ನೋಡಿರಿ
WWE ಸ್ಟಾರ್ 36 ವರ್ಷದ ಬ್ರೇ ವ್ಯಾಟ್ ಹೃದಯಾಘಾತಕ್ಕೆ ಬಲಿ – ದೈತ್ಯ ಪ್ರತಿಭೆಯನ್ನ ಕಳೆದುಕೊಂಡು ಕುಸ್ತಿ ಲೋಕದ ಕಂಬನಿ
ವರ್ಲ್ಡ್ ವ್ರೆಸ್ಲಿಂಗ್ ಎಂಟರ್‌ಟೈನ್‌ಮೆಂಟ್ (WWE) ಸ್ಟಾರ್ ಬ್ರೇ ವ್ಯಾಟ್ ನಿಧನರಾಗಿದ್ದಾರೆ. ಕೇವಲ 36 ವರ್ಷ ವಯಸ್ಸಿಗೆ ಇಹಲೋಕ ತ್ಯಜಿಸಿದ್ದು, ಅಭಿಮಾನಿಗಳು ಆಘಾತಗೊಂಡಿದ್ದಾರೆ. ಹೃದಯಾಘಾತಕ್ಕೆ ತುತ್ತಾಗಿ ವ್ಯಾಟ್ ಸಾವನ್ನಪ್ಪಿದ್ದಾರೆ ಎಂದು ಕಂಪನಿಯ ಮುಖ್ಯ ವಿಷಯ ಅಧಿಕಾರಿ ಪಾಲ್ ‘ಟ್ರಿಪಲ್ ಹೆಚ್’ ಲೆವೆಸ್ಕ್ ಸಾಮಾಜಿಕ ಮಾಧ್ಯಮದಲ್ಲಿ ಘೋಷಿಸಿದ್ದಾರೆ. ಪಾಲ್ ಲೆವೆಸ್ಕ್ ಟ್ವಿಟರ್ ನಲ್ಲಿ ಪೋಸ್ಟ್ ಮಾಡಿದ್ದಾರೆ. ವ್ಯಾಟ್, ಇಂದು ಅನಿರೀಕ್ಷಿತವಾಗಿ ನಿಧನರಾಗಿದ್ದು, ನಮ್ಮ ಆಲೋಚನೆಗಳು ಅವರ ಕುಟುಂಬದೊಂದಿಗೆ ಇರಲಿದ್ದು, ಈ ಸಮಯದಲ್ಲಿ ಪ್ರತಿಯೊಬ್ಬರೂ ಅವರ ಗೌಪ್ಯತೆಯನ್ನು ಗೌರವಿಸಬೇಕೆಂದು ನಾವು ಕೇಳಿಕೊಳ್ಳುತ್ತೇವೆ ಎಂದು ಟ್ವೀಟ್ ಮಾಡಿದ್ದಾರೆ.
ಇದನ್ನೂ ಓದಿ : ಅಮೆರಿಕ ಇತಿಹಾಸದಲ್ಲಿಯೇ ಮೊದಲ ಪ್ರಕರಣ – ಮಾಜಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅರೆಸ್ಟ್‌
ದೀರ್ಘಕಾಲದಿಂದ ಅನಾರೋಗ್ಯದ ಸಮಸ್ಯೆಗೆ ಒಳಗಾಗಿದ್ದ ವ್ಯಾಟ್, ಕೆಲ ತಿಂಗಳ ಹಿಂದಷ್ಟೇ ರಿಂಗ್ನಿಂದ ಹೊರಗುಳಿದಿದ್ದರು. ಇಡೀ ಕುಸ್ತಿ ಲೋಕವೇ ಅವರ ನಿಧನಕ್ಕೆ ಕಂಬನಿ ಮಿಡಿದಿದೆ. WWE ಹಾಲ್‌ ಆಫ್‌ ಫೇಮರ್‌ ಮೈಕ್‌ ರೊಟುಂಡಾ ಅವರಿಂದ ಈಗಷ್ಟೇ ಕರೆ ಬಂದಿದ್ದು, ಅವರು ನಮ್ಮ WWE ಕುಟುಂಬದ ಜೀವಿತಾವಧಿ ವಿಂಡ್‌ಹ್ಯಾಮ್‌ ರೊಟುಂಡಾ ಎಂದೂ ಕರೆಯಲ್ಪಡುವ ಬ್ರೇ ವ್ಯಾಟ್ ಇಂದು ಮುಂಜಾನೆ ಅನಿರೀಕ್ಷಿತವಾಗಿ ನಿಧನರಾಗಿದ್ದಾರೆ ಎಂಬ ದುರಂತ ಸುದ್ದಿಯನ್ನು ನಮಗೆ ತಿಳಿಸಿದರು. ನಾವು ಅವರ ಕುಟುಂಬದ ಜೊತೆಗೆ ಇದ್ದೇವೆ. ಅವರ ಗೌಪ್ಯತೆಯನ್ನು ಗೌರವಿಸಬೇಕೆಂದು ನಾವು ಕೇಳುತ್ತೇವೆ ಎಂದು ಎಕ್ಸ್ನಲ್ಲಿ (ಟ್ವಿಟರ್) ಪ್ರಕಟಿಸಿದ್ದಾರೆ.
2009ರಿಂದ ಡಬ್ಲ್ಯುಡಬ್ಲ್ಯುಇ ಅಖಾಡದಲ್ಲಿ ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದ ಅವರು, 2021 ಮತ್ತು 2022ರ ಅವಧಿಯಲ್ಲಿ ಒಂದೂವರೆ ವರ್ಷ ದೂರ ಉಳಿದಿದ್ದರು. ಅವರ ದೂರ ಇರುವಿಕೆಯಿಂದ ಟಿವಿ ರೇಟಿಂಗ್ನಲ್ಲಿ ಏರುಪೇರು ಕಂಡಿತ್ತು. ಜೊತೆಗೆ ಅಭಿಮಾನಿಗಳ ಒತ್ತಾಯದ ಮೇರೆಗೆ ನಂತರ 2022ರ ಸೆಪ್ಟೆಂಬರ್‌ನಲ್ಲಿ ವ್ಯಾಟ್ ಡಬ್ಲ್ಯುಡಬ್ಲ್ಯುಇಗೆ ವಾಪಸಾದರು. ಆದರೆ, ಇದೇ ವರ್ಷ ಫೆಬ್ರವರಿಯಲ್ಲಿ ಮತ್ತೆ ರಿಂಗ್ನಿಂದ ಹೊರಗುಳಿದಿದ್ದರು.
ವ್ಯಾಟ್ WWEನಲ್ಲಿ ಮೂರು ಬಾರಿ ವಿಶ್ವ ಚಾಂಪಿಯನ್ ಆಗಿದ್ದಾರೆ. WWE ಚಾಂಪಿಯನ್ಶಿಪ್ ಜೊತೆಗೆ ಎರಡು ಬಾರಿ ಯೂನಿವರ್ಸಲ್ ಚಾಂಪಿಯನ್ಶಿಪ್ ಅನ್ನೂ ಗೆದ್ದುಕೊಂಡಿದ್ದಾರೆ. ಆಗಸ್ಟ್ 2018 ರಿಂದ ಏಪ್ರಿಲ್ 2019 ರವರೆಗೂ ಅವರು ವಿರಾಮ ಪಡೆದಿದ್ದರು. ನಂತರ ದಿ ಫೈಂಡ್ ಎಂಬ ಹೊಸ ಪಾತ್ರದೊಂದಿಗೆ ಮರಳಿದ್ದರು.
