ನೋಡಿರಿ
ಮುಂದುವರಿದ ಇರಾನ್ VS ಅಮೆರಿಕ ಇಸ್ರೇಲ್ ಕದನ – ದುಬೈ ಮೇಲೆ ದಾಳಿ, ಯುಎಸ್ ರಾಯಭಾರ ಕಚೇರಿಗೆ ಡ್ರೋನ್ ಡಿಕ್ಕಿ
ಇರಾನ್ ಹಾಗೂ ಅಮೆರಿಕ, ಇಸ್ರೇಲ್ ನಡುವಿನ ಕದನ ಮುಂದುವರಿದಿದ್ದು, ಇರಾನ್ ದುಬೈ ಮೇಲೆ ದಾಳಿ ನಡೆಸಿದ್ದು, ದುಬೈನ ಹಣಕಾಸು ಕೇಂದ್ರದಲ್ಲಿರುವ ಕಟ್ಟಡವೊಂದು ದಾಳಿಯ ಅವಶೇಷಗಳಿಂದ ಹಾನಿಗೊಳಗಾಗಿದೆ. ಅಂತಾರಾಷ್ಟ್ರೀಯ ಹಣಕಾಸು ಕೇಂದ್ರದಲ್ಲಿ ಸ್ಫೋಟದ ಶಬ್ದ ಕೇಳಿ ಬಂದಿದೆ. ಯುನೈಟೆಡ್ ಅರಬ್ ಎಮಿರೇಟ್ಸ್ ನಗರದ ಪ್ರಮುಖ ರಸ್ತೆಯಾದ ಶೇಖ್ ಜಾಯೆದ್ ರಸ್ತೆಯ ದಿಕ್ಕಿನಿಂದ ಸೈರನ್ಗಳು ಕೇಳಿಬರುತ್ತಿದ್ದವು ಎಂದು ಜನರು ತಿಳಿಸಿದ್ದಾರೆ. ವರದಿಗಳ ಪ್ರಕಾರ, ಘಟನೆಯ ನಂತರ ದುಬೈ ಪೊಲೀಸರು ಆ ಪ್ರದೇಶವನ್ನು ಸುತ್ತುವರೆದಿದ್ದಾರೆ.
ಬಾಗ್ದಾದ್ನಲ್ಲಿರುವ ಯುಎಸ್ ರಾಯಭಾರ ಕಚೇರಿಯ ಮೇಲೆ ಡ್ರೋನ್ ದಾಳಿ ನಡೆಸಲಾಗಿದೆ. ರಾಯಭಾರ ಕಚೇರಿಗೆ ಡ್ರೋನ್ ಡಿಕ್ಕಿ ಹೊಡೆದಿದೆ” ಎಂದು ಅಧಿಕಾರಿ ಹೇಳಿದರು, ಎರಡನೇ ಭದ್ರತಾ ಮೂಲವು ರಾಜತಾಂತ್ರಿಕ ಕಾರ್ಯಾಚರಣೆಯನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಲಾಗಿದೆ ಎಂದು ದೃಢಪಡಿಸಿದೆ. ಇರಾನ್ ಬೆಂಬಲಿತ ಪ್ರಬಲ ಗುಂಪು ಕಟೇಬ್ ಹೆಜ್ಬೊಲ್ಲಾವನ್ನು ಗುರಿಯಾಗಿಸಿಕೊಂಡು ಎರಡು ದಾಳಿಗಳು ನಡೆದಿದ್ದು, “ಪ್ರಮುಖ ವ್ಯಕ್ತಿ” ಸೇರಿದಂತೆ ಇಬ್ಬರು ಸದಸ್ಯರು ಸಾವನ್ನಪ್ಪಿದ್ದಾರೆ ಎಂದು ಭದ್ರತಾ ಮೂಲಗಳು ತಿಳಿಸಿವೆ.
ಇದನ್ನೂ ಓದಿ: ಗಂಡನ ಜೊತೆ ಜಗಳ ಮಾಡಿಕೊಂಡು ಸಾಯಲು ಹೊರಟ ಪತ್ನಿ! – ತಮಾಷೆ ಮಾಡ್ತಿದ್ದಾಳೆ ಎಂದು ವಿಡಿಯೋ ಮಾಡಿದ ಪತಿರಾಯ!
“ಶುಕ್ರವಾರ ಬೆಳಗಿನ ಜಾವ 02:15 ಕ್ಕೆ (2315 GMT), ಕಟೇಬ್ ಹೆಜ್ಬೊಲ್ಲಾ ಬಳಸುತ್ತಿದ್ದ ಮನೆಯ ಮೇಲೆ ಕ್ಷಿಪಣಿ ಅಪ್ಪಳಿಸಿತು” ಎಂದು ಭದ್ರತಾ ಮೂಲಗಳು ತಿಳಿಸಿವೆ. ಅಸೋಸಿಯೇಟೆಡ್ ಪ್ರೆಸ್ ಸುದ್ದಿ ಸಂಸ್ಥೆಯ ಪ್ರಕಾರ, ಬಾಗ್ದಾದ್ನಲ್ಲಿರುವ ಯುಎಸ್ ರಾಯಭಾರ ಕಚೇರಿಯ ಆವರಣದೊಳಗಿನ ಹೆಲಿಪ್ಯಾಡ್ಗೆ ಕ್ಷಿಪಣಿ ಅಪ್ಪಳಿಸಿತು. ಬಹ್ರೈನ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ, ಒಮಾನ್ನಲ್ಲಿರುವ ತೈಲ ಬಂದರು ಮತ್ತು ಇರಾಕಿನ ಜಲಪ್ರದೇಶದಲ್ಲಿರುವ 2 ಹಡಗುಗಳನ್ನು ಗುರಿಯಾಗಿಸಿ ಇರಾನ್ ದಾಳಿ ನಡೆಸಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ ಒಮಾನ್ನ ಮಿನಾ ಅಲ್ ಫಹಲ್ ತೈಲ ಬಂದರನ್ನು ಸ್ಥಳಾಂತರಿಸಲಾಗಿದೆ. ದುಬೈ ಏರ್ಪೋರ್ಟ್ ಸನಿಹ 2 ಡ್ರೋನ್ ಬಿದ್ದಿವೆ. ಕುವೈತ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೇಲೆ ಹಲವಾರು ಡ್ರೋನ್ಗಳು ದಾಳಿ ಮಾಡಿವೆ. ದಾಳಿಯಿಂದ ಕಟ್ಟಡಕ್ಕೆ ಮಾತ್ರ ಹಾನಿಯಾಗಿದೆ.
