ನೋಡಿರಿ
9 ವರ್ಷಗಳ ಹಿಂದೆ ಸತ್ತ ವ್ಯಕ್ತಿ ಮತ್ತೆ ಪ್ರತ್ಯಕ್ಷ! – ಪೊಲೀಸರು ತಲೆಕೆಡಿಸಿಕೊಂಡಿದ್ದೇಕೆ ಗೊತ್ತಾ?
ಬೀಜಿಂಗ್‌: ಸತ್ತ ವ್ಯಕ್ತಿ ಒಮ್ಮೆಲೆ ನಮ್ಮ ಮುಂದೆ ಪ್ರತ್ಯಕ್ಷವಾಗೋದು, ನಮ್ಮ ಬಳಿ ಬಂದು ಮಾತಾಡೋದು ಇವನ್ನೆಲ್ಲಾ ಸೀರಿಯಲ್, ಸಿನಿಮಾಗಳಲ್ಲಿ ನೋಡಿರುತ್ತೇವೆ. ಕೆಲವೊಂದು ಬಾರಿ ಕನಸಿನಲ್ಲಿಯೂ ಇಂತಹ ಚಿತ್ರಣಗಳು ಬರುತ್ತವೆ. ನಿಜ ಜೀವನದಲ್ಲಿ ಈ ರೀತಿ ಆದ್ರೆ ಹೇಗಿರುತ್ತೆ? ಎಲ್ಲರಲ್ಲೂ ಭಯ, ಆತಂಕ ಉಂಟಾಗುತ್ತದೆ. ಇಂತಹದ್ದೇ ಘಟನೆಯೊಂದು ಚೀನಾದಲ್ಲಿ ನಡೆದಿದೆ. ಸತ್ತಿದ್ದಾನೆಂದುಕೊಂಡಿದ್ದ ವ್ಯಕ್ತಿ ಸುಮಾರು 9 ವರ್ಷಗಳ ನಂತರ ಪ್ರತ್ಯಕ್ಷವಾಗಿದ್ದಾನೆ.
ಚೀನಾದ ಝು ಕಂಗ್ಲು ಎಂಬ ವ್ಯಕ್ತಿ 2014ರಲ್ಲಿ ರಸ್ತೆ ಅಪಘಾತದಲ್ಲಿ ಸಾವನ್ನಪ್ಪಿದ್ದ. ಈ ವೇಳೆ ಆತನ ಕುಟುಂಬ ಹಾಗೂ ಸ್ನೇಹಿತರು ಅಪಘಾತವಾದ ಸ್ಥಳದಲ್ಲಿದ್ದ ಝು ಶವವನ್ನು ಪತ್ತೆ ಮಾಡಿದ್ದರು. ನಂತರ ಝು ಕಂಗ್ಲುವಿನ ಅಳಿಯ ಆತನ ಅಂತಿಮ ವಿಧಿವಿಧಾನಗಳನ್ನು ನೆರವೇರಿಸಿದ್ದರು.
ಇದನ್ನೂ ಓದಿ: ಉಂಗುರ ನುಂಗಿದ 8 ತಿಂಗಳ ಕಂದ – ಚಿಕಿತ್ಸೆ ಫಲಿಸದೇ ಬದುಕಲಿಲ್ಲ ಮಗು
ಕೆಲದಿನಗಳ ಹಿಂದೆ ಝುನನ್ನೇ ಹೋಲುವ ವ್ಯಕ್ತಿಯೊಬ್ಬ ಗ್ರಾಮದಲ್ಲಿ ಓಡಾಡುತ್ತಿದ್ದ. ಅಲ್ಲದೇ ವಿಚಿತ್ರವಾಗಿ ವರ್ತಿಸುತ್ತಿದ್ದನ್ನು ಕಂಡ ಗ್ರಾಮಸ್ಥರು ಪೊಲೀಸರಿಗೆ ತಿಳಿಸಿದ್ದಾರೆ. ಪೊಲೀಸರು ಆತನನ್ನು ವಶಕ್ಕೆ ಪಡೆದು ವಿಚಾರಿಸಿದ್ದಾರೆ. ಆ ವೇಳೆಯೂ ಅಪರಿಚಿತ ವ್ಯಕ್ತಿ ವಿಚಿತ್ರವಾಗಿ ವರ್ತಿಸಿದ್ದಾನೆ. ಬಳಿಕ ಆತನ ಗುರುತು ಪತ್ತೆಹಚ್ಚಲು ಡಿಎನ್ ಎ ಪರೀಕ್ಷೆಗೆ ಒಳಪಡಿಸಿದ್ದಾರೆ. ಈ ವೇಳೆ ಸತ್ಯ ಬಯಲಾಗಿದೆ.
2014 ರ ರಸ್ತೆ ಅಪಘಾತದಲ್ಲಿ ಸಿಕ್ಕ ಮೃತದೇಹವನ್ನು ಝುನದ್ದೇ ಎಂದು ಕುಟುಂಬಸ್ಥರು, ಸ್ನೇಹಿತರು ತಿಳಿಸಿದ್ದರು. ಆದರೆ ಆತನ ದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿರಲಿಲ್ಲ. ಶವ ಸಿಕ್ಕ ಕೂಡಲೇ ಅಂತಿಮ ವಿಧಿ ವಿಧಾನ ನೆರವೇರಿಸಿದ್ದರು.
ಝು ಕಂಗ್ಲು ಗುರುತು ಪತ್ತೆಯಾಗುತ್ತಿದ್ದಂತೆ ಅಧಿಕಾರಿಗಳು ಹಾಗೂ ಪೊಲೀಸರು ಆತನನ್ನು ಆತನ ಕುಟುಂಬದ ಬಳಿಗೆ ಕರೆದೊಯ್ದಿದ್ದಾರೆ. ಈ ವೇಳೆ ಝು ತನ್ನ ಮೊಮ್ಮಗನನ್ನು ಭೇಟಿ ಆಗಿದ್ದು, ಭಾವುಕನಾಗಿದ್ದಾನೆ. ಜೊತೆಗೆ ತನ್ನ ಆಪ್ತರೆಲ್ಲರ ಹೆಸರನ್ನು ಆತ ಬರೆದು ತೋರಿಸಿದ್ದಾನಂತೆ.
ಆದರೆ ಆತ ಇಷ್ಟು ದಿನ ಎಲ್ಲಿದ್ದ? ಏನಾಗಿದ್ದ ಎಂಬ ಬಗ್ಗೆ ಯಾವುದೇ ಉಲ್ಲೇಖವಿಲ್ಲ. ಇತ್ತ ಝು ಸಿಕ್ಕಿರುವುದರಿಂದ ಪೊಲೀಸರಿಗೆ ಹೊಸ ತಲೆನೋವಾಗಿ ಪರಿಣಮಿಸಿದೆ. ಅಂದು ಮೃತಪಟ್ಟವನು ಝು ಅಲ್ಲ ಅಂದಾದ ಮೇಲೆ 2014 ರಲ್ಲಿ ಮೃತಪಟ್ಟವನಾರು ಎಂದು ಪೊಲೀಸರು ತಲೆಕೆಡಿಸಿಕೊಂಡಿದ್ದಾರೆ.
