‘ಝಾಕಿರ್ ನಾಯಕ್​ ನನ್ನ ವಿಶ್ವಕಪ್​ ಗೆ ಆಹ್ವಾನಿಸಿಲ್ಲ’-ಕತಾರ್ ಸರ್ಕಾರ
ಭಾರತ ಗರಂ.. ಕತಾರ್ ಕೊಟ್ಟ ಸ್ಪಷ್ಟನೆಯಲ್ಲೇನಿದೆ..?

ಕತಾರ್: ವಿವಾದಾತ್ಮಕ ಧರ್ಮ ಪ್ರಚಾರಕ,ಭಾರತದ ಮೋಸ್ಟ್ ವಾಂಟೆಡ್​ಗಳಲ್ಲಿ ಒಬ್ಬನಾಗಿರುವ ಝಾಕಿರ್ ನಾಯಕ್ ಕತಾರ್ ವಿಶ್ವಕಪ್ ಉದ್ಘಾಟನಾ ಸಮಾರಂಭಕ್ಕೆ ಭೇಟಿ ನೀಡಿರೋದು ಭಾರಿ ಚರ್ಚೆಗೆ ಗ್ರಾಸವಾಗಿತ್ತು. ಕತಾರ್ ವಿಶ್ವಕಪ್ ಸಂದರ್ಭದಲ್ಲಿ ಫುಟ್​ಬಾಲ್ ಅಭಿಮಾನಿಗಳನ್ನ ಉದ್ದೇಶಿಸಿ ಝಾಕಿರ್ ನಾಯಕ್ ಧಾರ್ಮಿಕ ಭಾಷಣಗಳನ್ನ ಮಾಡುತ್ತಾನೆ ಅಂತಾ ಹೇಳಲಾಗಿತ್ತು.  ಝಾಕಿರ್ ನಾಯಕ್​ಗೆ ಕತಾರ್ ಆಹ್ವಾನ ನೀಡಿರೋದು ಇತ್ತ ಭಾರತದ ಕಣ್ಣು ಕೆಂಪಗಾಗಿಸಿತ್ತು. ಕತಾರ್ ವಿಶ್ವಕಪ್ ಟೂರ್ನಿಯನ್ನು ಬಾಯ್ಕಾಟ್ ಮಾಡುವಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಅಭಿಯಾನ ಕೂಡ ಶುರುವಾಗಿತ್ತು. ಆದರೆ ಇದೀಗ ವಿವಾದಕ್ಕೆ ಹೊಸ ತಿರುವು ಸಿಕ್ಕಿದೆ. ಝಾಕಿರ್ ನಾಯಕ್​ನನ್ನು ಕತಾರ್ ಸರ್ಕಾರ ವಿಶ್ವಕಪ್ ಉದ್ಘಾಟನಾ ಸಮಾರಂಭಕ್ಕೆ ಆಹ್ವಾನಿಸಿಯೇ ಇರಲಿಲ್ಲ ಅನ್ನೋ ಮಾಹಿತಿ ಹೊರ ಬಿದ್ದಿದೆ.  ಭಾರತ-ಕತಾರ್ ನಡುವಿನ ಸಂಬಂಧಕ್ಕೆ ಹುಳಿ ಹಿಂಡುವ ಉದ್ದೇಶದಿಂದ ಇಂಥದ್ದೊಂದು ಸುಳ್ಳು ಸುದ್ದಿ ಹರಡಲಾಗಿದೆ ಅನ್ನೋ ಮಾತುಗಳು ಕೇಳಿ ಬರುತ್ತಿದೆ. ಜೊತೆಗೆ ಝಾಕಿರ್ ನಾಯಕ್ ಖಾಸಗಿಯಾಗಿ ಕತಾರ್​ಗೆ ಭೇಟಿ ನೀಡಿದ್ದಾನೆ.  ಅಂತಾ ಕತಾರ್ ವಿದೇಶಾಂಗ ಇಲಾಖೆ ಸ್ಪಷ್ಟನೆ ನೀಡಿದೆ.  ವಿಶ್ವಕಪ್ ಉದ್ಘಾಟನಾ ಸಮಾರಂಭಕ್ಕೆ ಝಾಕಿರ್​ ನಾಯಕ್​ಗೆ ಆಹ್ವಾನ ನೀಡಿದಲ್ಲಿ ಭಾರತದ ಉಪರಾಷ್ಟ್ರಪತಿಗಳ ಕತಾರ್ ಭೇಟಿಯನ್ನ ರದ್ದುಪಡಿಸಬೇಕಾಗುತ್ತದೆ ಅಂತಾ ಭಾರತ ಸರ್ಕಾರ ಖಡಕ್ ಸಂದೇಶ ರವಾನಿಸಿತ್ತು. ಉಪರಾಷ್ಟ್ರಪತಿ ಧನ್​ಕರ್ ಕತಾರ್ ವಿಶ್ವಕಪ್ ಉದ್ಘಾಟನಾ ಸಮಾರಂಭಕ್ಕೆ ಹಾಜರಾಗಿ ಬಳಿಕ ಮರುದಿನವೇ ಕತಾರ್​​ನಿಂದ ಭಾರತದತ್ತ ನಿರ್ಗಮಿಸಿದ್ದರು.

2016ರಲ್ಲಿ ಭಾರತ ಸರ್ಕಾರ ದೇಶದಲ್ಲಿ ಝಾಕಿರ್​​ ನಾಯಕ್​​ನ ಚಟುವಟಿಕೆಗಳಿಗೆ ಸಂಪೂರ್ಣ ತಡೆಯೊಡ್ಡಿತ್ತು. ಆತನ ಇಸ್ಲಾಮಿಕ್ ಸಂಶೋಧನಾ ಸಂಸ್ಥೆಯನ್ನ ಭಾರತದಲ್ಲಿ ನಿಷೇಧಿಸಲಾಗಿತ್ತು. ಆತನ ‘ಪೀಸ್’ ಟಿವಿ ಚಾನಲ್​​ನ್ನು ಕೂಡ ಬಂದ್ ಮಾಡಲಾಗಿತ್ತು. ಪ್ರಚೋದನಾಕಾರಿ ಭಾಷಣ, ಹಿಂಸಾಚಾರಕ್ಕೆ ಕುಮ್ಮಕ್ಕು, ದೇಶವಿರೋಧಿ ಕೃತ್ಯ, ಅಕ್ರಮ ಹಣ ವರ್ಗಾವಣೆ ಸೇರಿದಂತೆ ವಿವಿಧ ಕೇಸ್​ಗಳ ಅಡಿ ಝಾಕಿರ್​ ನಾಯಕ್​ನ ಎಲ್ಲಾ ಚಟುವಟಿಕೆಗಳಿಗೂ ಭಾರತದಲ್ಲಿ ನಿಷೇಧ ಹೇರಲಾಗಿತ್ತು. ಬಳಿಕ ಭಾರತ ಬಿಟ್ಟು ಮಲೇಷ್ಯಾಗೆ ಓಡಿ ಹೋಗಿದ್ದ ಝಾಕಿರ್ ನಾಯಕ್  ಅಲ್ಲೇ ನೆಲೆ ಕಂಡುಕೊಂಡಿದ್ದ.

ಭಾರತದಿಂದ ಎಸ್ಕೇಪ್ ಆದ ಝಾಕಿರ್ ನಾಯಕ್​ಗೆ ಸೇರಿದ್ದ ಆಸ್ತಿಗಳನ್ನ ಈಗಾಗಲೇ ಮುಟ್ಟುಗೋಲು ಹಾಕಲಾಗಿದೆ. ದೇಶದಲ್ಲಿದ್ದ ಆತನ ಕಚೇರಿಗಳ ಮೇಲೆ ಜಾರಿ ನಿರ್ದೇಶನಾಲಯ ದಾಳಿ ಕೂಡ ನಡೆಸಿ, ಅವ್ಯವಹಾರಗಳನ್ನು ಬಯಲಿಗೆಳೆದಿದೆ. ಮತ್ತೊಂದೆಡೆ ಝಾಕಿರ್​​ ನಾಯಕ್​ನನ್ನ ಹಸ್ತಾಂತರಿಸುವಂತೆ ಭಾರತ ಸರ್ಕಾರ ಈಗಾಗ್ಲೇ ಮಲೇಷ್ಯಾಗೆ ಮನವಿ ಮಾಡಿದೆ. ಝಾಕಿರ್​ ನಾಯಕ್​ನನ್ನು ಕರೆತಂದು ಕೋರ್ಟ್​ಗೆ ಒಪ್ಪಿಸಲು ಬೇಕಾದ ಎಲ್ಲಾ ರಾಜತಾಂತ್ರಿಕ ಪ್ರಯತ್ನಗಳು ಕೂಡ ಮುಂದುವರೆದಿದೆ. ಈ ನಡುವೆ, ಝಾಕಿರ್ ನಾಯಕ್ ಮಾತ್ರ ವಿದೇಶಗಳನ್ನು ಸುತ್ತಾಡುತ್ತಾ, ಧರ್ಮ ಪ್ರಚಾರ ಮಾಡುವುದರಲ್ಲೇ ಬ್ಯುಸಿಯಾಗಿದ್ದಾನೆ.