ಮನೀಶ್ ತಾಳ್ಮೆಗೆ ಮುಗ್ಗರಿಸಿದ ಮುಂಬೈ – KKRಗೆ ಈಗ ಪ್ಲೇ ಆಫ್ಸ್ ಅದೃಷ್ಟ ಪರೀಕ್ಷೆ
MI ಪಾಲಿಗೆ ಸ್ಟಾರ್ ಗಳೇ ಶಾಪವಾದ್ರಾ?

ಒಂದ್ಕಡೆ ಕೋಲ್ಕತ್ತಾಗೆ ಪ್ಲೇ ಆಫ್ ರೇಸ್ ನಲ್ಲಿ ಉಳಿಯೋ ಆಸೆ. ಇನ್ನೊಂದ್ಕಡೆ ಮುಂಬೈಗೆ ಪ್ರತಿಷ್ಠೆಯ ಪ್ರಶ್ನೆ. ಮತ್ತೊಂದ್ಕಡೆ ಮಳೆ ಕಾಟ. ಮೈದಾನದಲ್ಲಿ ಬೌಲರ್​ಗಳು ಆರ್ಭಟಿಸ್ತಾ ಇದ್ರೆ ಬ್ಯಾಟರ್ಸ್ ಧೂಳೀಪಟ ಆಗ್ತಿದ್ರು. ಟಾಪ್ 4 ಟಿಕೆಟ್ ಕನಸಿನಲ್ಲಿ ಮೈದಾನಕ್ಕೆ ಇಳಿದ ಕೆಕೆಆರ್​ ಪಾಲಿಗೆ ಆಪತ್ಪಾಂಧವನಾಗಿ ನಿಂತದ್ದೇ ಕನ್ನಡಿಗ ಮನೀಶ್ ಪಾಂಡೆ. ಆತನ ತಾಳ್ಮೆಯೇ ಕೊಲ್ಕತ್ತಾಗೆ ಪ್ಲೇ ಆಫ್ ಆಸೆಯನ್ನ ಜೀವಂತವಾಗಿರಿಸಿದೆ.

ಇದನ್ನೂ ಓದಿ : CSKಗೆ ಇಂದು ಮಾಡು ಇಲ್ಲವೇ ಮಡಿ – ಚೆನ್ನೈ ಗೆಲುವಿಗಾಗಿ ಕಾದು ಕುಳಿತ RCB

ಕೋಲ್ಕತ್ತಾದ ಈಡನ್ ಗಾರ್ಡನ್ಸ್‌ನಲ್ಲಿ ನಡೆದ ಕೋಲ್ಕತ್ತಾ ನೈಟ್ ರೈಡರ್ಸ್ ವರ್ಸಸ್ ಮುಂಬೈ ಇಂಡಿಯನ್ಸ್ ಇಂಡಿಯನ್ಸ್ ನಡುವಿನ ಮ್ಯಾಚಲ್ಲಿ ಕೆಕೆಆರ್ ಗೆದ್ದಿದೆ. ಈ ಗೆಲುವು ಕೆಕೆಆರ್‌ನ ಪ್ಲೇಆಫ್ ತಲುಪುವ ಭರವಸೆಯನ್ನು ಜೀವಂತವಾಗಿರಿಸಿದೆ. ಟಾಸ್ ಸೋತು ಬ್ಯಾಟಿಂಗ್ ಮಾಡಿದ ಮುಂಬೈ 20 ಓವರ್‌ಗಳಲ್ಲಿ 8 ವಿಕೆಟ್‌ಗಳಿಗೆ 147 ರನ್ ಗಳಿಸಲಷ್ಟೇ ಸಾಧ್ಯವಾಯ್ತು. ಕೆಕೆಆರ್‌ಗೆ ಗೆಲ್ಲಲು 148 ರನ್‌ಗಳ ಗುರಿಯನ್ನು ನೀಡಿತು. ಟಾರ್ಗೆಟ್ ಬೆನ್ನಟ್ಟಿದ ಕೆಕೆಆರ್ ಆರಂಭದಲ್ಲಿ ಮುಗ್ಗರಿಸದ್ರೂ ಮನೀಶ್ ಪಾಂಡೆ ಮತ್ತು ರೊವ್​ಮನ್ ಪೊವೆಲ್ ಸಮಯೋಜಿತ ಆಟದಿಂದ 18.5 ಓವರ್‌ಗಳಲ್ಲಿ 6 ವಿಕೆಟ್‌ಗಳಿಗೆ 148 ರನ್ ಗಳಿಸುವ ಮೂಲಕ ಪಂದ್ಯವನ್ನು ಗೆದ್ದಿತು. ಈ ಮೂಲಕ 13 ಅಂಕಗಳೊಂದಿಗೆ ಪಾಯಿಂಟ್ಸ್ ಪಟ್ಟಿಯಲ್ಲಿ 6ನೇ ಸ್ಥಾನಕ್ಕೇರಿದೆ. ಮುಂಬೈ ತಂಡ ಮತ್ತೆ ಮುಗ್ಗರಿಸಿ 9ನೇ ಸ್ಥಾನದಲ್ಲೇ ಉಳಿದುಕೊಳ್ತು.

ಮಾಡು ಇಲ್ಲವೇ ಮಡಿ ಮ್ಯಾಚಲ್ಲಿ ಆಸರೆಯಾದ ಮನೀಶ್ ಪಾಂಡೆ!

ಕೆಕೆಆರ್ ಪರ ಸತತ 4 ಪಂದ್ಯಗಳಿಂದ ಬೆಂಚ್ ಕಾದಿದ್ದ ಮನೀಶ್ ಪಾಂಡೆಗೆ ಮುಂಬೂ ವಿರುದ್ಧ ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಲು ಅವಕಾಶ ಸಿಗ್ತು. ಕೆಕೆಆರ್ ಗೆಲ್ಲಲು ಬೇಕಾಗಿದ್ದು 148 ರನ್‌ಗಳ ಸಾಧಾರಣ ಗುರಿಯೇ ಆಗಿದ್ರು ಸ್ಫೋಟಕ ಓಪನರ್ ಫಿನ್ ಅಲೆನ್ 8 ರನ್​ಗೆ ಔಟಾಗಿದ್ರು. ಅಜಿಂಕ್ಯ ರಹಾನೆ 21 ರನ್ ಹಾಗೇ ಕ್ಯಾಮರೋನ್ ಗ್ರೀನ್ 4 ರನ್. ಆರಂಭದಲ್ಲೇ 3 ವಿಕೆಟ್ ಕಳ್ಕೊಂಡು ಒತ್ತಡಕ್ಕೆ ಸಿಲುಕಿದ್ದ ಕೊಲ್ಕತ್ತಾಗೆ ಮನೀಶ್ ಹಾಗೇ ರೊವ್​ಮನ್ ಪೊವೆಲ್ ಅದ್ಭುತ ಜೊತೆಯಾಟವಾಡಿದ್ರು. ಮನೀಶ್ 33 ಬಾಲಲ್ಲಿ 45 ರನ್ ಗಳಿಸಿದ್ರೆ ಪೊವೆಲ್ 30 ಎಸೆತಗಳಲ್ಲಿ 40 ರನ್ ಗಳಿಸಿದ್ರು. ಈ ಮೂಲಕ ಎರಡೂ ಇನ್ನಿಂಗ್ಸ್​ಗಳಲ್ಲಿ ಮನೀಶ್ ಪಾಂಡೆ ಹೈಯೆಸ್ಟ್ ರನ್ ಸ್ಕೋರರ್ ಆದ್ರು. ಮನೀಶ್ ತಾಳ್ಮೆಯಾಟದಿಂದಲೇ ಕೆಕೆಆರ್ ಗೆಲುವಿನ ದಡ ಮುಟ್ಟಿತು.  ಹಾಗೇ 6 ವರ್ಷಗಳ ಬಳಿಕ ಮನೀಶ್ ಪಾಂಡೆಗೆ ‘ಪ್ಲೇಯರ್ ಆಫ್ ದಿ ಮ್ಯಾಚ್’ ಪ್ರಶಸ್ತಿ ಸಿಕ್ಕಿತ್ತು. ಈ ವೇಳೆ ಭಾವುಕರಾಗಿದ್ದ ಮನೀಶ್, ನಾನು ಕೆಕೆಆರ್ ಫ್ಯಾಮಿಲಿಯನ್ನು ಮನಸಾರೆ ಪ್ರೀತಿಸುತ್ತೇನೆ. ನನ್ನ ಅತ್ಯಂತ ಕೆಟ್ಟ ದಿನಗಳಲ್ಲಿ ಇಡೀ ಜಗತ್ತೇ ನನ್ನನ್ನು ಮರೆತಾಗ ಈ ಕೆಕೆಆರ್ ಮ್ಯಾನೇಜ್‌ಮೆಂಟ್ ಬೆನ್ನಿಗೆ ನಿಂತ್ರು. ನಾನು ಇವತ್ತು ಈ ಜಾಗದಲ್ಲಿ ನಿಲ್ಲಲು ಕೆಕೆಆರ್ ಕಾರಣ ಎಂದು ಭಾವುಕನಾದ್ರು. ಇನ್ನು ಕೊಹ್ಲಿ ಮತ್ತು ರೋಹಿತ್ ಜೊತೆ ಐಪಿಎಲ್​ನ ಪ್ರತೀ ಸೀಸನ್​ನಲ್ಲೂ ಬ್ಯಾಟ್ ಬೀಸಿದ ಮತ್ತೊಬ್ಬ ಆಟಗಾರ ಈ ಮನೀಶ್ ಪಾಂಡೆ ಮಾತ್ರ. ಈ ಲಿಸ್ಟ್​ನಲ್ಲಿ ಧೋನಿ ಇದ್ದರತಾದ್ರೂ ಈ ಸೀಸನ್​ನಲ್ಲಿ ಧೋನಿ ಆಡಿಲ್ಲ. ಹೀಗಾಗಿ ಮೊದಲ ಸೀಸನ್​ನಿಂದ ಈ ಸೀಸನ್​ವರೆಗೆ ಆಡಿದ ಆಟಗಾರರು ಕೊಹ್ಲಿ, ರೊಹಿತ್ ಜೊತೆ ಮನೀಶ್ ಮಾತ್ರವೇ. ಹೀಗೆ ಕೊಲ್ಕತ್ತಾ ಗೆದ್ದು ಸಂಭ್ರಮಿಸಿದ್ರೆ ಇತ್ತ ಮುಂಬೈ ಮಾತ್ರ ಸೋಲಿನ ಸುಳಿಯಲ್ಲೇ ಬಿದ್ದು ಒದ್ದಾಡ್ತಿದೆ. ಸ್ಟಾರ್ ಆಟಗಾರರ ದಂಡೇ ಇದ್ರೂ ಗೆಲುವು ಮಾತ್ರ ದಕ್ಕುತ್ತಿಲ್ಲ. ಒಂದು ರೀತಿ ಸ್ಟಾರ್​ಗಳೇ ಶಾಪವಾದಂತಿದೆ.