ಕ್ಯಾಮರೂನ್ ಕಿಡ್ನಿಗೆ ಏನಾಯ್ತು? – ಆಕ್ಷನ್ ನಲ್ಲಿ RCB ಮತ್ತೆ ಎಡವಟ್ಟು?

ಐಪಿಎಲ್ನಲ್ಲಿ ಮೋಸ್ಟ್ ಅನ್ಲಕ್ಕೀ ಟೀಂ ಅಂತಾ ಯಾವುದಾದ್ರು ಇದ್ರೆ ಅದು ನಮ್ಮ ರಾಯಲ್ ಚಾಲೆಂಜರ್ಸ್ ಬೆಂಗಳೂರು. 16 ಸೀಸನ್ಗಳನ್ನ ಆಡಿದ್ರೂ ಒಂದೇ ಒಂದು ಬಾರಿ ಟ್ರೋಫಿ ಗೆಲ್ಲೋಕೆ ಸಾಧ್ಯವಾಗಿಲ್ಲ. ಎಂಥಾ ಘಟಾನುಘಟಿ ಪ್ಲೇಯರ್ಸ್ಗಳನ್ನೇ ಪರ್ಚೇಸ್ ಮಾಡಿದ್ರೂ ಫೈನಲ್ವರೆಗೆ ಬಂದಿದ್ದಷ್ಟೇ ಸಾಧನೆ. ಪೇಪರ್ನಲ್ಲಿ ಮಾತ್ರ ಆರ್ಸಿಬಿ ಯಾವಾಗಲೂ ಸ್ಟ್ರ್ಯಾಂಗ್ ಟೀಂ. ಆಕ್ಷನ್ ಬಳಿಕ ಅತ್ಯಂತ ಬಲಿಷ್ಠ ಆಟಗಾರರನ್ನ ಹೊಂದಿರೋ ಟೀಂನಲ್ಲಿ ಆರ್ಸಿಬಿ ಯಾವಾಗಲೂ ಟಾಪ್-5 ಪೊಸೀಶನ್ನಲ್ಲಂತೂ ಇದ್ದೇ ಇರುತ್ತೆ. ಎಂತೆಂಥಾ ವರ್ಲ್ಡ್ಕ್ಲಾಸ್ ಕ್ರಿಕೆಟರ್ಸ್ ಎಲ್ಲಾ ಆರ್ಸಿಬಿಯಲ್ಲಿ ಆಡಿದ್ದಾರೆ. ನಿಮಗೆ ಗೊತ್ತೇ ಇದೆ.. ಆದ್ರೂ ಕಪ್ ಮಾತ್ರ ಗೆಲ್ಲೋಕೆ ಆಗಿಲ್ಲ.. ಈ ಬಾರಿ ಕಪ್ ನಮ್ದೇ ಅಂತಾ 16 ವರ್ಷಗಳಿಂದಲೂ ಹೇಳ್ತಾನೆ ಇದ್ದೀವಿ.. ಆದ್ರೆ ನಮ್ಮವರು ಸೋಲ್ತಾನೆ ಇದ್ದಾರೆ.. ಸರಿ ಬಿಡಿ ಇಷ್ಟು ವರ್ಷ ಸೋತಿದ್ದಾಯ್ತು.. ಆರ್ಸಿಬಿ ಫ್ಯಾನ್ಸ್ ಎಲ್ಲಾ ಅರಗಿಸಿಕೊಂಡಿದ್ದೂ ಆಯ್ತು.. 2024ರಲ್ಲಾದ್ರೂ ಕಪ್ ಗೆಲ್ರಪ್ಪಾ ಅಂತಾ ಅಂದ್ಕೊಂಡ್ರೆ ಟೂರ್ನಿ ಆರಂಭವಾಗೋಕೆ ಮೊದಲೇ ನಮ್ಮ ಆರ್ಸಿಬಿಗೆ ಶಾಕ್ ಎದುರಾಗಿದೆ. ಬರೋಬ್ಬರಿ 17.5 ಕೋಟಿ ಕೊಟ್ಟು ಖರೀದಿಸಿದ ಆಟಗಾರ ಕ್ಯಾಮರೂನ್ ಗ್ರೀನ್ ಈ ಬಾರಿ ಆಡ್ತಾರಾ ಇಲ್ವಾ ಅನ್ನೋ ಪ್ರಶ್ನೆ ಕಾಡ್ತಿದೆ. ಇದ್ರ ಜೊತೆಗೆ ಆಕ್ಷನ್ನಲ್ಲೂ ಆರ್ಸಿಬಿ ಒಂದಷ್ಟು ಚಾಲೆಂಜೆಸ್ಗಳನ್ನ ಎದುರಿಸಲಿದೆ. ಇವೆಲ್ಲದರ ಬಗ್ಗೆ ವಿವರವಾದ ಮಾಹಿತಿ ಇಲ್ಲಿದೆ..

ಇದನ್ನೂ ಓದಿ: ನಾಯಕತ್ವದಿಂದ ಕೆಳಗಿಳಿಸಿದ್ದಕ್ಕೆ ಮುಂಬೈ ಟೀಂನಲ್ಲಿ ಆಡಲ್ವಾ ರೋಹಿತ್ ಶರ್ಮಾ – ಟಿ20 ಕ್ಯಾಪ್ಟನ್ಸಿಯಿಂದಲೂ ಕೊಕ್?

ಆಸ್ಟ್ರೇಲಿಯಾದ ಆಲ್ರೌಂಡರ್ ಕ್ಯಾಮರೂನ್ ಗ್ರೀನ್ ಕಳೆದ ಸೀಸನ್ನಲ್ಲಿ ಮುಂಬೈ ಇಂಡಿಯನ್ಸ್ ಪರ ಆಡಿದ್ರು. ಆದ್ರೆ, ಈ ಬಾರಿ ಮುಂಬೈ ಇಂಡಿಯನ್ಸ್ ಕ್ಯಾಮರೂನ್ ಗ್ರೀನ್ ರಿಲೀಸ್ ಮಾಡಿತ್ತು. ಇತ್ತ ಆರ್ಸಿಬಿ 17.5 ಕೋಟಿ ಕೊಟ್ಟು ಆಲ್ರೌಂಡರ್ ಪ್ಲೇಯರ್ನ್ನ ತಂಡಕ್ಕೆ ಸೇರಿಸಿಕೊಂಡಿತ್ತು. ಆರ್ಸಿಬಿ ಹಿಸ್ಟ್ರರಿಯಲ್ಲೇ ಒಬ್ಬ ಪ್ಲೇಯರ್ ಮೇಲೆ ಇಷ್ಟೊಂದು ಇನ್ವೆಸ್ಟ್ಮೆಂಟ್ ಮಾಡಿರೋದು ಇದೇ ಮೊದಲು. ಫುಲ್ ಕ್ಯಾಶ್ ಕೊಟ್ಟು ಮುಂಬೈ ಇಂಡಿಯನ್ಸ್ನಿಂದ ಗ್ರೀನ್ರನ್ನ ಕರೆದುಕೊಳ್ಳಲಾಗಿದೆ. ಗ್ರೀನ್ ಎಂಟ್ರಿಯಿಂದ ಆರ್ಸಿಬಿಗೆ ಇನ್ನಷ್ಟು ಬಲ ಬಂದತಾಗಿತ್ತು. ಆದ್ರೆ ಈಗ ನೋಡಿದ್ರೆ, 2024ರ ಐಪಿಎಲ್ನಲ್ಲಿ ಕ್ಯಾಮರೂನ್ ಗ್ರೀನ್ ಆಡೋದೆ ಅನುಮಾನವಾಗಿದೆ.

ಆಸ್ಟ್ರೇಲಿಯಾದ ಚಾನೆಲ್-7 ಜೊತೆಗೆ ಮಾತನಾಡಿರೋ ಕ್ಯಾಮರೂನ್ ಗ್ರೀನ್ ತಾವು ಗಂಭೀರವಾದ ಕಿಡ್ನಿ ಸಮಸ್ಯೆಯಿಂದ ಬಳಲುತ್ತಿರುವುದಾಗಿ ಹೇಳಿದ್ದಾರೆ. ಹುಟ್ಟಿದಾಗಿನಿಂದಲೇ ಕ್ಯಾಮರೂನ್ ಗ್ರೀನ್ಗೆ ಕಿಡ್ನಿ ಸಮಸ್ಯೆ ಇತ್ತಂತೆ. ಅಂದ್ರೆ ಕ್ಯಾಮರೂನ್ ಗ್ರೀನ್ ಬಾಡಿಯಲ್ಲಿರೋ ಕಿಡ್ನಿ ರಕ್ತವನ್ನ ಫಿಲ್ಟರ್ ಮಾಡ್ತಾ ಇಲ್ಲ. ಜೊತೆಗೆ ಈ ಪ್ರಾಬ್ಲಂ ಸೆಕೆಂಡ್ ಸ್ಟೇಜ್ನಲ್ಲಿ ಇದ್ಯಂತೆ. ಹೇಗೆ ಕ್ಯಾನ್ಸರ್ ತಗುಲಿದಾಗ ಫಸ್ಟ್ ಸ್ಟೇಜ್, ಸೆಕೆಂಡ್ ಸ್ಟೇಜ್, ಥರ್ಡ್ ಸ್ಟೇಜ್ ಅಂತಾ ಇರುತ್ತೋ ಅದೇ ರೀತಿ, ಕ್ಯಾಮರೂನ್ ಗ್ರೀನ್ ಎದುರಿಸ್ತಿರೋ ಕಿಡ್ನಿಗೆ ಸಂಬಂಧಿಸಿದ ರೋಗದಲ್ಲೂ ವಿವಿಧ ಹಂತಗಳಿವೆ. ಈಗ ಕ್ಯಾಮರೂನ್ ಗ್ರೀನ್ 2ನೇ ಸ್ಟೇಜ್ನಲ್ಲಿದ್ದಾರೆ. ಅಂದ್ರೆ ಕ್ಯಾಮರೂನ್ ಕಿಡ್ನಿ 60 ಪರ್ಸೆಂಟ್ನಷ್ಟು ಮಾತ್ರ ಕೆಲಸ ಮಾಡುತ್ತೆ. ನಮ್ಮ ನಿಮ್ಮೆಲ್ಲರ ದೇಹದಲ್ಲಿರೋ ರಕ್ತದಲ್ಲಿ ಅಮೋನಿಯಾ ಅಂಶ ಇರುತ್ತೆ. ಈ ಅಮೋನಿಯಾ ದೇಹಕ್ಕೆ ಒಳ್ಳೆಯದಲ್ಲ. ಅದನ್ನ ಶುದ್ಧೀಕರಿಸುವ ಕೆಲಸವನ್ನ ಕಿಡ್ನಿ ಮಾಡುತ್ತೆ. ರಕ್ತದಲ್ಲಿರುವ ಕಲ್ಮಶವನ್ನ ಫಿಲ್ಟರ್ ಮಾಡೋ ಕೆಲಸವನ್ನ ಕಿಡ್ನಿ ಮಾಡುತ್ತೆ. ಬಳಿಕ ಯುರೀನ್ ಮೂಲಕ ಹೊರ ಹೋಗುತ್ತೆ. ಆದ್ರೆ ಕ್ಯಾಮರೂನ್ ಗ್ರೀನ್ ಕಿಡ್ನಿ ಬ್ಲಡ್ನ್ನ ಫಿಲ್ಟರ್ ಮಾಡ್ತಾನೆ ಇಲ್ಲ. ಇದ್ರಿಂದಾಗಿ ಕ್ಯಾಮರೂನ್ ದೇಹದಲ್ಲಿ ಪ್ರೊಟೀನ್ ಅಂಶವೂ ಕಡಿಮೆಯಿದೆ. ಬೇಗನ ಸುಸ್ತಾಗುತ್ತೆ. ಎಲ್ಲರಿಗೂ ಇರುವಷ್ಟು ಎನರ್ಜಿ ಇರೋದಿಲ್ಲ. ಒಂದು ವೇಳೆ ಈ ಡಿಸೀಸ್ 5ನೇ ಸ್ಟೇಜ್ ತಲುಪಿದ್ರೆ ಕ್ಯಾಮರೂನ್ ಗ್ರೀನ್ ಕಿಡ್ನಿ ಟ್ರಾನ್ಸ್ಪ್ಲ್ಯಾಂಟ್ ಮಾಡಬೇಕಾಗುತ್ತೆ. ಇಲ್ಲಾ ಆಗಾಗ ಡಯಾಲಿಸಿಸ್ಗೆ ಒಳಗಾಗಬೇಕಾಗುತ್ತೆ. ಸದ್ಯ ಸೆಕೆಂಡ್ ಸ್ಟೇಜ್ನಲ್ಲಿರೋ ಕ್ಯಾಮರೂನ್ ಗ್ರೀನ್ ಭವಿಷ್ಯದಲ್ಲಿ 5ನೇ ಸ್ಟೇಜ್ಗೆ ತಲುಪಿಯೇ ತಲುಪುತ್ತಾರೆ. ಇದನ್ನ ಕಂಪ್ಲೀಟ್ ಆಗಿ ಸ್ಟಾಪ್ ಮಾಡೋಕೆ ಅಂದ್ರೆ ಪರ್ಮನೆಂಟ್ ಸೊಲ್ಯೂಷನ್ ಅಂತೂ ಇಲ್ವಂತೆ. ಹೀಗಾಗಿ ಸದ್ಯ ಕ್ಯಾಮರೂನ್ ಗ್ರೀನ್ಗ ಇರೋದು ಒಂದೇ ಆಪ್ಷನ್. ತಮ್ಮ ಕಿಡ್ನಿ ಬಗ್ಗೆ ಎಚ್ಚರಿಕೆ ವಹಿಸಲೇಬೇಕು. ರೋಗ 5ನೇ ಸ್ಟೇಜ್ಗೆ ತಲುಪೋ ಪ್ರಾಸೆಸ್ನ್ನ ಸ್ಲೋ ಮಾಡಬೇಕಷ್ಟೆ. ಹೀಗಾಗಿ ಕ್ಯಾಮರೂನ್ ಗ್ರೀನ್ ಕ್ರಿಕೆಟ್ ವಿಚಾರದಲ್ಲೂ ಹೆಚ್ಚು ರಿಸ್ಕ್ ತೆಗೆದುಕೊಳ್ಳುವಂತೆ ಇಲ್ಲ. ಆಗಾಗ ರೆಸ್ಟ್ ಬೇಕೇ ಬೇಕಾಗುತ್ತೆ.

IPL ಆಡಲ್ವಾ ಕ್ಯಾಮರೂನ್ ಗ್ರೀನ್?

ಈಗ ಆರ್ಸಿಬಿ ಫಾಲೋವರ್ಸ್ಗಳಿಗಿರೋ ಪ್ರಶ್ನೆ ಇದೇ.. 17.5 ಕೋಟಿ ಕೊಟ್ಟು ಕ್ಯಾಮರೂನ್ ಗ್ರೀನ್ರನ್ನ ಆರ್ಸಿಬಿ ಕ್ಯಾಂಪ್ಗೆ ವೆಲ್ಕಮ್ ಮಾಡಿಯಾಗಿದೆ. ಇನ್ನು ಆಡಿಲ್ಲ ಅಂದ್ರೆ ಕಥೆಯೇನು? ಸದ್ಯಕ್ಕಂತೂ ನೋ ವರಿ. ಕ್ಯಾಮರೂನ್ ಗ್ರೀನ್ ಐಪಿಎಲ್ ಆಗಲಿ ಆಸ್ಟ್ರೇಲಿಯಾ ಪರವೇ ಆಗಲಿ ಕ್ರಿಕೆಟ್ ಆಡೋದಿಲ್ಲ ಅಂತಾ ಎಲ್ಲೂ ಹೇಳಿಲ್ಲ. ಈಗಿನವರೆಗೆ ಕ್ಯಾಮರೂನ್ ಗ್ರೀನ್ಗೆ ಕಿಡ್ನಿ ಪ್ರಾಬ್ಲಂ ಅವರ ಪರ್ಫಾಮೆನ್ಸ್ ಮೇಲೆ ಎಫೆಕ್ಟ್ ಆಗಿಲ್ವಂತೆ. ಹೀಗಾಗಿ 2024ರ ಐಪಿಎಲ್ನಲ್ಲಿ ಆರ್ಸಿಬಿ ಪರ ಕ್ಯಾಮರೂನ್ ಆಡೋದಂತೂ ಗ್ಯಾರಂಟಿ. ಈ ಬಗ್ಗೆ ಯಾವುದೇ ಡೌಟ್ ಬೇಡ. ಒಂದು ವೇಳೆ ತಮ್ಮ ಕಿಡ್ನಿ ಅಷ್ಟೊಂದು ಸಿವಿಯರ್ ಆಗಿರ್ತಿದ್ರೆ, ಆಡೋಕೆ ಸಾಧ್ಯವೇ ಇಲ್ಲ ಅನ್ನೋದಾಗಿದ್ರೆ ಕ್ಯಾಮರೂನ್ ಗ್ರೀನ್ 17.5 ಕೋಟಿಯ ಟ್ರೇಡ್ ಡೀಲ್ಗೆ ಒಪ್ಪಿಕೊಳ್ತಾರೆ ಇರ್ತಿರಲಿಲ್ಲ. ಕಿಡ್ನಿ ಸಮಸ್ಯೆ ಇದೆ, ಸೆಕೆಂಡ್ ಸ್ಟೇಜ್ನಲ್ಲಿ ಇದ್ದೀನಿ ಅನ್ನೋದು ಕ್ಯಾಮರೂನ್ ಗ್ರೀನ್ಗೆ ಈ ಹಿಂದೆಯೇ ಗೊತ್ತಿತ್ತು. ಆದ್ರೆ ಈಗಷ್ಟೇ ಬಹಿರಂಗವಾಗಿ ಅದನ್ನ ಹೇಳಿಕೊಂಡಿದ್ದಾರೆ ಅಷ್ಟೇ.

ಆದ್ರೆ ಆರ್ಸಿಬಿ ಇಲ್ಲಿ ಇನ್ನೊಂದು ಚಾಲೆಂಜ್ ಎದುರಿಸ್ತಾ ಇದೆ. ಡಿಸೆಂಬರ್ 19ಕ್ಕೆ ಐಪಿಎಲ್ ಆಕ್ಷನ್ ನಡೀತಾ ಇದೆ. ಆರ್ಸಿಬಿ ಒಟ್ಟು 11 ಪ್ಲೇಯರ್ಸ್ಗಳನ್ನ ಈಗಾಗ್ಲೇ ರಿಲೀಸ್ ಮಾಡಿದೆ. ಪೇಸ್ ಬೌಲರ್ ಜಾಶ್ ಹೇಜಲ್ವುಡ್ ಇಲ್ಲ, ಸ್ಪಿನ್ನರ್ ಕಂ ಬ್ಯಾಟ್ಸ್ಮನ್ ಹಸರಂಗ ಕೂಡ ಇಲ್ಲ. ಇನ್ನೂ ಆರು ಸ್ಲಾಟ್ಗಳನ್ನ ಆರ್ಸಿಬಿ ಭರ್ತಿ ಮಾಡಬೇಕಿದೆ. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ್ಸ್ನಲ್ಲಿರೋದು 23.25 ಕೋಟಿ ರೂಪಾಯಿ. ಈ ಬಜೆಟ್ನಲ್ಲಿ ಒಟ್ಟು 6 ಮಂದಿ ಪ್ಲೇಯರ್ಸ್ಗಳನ್ನ ಪರ್ಚೇಸ್ ಮಾಡಬೇಕು. ದಿನೇಶ್ ಕಾರ್ತಿಕ್ಗೆ ಬ್ಯಾಕ್ಅಪ್ ಆಗಿ ವಿಕೆಟ್ ಕೀಪರ್ನ ಅಗತ್ಯ ಕೂಡ ಇದೆ. ಇನ್ನು ಸ್ಪಿನ್ನರ್ ವಿಚಾರಕ್ಕೆ ಬಂದ್ರೆ ಮತ್ತೆ ಹಸರಂಗರನ್ನೇ ಕಡಿಮೆ ಮೊತ್ತಕ್ಕೆ ಪರ್ಚೇಸ್ ಮಾಡಿದ್ರೂ ಆಶ್ಚರ್ಯ ಇಲ್ಲ. ಈಗ ರಿಲೀಸ್ ಮಾಡಿದ್ರೂ ಆಕ್ಷನ್ ವೇಳೆ ಮತ್ತೆ ತಂಡಕ್ಕೆ ಸೇರಿಸಿಕೊಳ್ಳಬಾರದು ಅಂತೇನಿಲ್ಲ. ಇನ್ನು ಹೇಜಲ್ವುಡ್ರನ್ನ ರಿಲೀಸ್ ಮಾಡಿರೋದ್ರಿಂದ ಒಬ್ಬ ಎಕ್ಸ್ಪರ್ಟ್ ಡೆತ್ ಬೌಲರ್ನ ಅಗತ್ಯ ಕೂಡ ಇದೆ. ಓಪನಿಂಗ್ ಸ್ಪೆಲ್ನಲ್ಲಿ ಮೊಹಮ್ಮದ್ ಸಿರಾಜ್ಗೆ ಕಂಪನಿ ಕೊಡುವಂಥಾ ಫಾಸ್ಟ್ ಬೌಲರ್ ಬೇಕಿದೆ. ಟೋಟಲಿ, ವಿಕೆಟ್ ಕೀಪರ್, ಸ್ಪಿನ್ನರ್ ಮತ್ತು ಒಬ್ಬ ಡೆತ್ ಬೌಲರ್.. ಒಟ್ಟು ಮೂವರು ಕೀ ಪ್ಲೇಯರ್ಸ್ ಬೇಕೇಬೇಕು. ಯಾವಾಗಲೂ ಆರ್ಸಿಬಿ ಬ್ಯಾಟಿಂಗ್ ಲೈನ್ಅಪ್ ಸ್ಟ್ರಾಂಗ್ ಆಗಿರುತ್ತೆ. ಆದ್ರೆ ಕಳೆದ ಒಂದು ದಶಕದಿಂದ ಬೌಲಿಂಗೇ ಆರ್ಸಿಬಿಯ ವೀಕ್ನೆಸ್. ಆದ್ರೀಗ ಭಾರಿ ಹಣ ಸುರಿದು ಟಾಪ್ ಕ್ಲಾಸ್ ಬೌಲರ್ನ್ನ ಖರೀದಿಸೋದು ಅನುಮಾನವೇ. ಯಾಕಂದ್ರೆ ಪರ್ಸ್ನಲ್ಲಿರೋದು 23.25 ಕೋಟಿ. ಹೀಗಾಗಿ ಆಕ್ಷನ್ ವೇಳೆ ಆರ್ಸಿಬಿ ಯಾರಿಗೆ ಬಲೆ ಬೀಸುತ್ತೆ ಅನ್ನೋದು ಕುತೂಹಲ ಕೆರಳಿಸಿದೆ.