕೊನೇ ಸ್ಥಾನದಲ್ಲಿದೆ. ಆದ್ರೆ ಕಳೆದ ಎರಡು ಮ್ಯಾಚ್ಗಳ ಭರ್ಜರಿ ಫರ್ಫಾಮೆನ್ಸ್ ನೋಡಿ ಪ್ಲೇಆಫ್ಗೆ ಹೋಗ್ಬೋದು, ಚೆನ್ನಾಗಿ ಆಡ್ಬೇಕು ಅಷ್ಟೇ ಅಂತಿದ್ದಾರೆ. ಅದ್ರಲ್ಲೂ ಗುಜರಾತ್ ವಿರುದ್ಧ ಸಿಡಿದಿದ್ದ ವಿಲ್ ಜಾಕ್ಸ್ ಅಭಿಮಾನಿಗಳ ನಿರೀಕ್ಷೆ ಹೆಚ್ಚಿಸಿದ್ದರು. ಮುಂದಿನ 4 ಪಂದ್ಯಗಳನ್ನ ಗೆದ್ದರೆ 14 ಅಂಕಗಳನ್ನು ಕಲೆ ಹಾಕಲಿದೆ. ಭಾರೀ ಅಂತರದಲ್ಲಿ ಜಯಭೇರಿ ಭಾರಿಸಿದ್ರೆ, ರನ್ರೇಟ್ ಕೂಡ ಹೆಚ್ಚಲಿದೆ. ಆಗ ಮಾತ್ರ ಪ್ಲೇಆಫ್ಗೆ ಹೋಗೋ ಚಾನ್ಸ್ ಇರಲಿದೆ ಎಂದುಕೊಳ್ತಿದ್ರು. ಮೇ 4ರಂದು ಗುಜರಾತ್ ವಿರುದ್ಧ, ಮೇ 9ರಂದು ಪಂಜಾಬ್ ವಿರುದ್ಧ, ಮೇ 12ರಂದು ಡೆಲ್ಲಿ ವಿರುದ್ಧ ಹಾಗೇ ಮೇ 18 ರಂದು ಚೆನ್ನೈ ವಿರುದ್ಧ ಮ್ಯಾಚ್ ನಡೆಯಲಿದೆ.
ಆರ್ಸಿಬಿ ಪರ ಅಬ್ಬರಿಸಿ ಎಬಿಡಿಯನ್ನ ನೆನಪಿಸಿದ್ದ ವಿಲ್ ಜಾಕ್ಸ್ ಇದೀಗ ನಾಕೌಟ್ ಪಂದ್ಯಗಳ ವೇಳೆ ತವರಿಗೆ ಮರಳಲಿಸಿದ್ದಾರೆ. ಅವರ ಅನುಪಸ್ಥಿತಿ ಅಭಿಮಾನಿಗಳಿಗೂ ಭಾರೀ ನಿರಾಸೆ ಮೂಡಿಸಿದೆ.