ಹನುಮಂತನಿಗೆ ಗೋಧಿ ಹಿಟ್ಟಿನ ದೀಪ ಹಚ್ಚುವುದರಿಂದ ಏನೆಲ್ಲಾ ಲಾಭ ಗೊತ್ತಾ?

ಶಾಸ್ತ್ರಗಳಲ್ಲಿ ಹನುಮಂತನ ಪೂಜೆಯಲ್ಲಿ ಗೋಧಿ ಹಿಟ್ಟಿನಿಂದ ಮಾಡಿದ ದೀಪವನ್ನು ಬೆಳಗಿಸುವುದು ಅತ್ಯಂತ ಶುಭಕರವೆಂದು ಉಲ್ಲೇಖಿಸಲಾಗಿದೆ. ಗೋಧಿಯು ಸಮೃದ್ಧಿ, ಅನ್ನಪೂರ್ಣೆ ಹಾಗೂ ಶುಭದ ಸಂಕೇತವಾಗಿರುವುದರಿಂದ, ಅದರಿಂದ ತಯಾರಿಸಿದ ದೀಪವನ್ನು ಪವಿತ್ರವೆಂದು ಪರಿಗಣಿಸಲಾಗುತ್ತದೆ. ಹಾಗಿದ್ರೆ ಯಾಕೆ ಹಿಟ್ಟಿನ ದೀಪ ಸಲ್ಲಿಸಬೇಕು ಅನ್ನೋದ್ದನ್ನ ತಿಳಿಯೋಣ.

• ಹಿಟ್ಟಿನ ದೀಪವು ಕೇವಲ ಪೂಜೆಯ ಒಂದು ಭಾಗವಲ್ಲ, ಅದು ಭಕ್ತಿ, ಸಮರ್ಪಣೆ ಮತ್ತು ಶುದ್ಧತೆಯ ಸಂಕೇತವೂ ಆಗಿದೆ. ದೇವಸ್ಥಾನಗಳಲ್ಲಿ ಅಥವಾ ಶುಭ ಸಮಾರಂಭಗಳಲ್ಲಿ ಹಿಟ್ಟಿನ ದೀಪವನ್ನು ಬೆಳಗಿಸುವ ಸಂಪ್ರದಾಯ ಅನಾದಿ ಕಾಲದಿಂದ ನಡೆದುಕೊಂಡು ಬಂದಿದೆ. ಹನುಮಂತನಿಗೆ ಈ ದೀಪವನ್ನು ಅರ್ಪಿಸುವುದರಿಂದ ಮನಸ್ಸಿನ ಭಯ, ಆತಂಕ ಹಾಗೂ ನಕಾರಾತ್ಮಕ ಚಿಂತನೆಗಳು ದೂರವಾಗುತ್ತವೆ ಎಂಬ ನಂಬಿಕೆ ಇದೆ.
• ಯಾವುದೇ ಪ್ರಮುಖ ಕಾರ್ಯದಲ್ಲಿ ಯಶಸ್ಸು ಸಿಗಲಿ ಅಥವಾ ಬಹಳ ದಿನಗಳಿಂದ ಅಪೂರ್ಣವಾಗಿರುವ ಆಸೆ ನೆರವೇರಲಿ ಎಂದು ಬಯಸುವವರು ಗೋಧಿ ಹಿಟ್ಟಿನಿಂದ ದೀಪ ತಯಾರಿಸಿ, ಅದರಲ್ಲಿ ಎಳ್ಳೆಣ್ಣೆ ಅಥವಾ ಸಾಸಿವೆ ಎಣ್ಣೆ ಹಾಗೂ ಹತ್ತಿಯ ಬತ್ತಿಯನ್ನು ಹಾಕಿ ಹನುಮಂತನ ಸನ್ನಿಧಿಯಲ್ಲಿ ಬೆಳಗಿಸಬಹುದು. ಪೂಜೆಯ ನಂತರ ಹನುಮಾನ್ ಚಾಲೀಸಾ ಅಥವಾ ಬಜರಂಗ್ ಬಾಣವನ್ನು ಭಕ್ತಿಯಿಂದ ಪಠಿಸುವುದು ಇನ್ನಷ್ಟು ಶುಭಕರವೆಂದು ಪರಿಗಣಿಸಲಾಗುತ್ತದೆ.
• ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ ಹನುಮಂತನ ಆರಾಧನೆಯು ಶನಿದೇವರ ಅಶುಭ ಪ್ರಭಾವವನ್ನು ಕಡಿಮೆ ಮಾಡುತ್ತದೆ ಎನ್ನಲಾಗುತ್ತದೆ. ಆದ್ದರಿಂದ ಶನಿವಾರದಂದು ಹನುಮಾನ್ ದೇವಸ್ಥಾನಕ್ಕೆ ಭೇಟಿ ನೀಡಿ ಹಿಟ್ಟಿನ ದೀಪವನ್ನು ಬೆಳಗಿಸುವುದರಿಂದ ಸಾಡೇಸಾತಿ, ಶನಿ ಧೈಯ ಹಾಗೂ ಶನಿ ದೋಷದಿಂದ ಉಂಟಾಗುವ ತೊಂದರೆಗಳು ಕಡಿಮೆಯಾಗುತ್ತವೆ ಎಂಬ ಧಾರ್ಮಿಕ ನಂಬಿಕೆಯಿದೆ.
• ಮನೋಕಾಮನೆ ಈಡೇರಬೇಕೆಂದು ಬಯಸುವವರು ಸತತ ಐದು ಶನಿವಾರಗಳ ಕಾಲ ಹನುಮಂತನ ದೇವಸ್ಥಾನದಲ್ಲಿ ಪಂಚಮುಖ ದೀಪವನ್ನು ಬೆಳಗಿಸುವ ಆಚರಣೆಯನ್ನು ಪಾಲಿಸುತ್ತಾರೆ. ಇದರಿಂದ ಮನದಾಸೆಗಳು ನೆರವೇರುವುದರ ಜೊತೆಗೆ ಜಾತಕದಲ್ಲಿರುವ ಮಂಗಳ ದೋಷದ ಪ್ರಭಾವವೂ ಕಡಿಮೆಯಾಗುತ್ತದೆ ಎಂದು ನಂಬಲಾಗಿದೆ.
• ಸಾಲದ ಬಾಧೆ, ಆದಾಯದ ಕೊರತೆ ಅಥವಾ ಹಣಕಾಸಿನ ಸಮಸ್ಯೆಗಳಿಂದ ಬಳಲುತ್ತಿರುವವರು ಗೋಧಿ ಹಿಟ್ಟಿನ ದೀಪದಲ್ಲಿ ಮಲ್ಲಿಗೆ ಎಣ್ಣೆ ಅಥವಾ ಎಳ್ಳೆಣ್ಣೆ ಹಾಕಿ, ದೊಡ್ಡ ಎಲೆಗಳ ಮೇಲೆ ಐದು ದೀಪಗಳನ್ನು ಇಟ್ಟು ಹನುಮಂತನ ದೇವಸ್ಥಾನದಲ್ಲಿ ಬೆಳಗಿಸುವ ಪದ್ಧತಿಯನ್ನು ಅನುಸರಿಸುತ್ತಾರೆ. ಇದನ್ನು ಸತತ 11 ಶನಿವಾರಗಳ ಕಾಲ ಭಕ್ತಿಯಿಂದ ಮಾಡಿದರೆ ಆರ್ಥಿಕ ಸ್ಥಿತಿ ಸುಧಾರಿಸುತ್ತದೆ ಮತ್ತು ಸಾಲದ ಬಾಧೆ ಕಡಿಮೆಯಾಗುತ್ತದೆ ಎಂಬ ಧಾರ್ಮಿಕ ನಂಬಿಕೆ ಇದೆ.