71ನೇ ವರ್ಷದ ಕನ್ನಡ ರಾಜ್ಯೋತ್ಸವ ಸಂಭ್ರಮ! – ಕನ್ನಡವೇ ನಮ್ಮ ಹೆಮ್ಮೆ… ಕರ್ನಾಟಕವೇ ನಮ್ಮ ಉಸಿರು!

ಒಂದು ಭಾಷೆ ಅಂದ್ರೆ ಕೇವಲ ಮಾತನಾಡುವ ಪದಗಳಲ್ಲ… ಅದು ನಮ್ಮ ಇತಿಹಾಸ, ಸಂಸ್ಕೃತಿ, ಪರಂಪರೆ ಮತ್ತು ನಮ್ಮ ಅಸ್ಮಿತೆ! ಒಂದೇ ಭಾಷೆಯ ಜನರು ಒಂದೇ ರಾಜ್ಯದಲ್ಲಿ ಬದುಕಬೇಕು ಎಂಬ ಕನಸಿಗೆ ಸಾಕಾರ ರೂಪ ಸಿಕ್ಕ ದಿನವೇ ನವೆಂಬರ್ 1. ಹೌದು, ಇಂದು ನಮ್ಮ ಹೆಮ್ಮೆಯ ಕನ್ನಡ ರಾಜ್ಯೋತ್ಸವ!

1956ರ ನವೆಂಬರ್ 1ರಂದು ಕನ್ನಡ ಮಾತನಾಡುವ ಪ್ರದೇಶಗಳನ್ನು ಒಗ್ಗೂಡಿಸಿ ಮೈಸೂರು ರಾಜ್ಯವನ್ನು ರಚಿಸಲಾಯಿತು. ಹಲವು ವರ್ಷಗಳ ಹೋರಾಟ, ಕನ್ನಡಿಗರ ಏಕತೆಯ ಕನಸು ಈ ಮೂಲಕ ನನಸಾಯಿತು. ನಂತರ 1973ರ ನವೆಂಬರ್ 1ರಂದು ಮೈಸೂರು ರಾಜ್ಯಕ್ಕೆ ಕರ್ನಾಟಕ ಎಂದು ಮರುನಾಮಕರಣ ಮಾಡಲಾಯಿತು. ಈ ವರ್ಷ ರಾಜ್ಯ ಏಕೀಕರಣಕ್ಕೆ 71 ವರ್ಷಗಳ ಸಂಭ್ರಮ!

ಇಂದು ರಾಜ್ಯದಾದ್ಯಂತ ಕೆಂಪು-ಹಳದಿ ಬಾವುಟಗಳು ರಾರಾಜಿಸುತ್ತಿವೆ.  ಕನ್ನಡ ಗೀತೆಗಳು ಮೊಳಗುತ್ತಿವೆ. ಸಾಂಸ್ಕೃತಿಕ ಕಾರ್ಯಕ್ರಮಗಳು, ಮೆರವಣಿಗೆಗಳು ಹಾಗೂ ಕನ್ನಡ ನಾಡು-ನುಡಿಗೆ ಸೇವೆ ಸಲ್ಲಿಸಿದ ಸಾಧಕರಿಗೆ ರಾಜ್ಯೋತ್ಸವ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮಗಳು ನಡೆಯುತ್ತಿವೆ.

ಆದರೆ ಕನ್ನಡ ರಾಜ್ಯೋತ್ಸವ ಅಂದರೆ ಕೇವಲ ಬಾವುಟ ಹಾರಿಸುವುದು, ಸಿಹಿ ಹಂಚುವುದಷ್ಟೇ ಅಲ್ಲ. ನಮ್ಮ ದಿನನಿತ್ಯದ ಬದುಕಿನಲ್ಲಿ ಕನ್ನಡಕ್ಕೆ ಆದ್ಯತೆ ನೀಡುವುದು, ಕನ್ನಡ ಪುಸ್ತಕಗಳನ್ನು ಓದುವುದು, ನಮ್ಮ ಭಾಷೆ ಮತ್ತು ಸಂಸ್ಕೃತಿಯನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವುದೂ ಅಷ್ಟೇ ಮುಖ್ಯ.

ನಮ್ಮ ನಾಡಿನ ಇತಿಹಾಸವನ್ನು ನೆನಪಿಸಿಕೊಳ್ಳೋಣ, ಕನ್ನಡದ ಹೆಮ್ಮೆಯನ್ನು ಜಗತ್ತಿಗೆ ಸಾರೋಣ. ಎಲ್ಲ ಕನ್ನಡಿಗರಿಗೂ 71ನೇ ಕನ್ನಡ ರಾಜ್ಯೋತ್ಸವದ ಹಾರ್ದಿಕ ಶುಭಾಶಯಗಳು!