ನೋಡಿರಿ
ನಮ್ಮ ಹೆಣ್ಮಕ್ಕಳ ಮುಂದೆ ಅಮೆರಿಕ ಡಮ್ಮಿ – ಭಾರತೀಯರ ಬಳಿ 24,000 ಟನ್ ಚಿನ್ನ
ದಕ್ಷಿಣ ರಾಜ್ಯಗಳೇ ಗೋಲ್ಡನ್‌ ಸ್ಟಾರ್ಸ್
ಇಡೀ ವಿಶ್ವದಲ್ಲಿರುವ ಒಟ್ಟು ಚಿನ್ನದಲ್ಲಿ ಶೇ.11ರಷ್ಟು ಭಾರತದಲ್ಲೇ ಇದೆ. ವಿಶ್ವದಲ್ಲೇ ಅತಿ ಹೆಚ್ಚು ಚಿನ್ನ ಹೊಂದಿರುವ ದೇಶವೆಂಬ ಹೆಗ್ಗಳಿಕೆ ಕೂಡ ಭಾರತದ್ದು! ಅದಲ್ಲದೇ ಕಳೆದ 4 ವರ್ಷದಲ್ಲಿ 3 ಸಾವಿರ ಟನ್ ಬಂಗಾರ ಹೆಚ್ಚಳವಾಗಿದ್ದು, ದಕ್ಷಿಣ ಭಾರತದಲ್ಲಿಯೇ ಅತಿ ಹೆಚ್ಚು ಗೋಲ್ಡ್‌ ಇದೆ.
‘ವರ್ಲ್ಡ್ ಗೋಲ್ಡ್‌ ಕೌನ್ಸಿಲ್‌’ ವರದಿಯು ವಿಶ್ವದ ವಿವಿಧ ದೇಶಗಳ ಚಿನ್ನದ ದಾಸ್ತಾನು ಕುರಿತಾದ ಅಂಕಿ-ಅಂಶಗಳನ್ನು ಬಹಿರಂಗಪಡಿಸಿದೆ. ಭಾರತದಲ್ಲಿ ಚಿನ್ನವೆಂದರೆ ಕೇವಲ ಸಂಪತ್ತಿನ ಸಂಕೇತವಲ್ಲ. ಅದು ಸಂಪ್ರದಾಯ, ಸಾಂಸ್ಕೃತಿಕ ಮಹತ್ವವನ್ನೂ ಹೊಂದಿದೆ. ಅದರಲ್ಲೂ ಮಹಿಳೆಯರಿಗೂ ಚಿನ್ನಕ್ಕೂ ಬಿಡಿಸಲಾಗದ ನಂಟು. ಸಣ್ಣ ನಾಮಕರಣದಿಂದ ಹಿಡಿದು, ಅದ್ಧೂರಿ ಮದುವೆಗಳವರೆಗೆ ಬಹುತೇಕ ಎಲ್ಲಾ ಕಾರ್ಯಕ್ರಮವಾದರೂ ಅಲ್ಲಿ ಚಿನ್ನಕ್ಕೆ ಇನ್ನಿಲ್ಲದ ಸ್ಥಾನ. ಬಂಗಾರ ಕೇವಲ ತಮಗೆ ಮಾತ್ರವಲ್ಲ, ಮಕ್ಕಳಿಗೆ ಮೊಮ್ಮಕ್ಕಳ ಕಾಲಕ್ಕೂ ಇರಲಿ ಎಂಬುದು ಬಹುತೇಕ ಭಾರತೀಯರ ಲೆಕ್ಕಾಚಾರ. ಹೀಗಾಗಿ ಚಿನ್ನವನ್ನು ಸಂಗ್ರಹಿಸಿಡುವ ಸಂಪ್ರದಾಯ ಬೆಳೆದು ಬಂದಿದೆ. ವರ್ಷದಿಂದ ವರ್ಷಕ್ಕೆ ಭಾರತದಲ್ಲಿ ಚಿನ್ನದ ಸಂಗ್ರಹ ಹೆಚ್ಚುತ್ತಿದೆ. 2020-21ರಲ್ಲಿ ಭಾರತದಲ್ಲಿ ಒಟ್ಟು 21,000 ಟನ್ ಚಿನ್ನವಿತ್ತು. 4 ವರ್ಷದಲ್ಲಿ 3,000 ಟನ್ ಬಂಗಾರ ಹೆಚ್ಚಳವಾಗಿದೆ.
ಜನ್ರಿಗೆ ಅನುಕೂಲವಾದ ಚಿನ್ನದ ಗರಿಷ್ಠ ಮಿತಿ ತೆರವು!
ಭಾರತದಲ್ಲಿ 1968ರಲ್ಲಿ ಜಾರಿಗೊಳಿಸಲಾದ ‘ಚಿನ್ನ ನಿಗ್ರಹ ಕಾಯಿದೆ’ ಅಡಿಯಲ್ಲಿ ಪ್ರತಿ ಕುಟುಂಬಕ್ಕೂ ಚಿನ್ನ ದಾಸ್ತಾನಿಗೆ ಮಿತಿ ಇತ್ತು. ವಿವಾಹಿತ ಮಹಿಳೆಯರು 500 ಗ್ರಾಂ, ಅವಿವಾಹಿತ ಮಹಿಳೆಯರು 250 ಗ್ರಾಂ ಮತ್ತು ಪುರುಷರು 100 ಗ್ರಾಂ. ಚಿನ್ನವನ್ನು ಹೊಂದಿರಬಹುದಿತ್ತು. ಅದನ್ನು ಮೀರಿದರೆ ಭಾರಿ ದಂಡ ಮತ್ತು ತೆರಿಗೆ ವಿಧಿಸಲಾಗುತ್ತಿತ್ತು. ಆದರೆ, 1990ರಲ್ಲಿ ಈ ಕಾಯಿದೆಯನ್ನು ರದ್ದುಪಡಿಸಲಾಗಿದ್ದು, ಒಬ್ಬ ವ್ಯಕ್ತಿ ತನ್ನ ಶಕ್ತಿ ಎಷ್ಟಿದೆ ಅಷ್ಟು ಚಿನ್ನವನ್ನು ಹೊಂದಿರಬಹುದು. ಹೂಡಿಕೆಯ ಮಾರ್ಗವಾಗಿಯೂ ಚಿನ್ನವನ್ನು ಬಳಸಬಹುದು. ಆದರೆ, ಅದರ ಖರೀದಿ ಮತ್ತು ಮೂಲದ ಬಗ್ಗೆ ಸೂಕ್ತ ದಾಖಲೆಯನ್ನು ಹೊಂದಿರಬೇಕು. ಇಲ್ಲದಿದ್ದರೆ ತೆರಿಗೆ ಇಲಾಖೆ ಭಾರಿ ದಂಡ ವಿಧಿಸಲು ಅಥವಾ ಚಿನ್ನವನ್ನು ಅಕ್ರಮ ಸಂಪತ್ತು ಎಂದು ಪರಿಗಣಿಸಿ ವಶಕ್ಕೆ ಪಡೆಯಲು ಅವಕಾಶವಿದೆ.
ದಕ್ಷಿಣ ಭಾರತೀಯರ ಬಳಿಯೇ ಅತಿ ಹೆಚ್ಚು ಬಂಗಾರ!
ಭಾರತದ ಒಟ್ಟಾರೆ ಚಿನ್ನದ ದಾಸ್ತಾನಿನಲ್ಲಿ ಶೇ.40ರಷ್ಟು ಭಾಗವು ದಕ್ಷಿಣ ಭಾರತದಲ್ಲಿದೆ. ಅದರಲ್ಲೂ ತಮಿಳುನಾಡು ಈ ವಿಚಾರದಲ್ಲಿ ಮುಂಚೂಣಿಯಲ್ಲಿದ್ದು, ಇಡೀ ಭಾರತದ ಶೇ.28ರಷ್ಟು ಚಿನ್ನವನ್ನು ಹೊಂದಿದೆ. ವರ್ಷ ಕಳೆದಂತೆ ಈ ಪ್ರಮಾಣ ಹೆಚ್ಚುತ್ತಿದೆ. ಕೇರಳದಲ್ಲೂ ಕೂಡ ಜನರ ಬಳಿ ಹೆಚ್ಚಿನ ಚಿನ್ನ ಇದೆ. ಭಾರತದ ಕುಟುಂಬಗಳಲ್ಲಿ ಇರುವ ಚಿನ್ನ ದೇಶದ ಆರ್ಥಿಕತೆಗೆ ಬಹುದೊಡ್ಡ ಕೊಡುಗೆಯನ್ನು ನೀಡುತ್ತಿದ್ದು, ಚಿನ್ನದ ಪ್ರಮಾಣ ದೇಶದ ಜಿಡಿಪಿಯ ಶೇ.40ರಷ್ಟು ಇದೆ ಎಂದು ಹೇಳಲಾಗಿದೆ. ಇನ್ನು, ಯಾವ ದೇಶದಲ್ಲಿ ಎಷ್ಟು ಚಿನ್ನ ಇದೆ ಎಂಬುದನ್ನು ನೋಡುವುದಾದರೆ
ಯಾವ ದೇಶದಲ್ಲಿ ಎಷ್ಟು ಚಿನ್ನ ಇದೆ ಗೊತ್ತಾ?
ವಿಶ್ವದ ದೊಡ್ಡಣ್ಣ ಅಮೆರಿಕದಲ್ಲಿ 8,000 ಟನ್ ಚಿನ್ನ ಇದ್ದರೆ, ಜರ್ಮನಿಯಲ್ಲಿ 3,300 ಟನ್ ಗೋಲ್ಡ್‌ ಇದೆ. ಇಟಲಿಯಲ್ಲಿ 2,450 ಟನ್ ಬಂಗಾರ ಇದ್ದರೆ, ಫ್ರಾನ್ಸ್‌ನಲ್ಲಿ 2,400 ಟನ್ ಹೊನ್ನು ಇದೆ. ರಷ್ಯಾದಲ್ಲಿ 1900 ಟನ್ ಚಿನ್ನ ಇದೆ. ಈ ಐದು ದೇಶಗಳಲ್ಲಿರುವ ಚಿನ್ನವನ್ನು ಸೇರಿಸಿದರೆ, 18,050 ಟನ್ ಬಂಗಾರ ಆಗಲಿದೆ. ಆದರೆ, ಭಾರತದ ಮಹಿಳೆಯರ ಬಳಿ 24,000 ಟನ್ ಚಿನ್ನ ಇದೆ
