ನೋಡಿರಿ
ಚೇಸಿಂಗ್ನಲ್ಲಿ ಸೋತ ಆರ್ಸಿಬಿ – ಮಾರ್ಷ್ ಶತಕ, ಪ್ರಿನ್ಸ್ ಬೌಲಿಂಗ್ ನಿಂದ ಗೆದ್ದ ಪಂತ್ ಪಡೆ
ಲಕ್ನೋ ಪಡೆ ಕೊನೇ ಹಂತದಲ್ಲಿ ಸಂಘಟಿತ ಆಟ ಆಡುವುದರ ಮೂಲಕ ಆರ್ಸಿಬಿ ವಿರುದ್ಧ ಗೆದ್ದು ಬೀಗಿದೆ. ಲಖನೌ ಸೂಪರ್ ಜೈಂಟ್ಸ್ ತಂಡ, ಬೆಂಗಳೂರು ತಂಡದ ವಿರುದ್ಧ 9 ರನ್ಗಳ ರೋಚಕ ಜಯ ಸಾಧಿಸಿದೆ.
ಇದನ್ನೂ ಓದಿ:KL ಆಟ ಬದಲಿಸಿದ ಮಗಳು – ಭಾರತದ ಪರ ಟಿ-20ಗೂ ಬರ್ತಾರಾ?
ಲಕ್ನೋದ ಏಕಾನ ಮೈದಾನದಲ್ಲಿ ನಡೆದ ಐಪಿಎಲ್ನ 50ನೇ ಪಂದ್ಯದಲ್ಲಿ ಆರ್ಸಿಬಿ ವಿರುದ್ಧ ಲಖನೌ ಸೂಪರ್ ಜೈಂಟ್ಸ್ ತಂಡ 9 ರನ್ಗಳ ರೋಚಕ ಜಯ ಸಾಧಿಸಿದೆ. ಮಳೆಯಿಂದಾಗಿ ಆರಂಭದಲ್ಲೇ ಪಂದ್ಯಕ್ಕೆ ಅಡಚಣೆ ಉಂಟಾಯಿತು. ಆದರೂ ಕೂಡಾ ಮೊದಲು ಬ್ಯಾಟಿಂಗ್ ಮಾಡಿದ್ದ ಲಖನೌ ಸೂಪರ್ ಜೈಂಟ್ಸ್ ತಂಡ 19 ಓವರ್ಗಳಲ್ಲಿ 3 ವಿಕೆಟ್ ಕಳೆದುಕೊಂಡು 209 ರನ್ಗಳಿಸಿತು. ಡಕ್ವರ್ತ್ ಲೂಯಿಸ್ ನಿಯಮದ ಪ್ರಕಾರ ಗುರಿಯನ್ನ 213ಕ್ಕೆ ನಿಗದಿ ಮಾಡಲಾಯಿತು. ಆದರೆ ಆರ್ಸಿಬಿ 19 ಓವರ್ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 203 ರನ್ಗಳಿಸಲಷ್ಟೇ ಶಕ್ತವಾಯಿತು. ಈ ಸೀಸನ್ನಲ್ಲಿ ಆರ್ಸಿಬಿ ಮೊದಲ ಬಾರಿಗೆ ಚೇಸಿಂಗ್ ಮಾಡಲಾಗದೇ ಸೋಲು ಕಂಡಿದೆ.
ಟಾಸ್ ಸೋತ ಎಲ್ಎಸ್ಜಿ ತಂಡ ಮೊದಲು ಬ್ಯಾಟಿಂಗ್ ಮಾಡಿತು. ಆರಂಭಿಕ ಬ್ಯಾಟರ್ ಮಿಚೆಲ್ ಮಾರ್ಷ್ ಅಬ್ಬರಕ್ಕೆ ತವರಿನ ಅಭಿಮಾನಿಗಳು ಕುಣಿದು ಕುಪ್ಪಳಿಸಿದರು. ಲಕ್ನೋ ತಂಡ ಉತ್ತಮ ರನ್ ಗಳಿಸುತ್ತಿರುವಾಗಲೇ ಮಳೆ ಅಡ್ಡಿಯಾಗಿತ್ತು. ನಂತರವೂ ಬ್ಯಾಟಿಂಗ್ ಮುಂದುವರೆಸಿದ ಮಾರ್ಷ್ ಶತಕ ಸಿಡಿಸುವಲ್ಲಿ ಸಕ್ಸಸ್ ಆದರು. ಮಾರ್ಷ್ 56 ಎಸೆತಗಳಲ್ಲಿ 9 ಬೌಂಡರಿ, 9 ಸಿಕ್ಸರ್ಗಳ ಸಹಿತ 111 ರನ್ಗಳಿಸಿದರು. ನಿಕೋಲಸ್ ಪೂರನ್ 23 ಎಸೆತಗಳಲ್ಲಿ 4 ಬೌಂಡರಿ, 1 ಸಿಕ್ಸರ್ ಸಹಿತ 38 ರನ್ ಗಳಿಸಿದರು. ರಿಷಭ್ ಪಂತ್ ಆಟವಂತೂ ಅಭಿಮಾನಿಗಳನ್ನು ರಂಜಿಸಿತು. ಕೇವಲ 10 ಎಸೆತಗಳಲ್ಲಿ 4 ಬೌಂಡರಿ, 2 ಸಿಕ್ಸರ್ಗಳ ಸಹಿತ ಅಜೇಯ 32 ರನ್ಗಳಿಸಿದರು. ಲಕ್ನೋ ತಂಡ 19 ಓವರ್ಗಳಲ್ಲಿ 209 ರನ್ಗಳಿಸಿತು.
213 ರನ್ಗಳ ಗುರಿ ಬೆನ್ನಟ್ಟಿದ ಆರ್ಸಿಬಿ ನಿರೀಕ್ಷಿತ ಆರಂಭ ಪಡೆಯಲಿಲ್ಲ. ಕೇವಲ 9 ರನ್ಗಳಾಗುವಷ್ಟರಲ್ಲಿ 2 ವಿಕೆಟ್ ಕಳೆದುಕೊಂಡಿತು. ಜೇಕಬ್ ಬೆಥೆಲ್ ಕೇವಲ 4 ರನ್ಗಳಿಸಿ ಶಮಿಗೆ ವಿಕೆಟ್ ಒಪ್ಪಿಸಿದರೆ, ಕೊಹ್ಲಿ ಖಾತೆಯನ್ನೇ ತೆರೆಯದೇ ಔಟಾದರು. ದೇವದತ್ ಪಡಿಕ್ಕಲ್ ಹಾಗೂ ರಜತ್ ಪಾಟೀದಾರ್ 95 ರನ್ಗಳ ಜೊತೆಯಾಟ ನೀಡಿ ಚೇತರಿಕೆ ನೀಡಿದ್ದರು. ಈ ಹಂತದಲ್ಲಿ ಆರ್ಸಿಬಿ ಗೆಲ್ಲುವ ಸಾಧ್ಯತೆ ಹೆಚ್ಚಿತ್ತು. ಆದರೆ ಪ್ರಿನ್ಸ್ ಯಾದವ್ 11ನೇ ಓವರ್ನಲ್ಲಿ ಆರ್ಸಿಬಿಗೆ ಭಾರೀ ಆಘಾತ ನೀಡಿದರು. ಒಂದೇ ಓವರ್ನಲ್ಲಿ ದೇವದತ್ ಪಡಿಕ್ಕಲ್ ಹಾಗೂ ಜಿತೇಶ್ ಶರ್ಮಾ ವಿಕೆಟ್ ಉರುಳಿಸಿದರು. ಪಡಿಕ್ಕಲ್ 25 ಎಸೆತಗಳಲ್ಲಿ 3 ಬೌಂಡರಿ, 1 ಸಿಕ್ಸರ್ ಸಹಿತ 34 ರನ್ಗಳಿಸಿ ಪ್ರಿನ್ಸ್ ಬೌಲಿಂಗ್ನಲ್ಲಿ ಅವರಿಗೆ ಕ್ಯಾಚ್ ನೀಡಿದರು. ಅದೇ ಓವರ್ನ 5ನೇ ಎಸೆತದಲ್ಲಿ ಜಿತೇಶ್ ಶರ್ಮಾ 1 ರನ್ಗಳಿಸಿ ವಿಕೆಟ್ ಕೀಪರ್ಗೆ ಕ್ಯಾಚ್ ನೀಡಿ ಔಟ್ ಆದರು. ನಂತರದ ಓವರ್ನಲ್ಲಿ ರಜತ್ ಪಾಟೀದಾರ್ ಕೂಡ ಔಟ್ ಆದರು. 31 ಎಸೆತಗಳಲ್ಲಿ 3 ಬೌಂಡರಿ, 6 ಸಿಕ್ಸರ್ಗಳ ಸಹಿತ 61 ರನ್ಗಳಿಸಿ ಶಹ್ಬಾಜ್ ಅಹ್ಮದ್ ಬೌಲಿಂಗ್ನಲ್ಲಿ ದೊಡ್ಡ ಹೊಡೆತಕ್ಕೆ ಕೈ ಹಾಕಿ ಮಾರ್ಕ್ರಮ್ಗೆ ಕ್ಯಾಚ್ ನೀಡಿ ಔಟ್ ಆದರು. 104ಕ್ಕೆ2 ಇದ್ದ ಆರ್ಸಿಬಿ 8 ಎಸೆತಗಳ ಅಂತರದಲ್ಲಿ 112ಕ್ಕೆ 5 ವಿಕೆಟ್ ಕಳೆದುಕೊಂಡಿತ್ತು. ಈ ಹಂತದಲ್ಲಿ ಆರ್ಸಿಬಿ ಸುಲಭವಾಗಿ ಸೋಲೊಪ್ಪಿಕೊಳ್ಳಬಹುದು ಎಂದೇ ನಿರೀಕ್ಷಿಸಲಾಗಿತ್ತು. ಆದರೆ ಟಿಮ್ ಡೇವಿಡ್ ಹಾಗೂ ಕೃನಾಲ್ ಪಾಂಡ್ಯ 24 ಎಸೆತಗಳಲ್ಲಿ 46 ರನ್ಗಳ ಜೊತೆಯಾಟ ನೀಡಿ ಮತ್ತ ತಂಡವನ್ನ ಪಂದ್ಯಕ್ಕೆ ವಾಪಸ್ ತಂದಿದ್ದರು. ಆದರೆ 16ನೇ ಓವರ್ನಲ್ಲಿ ಟಿಮ್ ಡೇವಿಡ್ ಅಹ್ಮದ್ ಬೌಲಿಂಗ್ನಲ್ಲಿ ದಿಗ್ವೇಶ್ ರಾಠಿಗೆ ಕ್ಯಾಚ್ ನೀಡಿ ಔಟ್ ಆದರು. ಡೇವಿಡ್ 17 ಎಸೆತಗಳಲ್ಲಿ 4 ಬೌಂಡರಿ, 3 ಸಿಕ್ಸರ್ಗಳ 40 ರನ್ಗಳಿಸಿದರು. ಡೇವಿಡ್ ವಿಕೆಟ್ ನಂತರ ಮತ್ತೆ ಆರ್ಸಿಬಿ ಸುಲಭವಾಗಿ ಸೋಲಬಹುದು ಎಂದೇ ನಿರೀಕ್ಷಿಸಲಾಗಿತ್ತು. ಆದರೆ ಕೃನಾಲ್ ಪಾಂಡ್ಯ ಹಾಗೂ ಶೆಫರ್ಡ್ ಕೊನೆಯ ಎಸೆತದವರೆಗೂ ಕೊಂಡೊಯ್ದರು. ಈ ಜೋಡಿ 21 ಎಸೆತಗಳಲ್ಲಿ 45 ರನ್ಗಳಿಸಿದರಾದರೂ ತಂಡವನ್ನ ಗೆಲುವಿನ ಗಡಿ ದಾಟಿಸಲು ವಿಫಲರಾದರು. ಕೊನೆಯ ಓವರ್ನಲ್ಲಿ ಆರ್ಸಿಬಿ ಗೆಲ್ಲಲು 20 ರನ್ಗಳ ಅಗತ್ಯವಿತ್ತು. ಆದರೆ ಶೆಫರ್ಡ್ ಹಾಗೂ ಪಾಂಡ್ಯ ರಾಠಿ ಬೌಲಿಂಗ್ನಲ್ಲಿ ಕೇವಲ 11 ರನ್ಗಳಿಸಲಷ್ಟೇ ಶಕ್ತವಾದರು.
