ನೋಡಿರಿ
30 ವರ್ಷಗಳ ಕಾಲ ಫ್ರೀಜರ್ ನಲ್ಲಿ ಇರಿಸಲಾಗಿದ್ದ ಭ್ರೂಣಗಳಿಗೆ ಜನನ ಭಾಗ್ಯ
ಅಮೆರಿಕ: ಸುಮಾರು 30 ವರ್ಷಗಳ ಹಿಂದೆ ಫ್ರೀಜರ್‌ನಲ್ಲಿ ಇರಿಸಲಾಗಿದ್ದ ಭ್ರೂಣಗಳಿಗೆ ಇದೀಗ ಅಮೆರಿಕದ ಓರೆಗಾನ್‌ನಲ್ಲಿ ಜನನ ಭಾಗ್ಯ ದೊರಕಿದೆ. ಇದು ಅತೀ ಹೆಚ್ಚು ಕಾಲ ಇರಿಸಲಾಗಿದ್ದ ಭ್ರೂಣ ಇದಾಗಿದ್ದು, ಅಲ್ಲದೇ ವಿಶ್ವದ ಅತ್ಯಂತ ಹಳೆಯ ಶಿಶುಗಳು ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
ಸುಮಾರು 30 ವರ್ಷಗಳಷ್ಟು ಹಿಂದೆ ದಾನಿಗಳು ನೀಡಿದ್ದ ಅಂಡಾಣು ಹಾಗೂ ವೀರ್ಯಾಣುವನ್ನು ಸಂಯೋಜಿಸಿ 1992 ಏಪ್ರಿಲ್‌ನಲ್ಲಿ ಪ್ರನಾಳ ಶಿಶುಗಳನ್ನು ಶೈತ್ಯಾಗಾರದಲ್ಲಿ ಇಡಲಾಗಿತ್ತು. ರಾಚೆಲ್ ರಿಡ್ಜ್‌ವೇ ಹಾಗೂ ಫಿಲಿಪ್ ರಿಡ್ಜ್‌ವೇ ದಂಪತಿಯ ಕೋರಿಕೆ ಮೇರೆಗೆ ಬರೋಬ್ಬರಿ 30 ವರ್ಷಗಳ ಬಳಿಕ ಈ ಭ್ರೂಣವನ್ನು ಹೊರತೆಗೆದು ಗರ್ಭಕೋಶದಲ್ಲಿ ಇರಿಸಲಾಗಿತ್ತು. ಬಳಿಕ ಅಕ್ಟೋಬರ್ 31 ರಂದು ಅವಳಿ ಶಿಶುಗಳು ಜನನವಾಗಿದ್ದು, ದಾಖಲೆ ನಿರ್ಮಾಣವಾಗಿದೆ.
ಇದನ್ನೂ ಓದಿ: ಈ ನಗರದಲ್ಲಿ ನೀವು ಮನೆ ಖರೀದಿಸಿದರೆ ಸಿಗಲಿದೆ 24 ಲಕ್ಷ ರೂ!
2020ರಲ್ಲಿ 27 ವರ್ಷಗಳಷ್ಟು ಹಳೆಯ ಭ್ರೂಣವನ್ನು ಗರ್ಭ ಕೋಶದಲ್ಲಿ ಇರಿಸಿ ಶಿಶುವಿಗೆ ಜನನ ಭಾಗ್ಯ ನೀಡಲಾಗಿತ್ತು. ಇದು ಈವರೆಗಿನ ದಾಖಲೆಯಾಗಿತ್ತು. ಮೋಲಿ ಗಿಬ್ಸನ್ ಎಂಬ ಈ ಶಿಶು 27 ವರ್ಷಗಳಷ್ಟು ಹಳೆಯ ಶಿಶು ಎಂಬ ಹೆಗ್ಗಳಿಕೆ ಗಳಿಸಿತ್ತು. ಇದೀಗ ಇನ್ನು 30 ವರ್ಷ ಹಿರಿಯ ಅವಳಿ ಶಿಶುಗಳ ಜನನವಾಗಿದೆ.
ಇದೀಗ ಜನನವಾಗಿರುವ ಅವಳಿ ಶಿಶುಗಳಿಗೆ ಲೈಡಿಯಾ ಹಾಗೂ ತಿಮೋಥಿ ರಿಡ್ಜ್‌ವೇ ಎಂದು ಹೆಸರಿಡಲಾಗಿದೆ. ಈ ಎರಡೂ ಶಿಶುಗಳ ಭ್ರೂಣಗಳನ್ನು ಅಮೆರಿಕದ ರಾಷ್ಟ್ರೀಯ ಕೇಂದ್ರದಲ್ಲಿ ಸಂರಕ್ಷಿಸಲಾಗಿತ್ತು. ಅವಳಿ ಶಿಶುಗಳ ಪೈಕಿ ಹೆಣ್ಣು ಶಿಶು ಲೈಡಿಯಾ ಜನನದ ವೇಳೆ 2.5 ಕೆ. ಜಿ. ತೂಕವಿತ್ತು. ಇನ್ನು ಗಂಡು ಶಿಶು ತಿಮೋಥಿ 2.92 ಕೆ. ಜಿ. ತೂಕವಿತ್ತು ಎಂದು ವೈದ್ಯರು ತಿಳಿಸಿದ್ದಾರೆ.
ಐವಿಎಫ್ ಮೂಲಕ ಮಗುವನ್ನು ಪಡೆಯುವಾಗ ದಂಪತಿಗಳ ಬಳಿ ಒಂದಕ್ಕಿಂತಾ ಹೆಚ್ಚು ಅಂಡಾಣುವನ್ನು ಸಂಗ್ರಹಿಸಿ ಇಟ್ಟಿರಲಾಗುತ್ತದೆ. ಅದೇ ರೀತಿ ವೀರ್ಯಾಣುವನ್ನೂ ಸಂಗ್ರಹಿಸಿ ಇಡಲಾಗಿರುತ್ತದೆ. ಐವಿಎಫ್ ಚಿಕಿತ್ಸೆಗೆ ಅಂಡಾಣು ಹಾಗೂ ವೀರ್ಯಾಣು ಬಳಕೆ ಆಗುತ್ತದೆ. ಐವಿಎಫ್ ಚಿಕಿತ್ಸೆ ಯಶಸ್ವಿಯಾದ ಬಳಿಕ ಬಾಕಿ ಉಳಿದ ಅಂಡಾಣು ಹಾಗೂ ವೀರ್ಯಾಣುವನ್ನು ದಂಪತಿ ದಾನ ಮಾಡಿರುತ್ತಾರೆ. ಇವುಗಳನ್ನು ಸಂರಕ್ಷಿಸಿ ಸಂಯೋಜನೆ ಮಾಡಿ ಪ್ರನಾಳ ಶಿಶುಗಳನ್ನು ಸೃಷ್ಟಿಸಲಾಗುತ್ತದೆ. ಬಳಿಕ ಇವುಗಳನ್ನು ದೀರ್ಘ ಕಾಲದವರೆಗೆ ಶೈತ್ಯಾಗಾರದಲ್ಲಿ ಸಂರಕ್ಷಿಸಿ ಇಡಲಾಗುತ್ತದೆ. ಶೈತ್ಯಾಗಾರದ ಫ್ರೀಜರ್‌ನಲ್ಲಿ ಮೈನಸ್ 200 ಡಿಗ್ರಿ ಸೆಲ್ಶೀಯಸ್‌ಗೂ ಕಡಿಮೆ ಶೀತ ಇರುವಂತೆ ನೋಡಿಕೊಳ್ಳಲಾಗುತ್ತದೆ. ಆ ಬಳಿಕ ಅಗತ್ಯ ಇರುವ ದಂಪತಿಗಳ ಮನವಿ ಮೇರೆಗೆ ಅವರಿಗೆ ನೀಡಲಾಗುತ್ತದೆ.
ಇದನ್ನೂ ಓದಿ: ಕೇವಲ 20 ನಿಮಿಷದಲ್ಲಿ ಸೈಕಲ್, ಎಲೆಕ್ಟ್ರಿಕಲ್ ಸೈಕಲ್ ಆಗಿ ಕನ್ವರ್ಟ್ ಆಗುತ್ತೆ!
ರಾಚೆಲ್ ರಿಡ್ಜ್‌ವೇ ಹಾಗೂ ಫಿಲಿಪ್ ರಿಡ್ಜ್‌ವೇ ದಂಪತಿಗೆ ಈಗಾಗಲೇ ನಾಲ್ವರು ಮಕ್ಕಳಿದ್ದಾರೆ. 8, 6, 3 ಹಾಗೂ 2 ವರ್ಷ ವಯಸ್ಸಿನ ಮಕ್ಕಳಿವೆ. ಈ ದಂಪತಿ ಇನ್ನಷ್ಟು ಮಕ್ಕಳನ್ನು ಬಯಸಿದ್ದರು. ಈ ಹಿನ್ನೆಲೆಯಲ್ಲಿ ಅವರು ದಾನಿಗಳ ಭ್ರೂಣ ಪಡೆಯಲು ನಿರ್ಧರಿಸಿದ್ದರು. ಅದರಲ್ಲೂ ದಾನಿಗಳನ್ನು ಹುಡುಕಲು ಕಷ್ಟ ಸಾಧ್ಯ ಆಗುವಂಥಾ ಹಳೆಯ ಅಂಡಾಣು ಹಾಗೂ ವೀರ್ಯಾಣು ಸಂಯೋಜನೆ ಇರುವ ಭ್ರೂಣವನ್ನೇ ಈ ದಂಪತಿ ಬಯಸಿದ್ದರು.
ಈ ಕುರಿತು ಮಾಧ್ಯಮಗಳಿಗೆ ಮಾಹಿತಿ ನೀಡಿರುವ ಫಿಲಿಪ್ ರಿಡ್ಜ್‌ವೇ, ನಾವು ದಾಖಲೆಗಾಗಿ ಅತ್ಯಂತ ಹಳೆಯ ಭ್ರೂಣವನ್ನು ಬಯಸಿರಲಿಲ್ಲ. ಆದರೆ ಬಹಳ ದಿನಗಳಿಂದ ಜನನವಾಗಲು ಕಾಯುತ್ತಿದ್ದ ಭ್ರೂಣದ ಹುಡುಕಾಟದಲ್ಲಿದ್ದೆವು. ನಾವು ಬಯಸಿದಂತೆಯೇ ನಮಗೆ ಈ ಶಿಶುಗಳು ಸಿಕ್ಕಿದ್ದಾರೆ. ಈ ಮಕ್ಕಳು ವಿಶ್ವದ ಅತ್ಯಂತ ಹಳೆಯ ಶಿಶುಗಳು. ಹಾಗೆ ನೋಡಿದರೆ ನನಗೆ 5 ವರ್ಷ ಇದ್ದಾಗ ಅವಳಿ ಶಿಶುಗಳಾದ ಲೈಡಿಯಾ ಹಾಗೂ ತಿಮೋಥಿಗೆ ಭಗವಂತ ಜೀವ ತುಂಬಿದ್ದ. ಆದರೆ, ಆ ಶಿಶುಗಳ ಜೀವವನ್ನು ಇಷ್ಟು ದಿನ ಸಂರಕ್ಷಿಸಿ ಇಟ್ಟು ಇದೀಗ ಜನನ ಆಗುವಂತೆ ಮಾಡಲಾಗಿದೆ ಎಂದು ಫಿಲಿಪ್ ಭಾವುಕರಾಗಿ ಹೇಳಿದ್ದಾರೆ.
ಐವಿಎಫ್ ಚಿಕಿತ್ಸೆ ಯಶಸ್ವಿಯಾದ ಬಳಿಕ ಉಳಿಯುವ ಅಂಡಾಣು ಹಾಗೂ ವೀರ್ಯಾಣುಗಳನ್ನು ಸಂರಕ್ಷಿಸಿ ಇಡುವ ಕಾರ್ಯದ ಹಿಂದೆ ಹಲವು ಉದ್ದೇಶಗಳಿವೆ. ಈ ಅಂಡಾಣು ಹಾಗೂ ವೀರ್ಯಾಣುಗಳನ್ನು ಸಂಯೋಜಿಸಿ ಭ್ರೂಣವನ್ನು ಪ್ರನಾಳದಲ್ಲಿ ಸೃಷ್ಟಿಸಿ ಅದನ್ನು ಜೀವಂತವಾಗಿ ರಕ್ಷಿಸಿ ಇಡಲಾಗುತ್ತದೆ. ಒಂದು ವೇಳೆ ಅದೇ ದಂಪತಿ ತಮಗೆ ಮತ್ತಷ್ಟು ಮಕ್ಕಳು ಬೇಕೆಂದರೆ ಪಡೆದುಕೊಳ್ಳಲು ಇದು ನೆರವಾಗುತ್ತದೆ ಎಂದು ತಜ್ಞರು ವಿವರಿಸಿದ್ದಾರೆ.
