ನೋಡಿರಿ
ಚಿನ್ನಕ್ಕಿಂತ ದುಬಾರಿ ಜಾಪನ್ನ ಯುಬಾರಿ ಕಿಂಗ್ ಮೆಲನ್ ಹಣ್ಣು – ಇದರ ವಿಶೇಷತೆಯೇನು ಗೊತ್ತಾ?
ನಮ್ಗೆಲ್ಲಾ ಹಣ್ಣು ಅಂದ್ರೆ 300ರೂಪಾಯೊಳಗೆ ಸಿಗುತ್ತೆ. 30 ರೂಪಾಯಿ ಕೊಟ್ರೆ ಒಂದು ಕೆಜಿ ಕಲ್ಲಂಗಡಿ ಸಿಗುತ್ತೆ. ಆದ್ರೆ ಲಕ್ಷ ಲಕ್ಷ ಬೆಲೆ ಬಾಳೋ ಹಣ್ಣಿಗೆ ಬಗ್ಗೆ ಕೇಳಿದ್ದೀರಾ? . ಹೌದು ಜಪಾನ್ನಲ್ಲಿ, ಹೊಚ್ಚ ಹೊಸ ಕಾರಿಗಿಂತ ಹೆಚ್ಚು ಬೆಲೆ ಬಾಳುವ ಕಲ್ಲಂಗಡಿ ಇದೆ. ಇದನ್ನು ಯುಬಾರಿ ಕಿಂಗ್ ಮೆಲನ್ ಎಂದು ಕರೆಯಲಾಗುತ್ತದೆ, ಇದನ್ನು ಅಧಿಕೃತವಾಗಿ ವಿಶ್ವದ ಅತ್ಯಂತ ದುಬಾರಿ ಹಣ್ಣು ಎಂದು ಕರೆಯಲಾಗುತ್ತದೆ.
ಈ ದುಬಾರಿ ಹಣ್ಣನ್ನು ಜಪಾನ್ನ ಹೊಕ್ಕೈಡೋ ದ್ವೀಪದ ಯುಬಾರಿ ಪ್ರದೇಶದಲ್ಲಿ ಮಾತ್ರ ಬೆಳೆಯಲಾಗುತ್ತದೆ. ಇದು ಕೇವಲ ಹಣ್ಣಲ್ಲ, ಬದಲಾಗಿ ಒಂದು ಐಷಾರಾಮಿ ವಸ್ತುವಾಗಿದೆ. ಈ ಹಣ್ಣು ಅದರ ಪರಿಪೂರ್ಣ ದುಂಡಗಿನ ಆಕಾರ, ನಯವಾದ ಸಿಪ್ಪೆ, ಮತ್ತು ಅತ್ಯುತ್ತಮ ಮಾಧುರ್ಯಕ್ಕೆ ತುಂಬಾನೇ ಹೆಸರುವಾಸಿಯಾಗಿದೆ.ಈ ಯುಬಾರಿ ಕಿಂಗ್ ಕಲ್ಲಂಗಡಿಯ ದೊಡ್ಡ ವೈಶಿಷ್ಟ್ಯವೆಂದರೆ ಅದರ ಬೆಲೆ. ಏಕೆಂದರೆ ಈ ಹಣ್ಣನ್ನು ಜಪಾನ್ನ ಯುಬಾರಿ ಪ್ರದೇಶದಲ್ಲಿ ಮಾತ್ರ ಬೆಳೆಯಲಾಗುತ್ತದೆ. ಇಲ್ಲಿನ ಮಣ್ಣು ಜ್ವಾಲಾಮುಖಿ ಖನಿಜಗಳಿಂದ ಸಮೃದ್ಧವಾಗಿದ್ದು, ಅಲ್ಲಿನ ಹವಾಮಾನವು ಹಗಲು ಮತ್ತು ರಾತ್ರಿ ತಾಪಮಾನದಲ್ಲಿ ದೊಡ್ಡ ವ್ಯತ್ಯಾಸವನ್ನು ಉಂಟುಮಾಡುತ್ತದೆ, ಇದು ಹಣ್ಣಿನಲ್ಲಿ ವಿಶಿಷ್ಟವಾದ ಸಿಹಿ ಮತ್ತು ಸುವಾಸನೆಯನ್ನು ಸೃಷ್ಟಿಸುತ್ತದೆ.
ಯುಬಾರಿ ಕಿಂಗ್ ಕಲ್ಲಂಗಡಿ ಬೆಳೆಯುವುದು ಸಾಮಾನ್ಯವಲ್ಲ. ಇದನ್ನು ಬಹಳ ಎಚ್ಚರಿಕೆಯಿಂದ ನಿಯಂತ್ರಿತ ವಾತಾವರಣದಲ್ಲಿ ಬೆಳೆಯಲಾಗುತ್ತದೆ. ರೈತರು ತಾಪಮಾನ, ತೇವಾಂಶ, ಸೂರ್ಯನ ಬೆಳಕು ಮತ್ತು ನೀರಿನ ಗುಣಮಟ್ಟವನ್ನು ಸೂಕ್ಷ್ಮವಾಗಿ ಗಮನಿಸುತ್ತಾರೆ. ಅನೇಕ ಸಂದರ್ಭಗಳಲ್ಲಿ, ಒಂದೇ ಗಿಡದಲ್ಲಿ ಒಂದೇ ಕಲ್ಲಂಗಡಿ ಬೆಳೆಯಲಾಗುತ್ತದೆ, ಇದರಿಂದಾಗಿ ಎಲ್ಲಾ ಪೋಷಕಾಂಶಗಳು ಒಂದೇ ಹಣ್ಣಿನಲ್ಲಿ ಕೇಂದ್ರೀಕೃತವಾಗಿರುತ್ತವೆ.
ಲಕ್ಷಾಂತರ ರೂಪಾಯಿಗೆ ಬೆಲೆ ಬಾಳುವ ಹಣ್ಣನ್ನು ಪ್ರತಿ ವರ್ಷ ಬಹಳ ಕಡಿಮೆ ಪ್ರಮಾಣದಲ್ಲಿ ಬೆಳೆಯಲಾಗುತ್ತದೆ. ಉತ್ಪಾದನೆ ತೀರಾ ಸೀಮಿತವಾಗಿದ್ದು, ಆಕಾರ, ಗಾತ್ರ ಮತ್ತು ಸಿಹಿತನದ ಕಟ್ಟುನಿಟ್ಟಾದ ಮಾನದಂಡಗಳನ್ನು ಪೂರೈಸಿದರೆ ಮಾತ್ರ ಇದನ್ನು ಮಾರಾಟ ಮಾಡಲಾಗುತ್ತದೆ. ಆದ್ದರಿಂದ, ಈ ಹಣ್ಣಿನ ಕಡಿಮೆ ಉತ್ಪಾದನೆ ಮತ್ತು ಪ್ರಪಂಚದಾದ್ಯಂತ ಹೆಚ್ಚಿನ ಬೇಡಿಕೆಯಿಂದಾಗಿ ಇದರ ಬೆಲೆ ಸಿಕ್ಕಾಪಟ್ಟೆ ಹೆಚ್ಚಿದೆ. ಯುಬಾರಿ ಕಿಂಗ್ ಹಣ್ಣನ್ನು ಸಾಂಪ್ರದಾಯಿಕವಾಗಿ ಹರಾಜಿನಲ್ಲಿ ಮಾರಾಟ ಮಾಡಲಾಗುತ್ತದೆ, ಅಲ್ಲಿ ಶ್ರೀಮಂತ ಖರೀದಿದಾರರು, ಹೆಚ್ಚಾಗಿ ಕಂಪನಿಗಳು, ಪ್ರತಿಷ್ಠೆ ಮತ್ತು ಪ್ರಚಾರಕ್ಕಾಗಿ ಬಿಡ್ ಕೂಗುತ್ತಾರೆ. ಒಂದು ಐತಿಹಾಸಿಕ ಹರಾಜಿನಲ್ಲಿ, ಒಂದು ಜೋಡಿ ಯುಬಾರಿ ಕಿಂಗ್ ಕಲ್ಲಂಗಡಿಗಳು ಬರೋಬ್ಬರಿ 33 ಲಕ್ಷ ರೂ.ಗಳಿಗೆ ಮಾರಾಟವಾಗಿ, ವಿಶ್ವ ದಾಖಲೆಯನ್ನು ಸೃಷ್ಟಿಸಿತ್ತು.
