ನೋಡಿರಿ
ಸೋತರೂ ಗೆದ್ದರೂ ಜೈ RCB – ಇಳಕಲ್ ಸೀರೆಯಲ್ಲೂ ‘ಈ ಸಲ ಕಪ್ ನಮ್ದೇ’!
ಐಪಿಎಲ್ 16 ನೇ ಆವೃತ್ತಿ ಈಗಾಗಲೇ ಆರಂಭವಾಗಿದ್ದು, ಕೋಟ್ಯಾಂತರ ಕ್ರಿಕೆಟ್ ಪ್ರೇಮಿಗಳನ್ನು ಮತ್ತೆ ಟಿವಿ ಬುಡಕ್ಕೆ ತಂದು ಕೂರಿಸಿದೆ. ಕಳೆದ 15 ಆವೃತ್ತಿಗಳಲ್ಲಿ ಆರ್ ಸಿ ಬಿ ತಂಡ ಕಪ್ ಗೆಲ್ಲದೇ ಇದ್ರೂ ಕೂಡ ಅಭಿಮಾನಿಗಳು ಮಾತ್ರ ಕಪ್ ನಮ್ದೇ ಅಂತಾ ಬೆಂಬಲ ಸೂಚಿಸುತ್ತಾ ಬಂದಿದ್ದಾರೆ. ಮ್ಯಾಚ್ ಗೆದ್ರೆ ಹಬ್ಬ ಮಾಡುತ್ತಾರೆ. ಮ್ಯಾಚ್ ಸೋತ್ರೆ ದೇವ್ರಿಗೆ ಅರ್ಪಿಸಿ, ಮುಂದಿನ ಸಲ ನಾವೇ ಕಪ್ ಗೆಲ್ಲೋದು ಅಂತಾ ಹೇಳ್ತಾರೆ. ಅಷ್ಟೇ ಅಲ್ಲದೇ ಈ ಸಲ ಕಪ್ ನಮ್ದೇ ಅಂತಾ ಆರ್ ಸಿ ಬಿ ಟ್ಯಾಟೂ, ಟೀ ಶರ್ಟ್ ಮೇಲೆ ಬರೆಸಿಕೊಳ್ಳುತ್ತಿದ್ದಾರೆ. ಈಗ ಕರ್ನಾಟಕದ ಪ್ರಸಿದ್ಧ ಇಳಕಲ್ ಸೀರೆಯಲ್ಲಿ ಈ ಸಲ ಕಪ್ ನಮ್ದೇ ಎಂಬ ಘೋಷವಾಕ್ಯ ಮೂಡಿಬಂದಿದೆ.
ಇದನ್ನೂ ಓದಿ: ‘ಸಿಕ್ಸರ್ ರಿಂಕು ಸಿಂಗ್ ಸೂಪರ್ ಮ್ಯಾನ್’ -ಬಾಲಿವುಡ್ ಸೆಲೆಬ್ರಿಟಿಗಳ ಕಣ್ಣಲ್ಲಿ ರಿಯಲ್ ಹೀರೋ ಆದ ಕ್ರಿಕೆಟಿಗ
ರಾಜ್ಯದಾದ್ಯಂತ ಆರ್ ಸಿಬಿ ಅಭಿಮಾನಿಗಳಿಗೆ ಕಮ್ಮಿಯಿಲ್ಲ. ಮ್ಯಾಚ್ ಸೋಲಲಿ, ಗೆಲ್ಲಲಿ ಬೆಂಬಲ ಮಾತ್ರ ಇದ್ದೇ ಇರುತ್ತೆ. ಇದೀಗ ಬಾಗಲಕೋಟೆ ಆರ್‌ಸಿಬಿ ಅಭಿಮಾನಿ ಮೇಘರಾಜ್ ಈ ಸಲ ಕಪ್ ನಮ್ದೇ ಎಂಬ ಘೋಷವಾಕ್ಯವನ್ನು ಇಳಕಲ್ ಸೀರೆಯಲ್ಲಿ ನೇಯ್ದಿದ್ದಾರೆ. ಇದೀಗ ಈ ಸೀರೆಗೆ ಭಾರಿ ಬೇಡಿಕೆ ಬಂದಿದೆ.
ನೇಕಾರ ಮೇಘರಾಜ್ ಆರ್‌ಸಿಬಿ ಅಭಿಮಾನಿ. ತಮ್ಮ ತಂಡದ ಮೇಲಿನ ಅಭಿಮಾನದಿಂದ ತಾವು ನೇಯ್ದ ಸೀರೆಯಲ್ಲಿ ಈ ಸಲ ಕಪ್ ನಮ್ದೇ ಅಂತಾ ಘೋಷವಾಕ್ಯ ಬರೆದಿದ್ದಾರೆ. ಇದನ್ನು ಕಂಡ ಸ್ಥಳೀಯರು ಕೂಡ ಆತನ ಬೆನ್ನು ತಟ್ಟಿ ಪ್ರೋತ್ಸಾಹ ನೀಡಿದ್ದಾರೆ.
ಈ ಸೀರೆಯಲ್ಲಿ 2023ರ ಐಪಿಎಲ್ ಕಪ್ ನಮ್ದೇ, ನಮ್ಮ ಬೆಂಗಳೂರು ಅಂತಾ ಕಪ್ ಸಮೇತ ಸೀರೆಯಲ್ಲಿ ನೇಯ್ಗೆ ಮಾಡಿದ್ದಾರೆ. ಇನ್ನು ಸೀರೆಯನ್ನು ಪ್ರದರ್ಶನಕ್ಕೆ ಇಟ್ಟಿದ್ದು, ಈ ಸೀರೆ ಮಾರಾಟ ಮಾಡೊಲ್ಲ ಎಂದಿದ್ದಾರೆ. ಈ ಸಲ ಕಪ್ ಗೆಲ್ಲುವ ಆರ್‌ಸಿಬಿ ತಂಡಕ್ಕೆ ಸೀರೆಯನ್ನು ಕೊಡುಗೆ ನೀಡುವುದಾಗಿ ಹೇಳಿಕೊಂಡಿದ್ದಾರೆ.
ಸೋಶಿಯಲ್ ಮೀಡಿಯಾದಲ್ಲಿ ಸೀರೆ ಫೋಟೋ, ವಿಡಿಯೋಗಳು ವೈರಲ್ ಆಗುತ್ತಿದ್ದಂತೆ ಅಭಿಮಾನಿಗಳು ಈ ಸೀರೆಯನ್ನು ತಮಗೆ ಮಾರಾಟ ಮಾಡುವಂತೆಯೂ ಬೇಡಿಕೆ ಇಟ್ಟಿದ್ದಾರೆ. ಭಾರಿ ಬೆಲೆಗೆ ಮಾರಾಟ ಆಗುತ್ತದೆ. ನಿಮ್ಮ ಅಭಿಮಾನದ ಈ ಕಾರ್ಯ ಉತ್ತಮ ಆದಾಯ ತಂದುಕೊಡುತ್ತದೆ ಎಂದು ನೆಟ್ಟಿಗರು ಪ್ರತಿಕ್ರಿಯಿಸಿದ್ದಾರೆ.
