ಡೆಲ್ಲಿಗಾಗಿ ಗೋಡೆ-ದಾದಾ ಒಂದಾದ್ರಾ? – ರಿಕಿಗೆ ಕೊಕ್.. ದ್ರಾವಿಡ್ DC ಕೋಚ್?
ತಂಡದ ಫೇಲ್ಯೂರ್ಗೆ ಮೊದಲ ತಲೆದಂಡ

2024ರ ಐಪಿಎಲ್ ಇತ್ತೀಚೆಗಷ್ಟೇ ಮುಗಿದಿದ್ರೂ ಕೂಡ ಎಲ್ಲಾ ಫ್ರಾಂಚೈಸಿಗಳ ಚಿತ್ತ 2025ರ ಐಪಿಎಲ್ನತ್ತ ನೆಟ್ಟಿದೆ. ಚಾಂಪಿಯನ್ ಪಟ್ಟದ ಮೇಲೆ ಕಣ್ಣಿಟ್ಟಿದ್ದು ಈಗಾಗಲೇ ಮೇಜರ್ ಸರ್ಜರಿಗಳನ್ನ ಶುರು ಮಾಡಿವೆ. ಅದ್ರಲ್ಲೂ ಈಗ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಹೆಡ್ ಕೋಚ್ ಸ್ಥಾನದಿಂದ ರಿಕಿ ಪಾಂಟಿಂಗ್ಗೆ ಗೇಟ್ಪಾಸ್ ನೀಡಲಾಗಿದೆ. 2018 ರಿಂದ 7 ಸೀಸನ್‌ಗಳ ಕಾಲ ಡೆಲ್ಲಿ ಫ್ರಾಂಚೈಸಿ ಪರ ಸೇವೆ ಸಲ್ಲಿಸಿದ್ದ ಆಸ್ಟ್ರೇಲಿಯಾದ ಮಾಜಿ ನಾಯಕ ರಿಕಿ ಪಾಂಟಿಂಗ್ ಹೆಡ್ಕೋಚ್ ಹುದ್ದೆಯಿಂದ ಕೆಳಗಿಳಿದಿದ್ದಾರೆ. ಪಾಂಟಿಂಗ್ ಅಧಿಕಾರಕ್ಕೇರಿದ ಮೊದಲ ವರ್ಷವೇ ಪಾಯಿಂಟ್ಸ್ ಟೇಬಲ್ನಲ್ಲಿ ಕೊನೇ ಸ್ಥಾನ ಪಡೆದಿತ್ತು. ಬಳಿಕ ಡಿಸಿ 2019, 2020 ಮತ್ತು 2021 ರಲ್ಲಿ ಪ್ಲೇಆಫ್ಗೆ ಅರ್ಹತೆ ಪಡೆದಿತ್ತು. 2020ರಲ್ಲಿ ಡೆಲ್ಲಿ ಫೈನಲ್ ಪ್ರವೇಶಿಸಿತ್ತಾದರೂ ಕಪ್ ಗೆಲ್ಲಲು ವಿಫಲವಾಗಿತ್ತು. ಮುಂಬೈ ಇಂಡಿಯನ್ಸ್ ವಿರುದ್ಧ ಸೋತು ರನ್ನರ್ಅಪ್ ಆಗಿತ್ತು. ಆದ್ರೆ ಇತ್ತೀಚಿನ ಸೀಸನ್ಗಳಲ್ಲಿ ತಂಡ ಹೆಣಗಾಡುತ್ತಿದೆ. ಕಳೆದ 3 ಸೀಸನ್ಗಳಲ್ಲೂ ಪ್ಲೇಆಫ್ಗೂ ಎಂಟ್ರಿ ಕೊಟ್ಟಿಲ್ಲ. 2024ರ ಸೀಸನ್ನಲ್ಲಿ ಏಳನೇ ಸ್ಥಾನ ಪಡೆದಿತ್ತು. ತಂಡದ ಕಳಪೆ ಪ್ರದರ್ಶನದಿಂದಲೇ ಈ ತೀರ್ಮಾನ ಕೈಗೊಳ್ಳಲಾಗಿದೆ ಅಂತಾ ಸೌರವ್ ಗಂಗೂಲಿ ಬಹಿರಂಗಪಡಿಸಿದ್ದಾರೆ. ಈ ವಿಚಾರ ಹೊರಬಿದ್ದಿದ್ದೆ ತಡ, ಚಾಂಪಿಯನ್ ಕೋಚ್ ರಾಹುಲ್ ದ್ರಾವಿಡ್ ಡೆಲ್ಲಿ ಕ್ಯಾಪಿಟಲ್ಸ್ ಸೇರ್ತಾರಾ ಎಂಬ ಚರ್ಚೆ ಶುರುವಾಗಿದೆ. ಇದಕ್ಕೆ ಕಾರಣ ಡೆಲ್ಲಿ ಕ್ಯಾಪಿಟಲ್ಸ್ನ ಡೈರೆಕ್ಟರ್ ಸೌರವ್ ಗಂಗೂಲಿ. ಗಂಗೂಲಿಯ ಈ ಒಂದು ಮಾತು ಭಾರೀ ಬಿಸಿಬಿಸಿ ಚರ್ಚೆಗೆ ಕಾರಣವಾಗಿದೆ. ಐಪಿಎಲ್ ಸೀಸನ್-18ರ ಆರಂಭಕ್ಕೆ ಬರೋಬ್ಬರಿ 8 ತಿಂಗಳು ಬಾಕಿಯಿದೆ. ಡಿಸೆಂಬರ್ ಆರಂಭದಲ್ಲಿ ಮೆಗಾ ಹರಾಜು ನಡೆಯಲಿದೆ. ಅದಕ್ಕೂ ಮುನ್ನವೇ ಐಪಿಎಲ್ ತಂಡಗಳಲ್ಲಿ ಬದಲಾವಣೆ ಪರ್ವ ಶುರುವಾಗಿದೆ.

ದ್ರಾವಿಡ್ ಗೆ ಭರ್ಜರಿ ಡಿಮ್ಯಾಂಡ್!

ರಿಕಿ ಪಾಂಟಿಂಗ್ಗೆ ಗೇಟ್ ಪಾಸ್ ನೀಡಿದ ಬೆನ್ನಲ್ಲೇ ಡೆಲ್ಲಿ ಕ್ಯಾಪಿಟಲ್ಸ್ ಮುಂದಿನ ಕೋಚ್ ಯಾರ್ ಆಗ್ತಾರೆ ಎಂಬ ಪ್ರಶ್ನೆ ಹುಟ್ಟಿಕೊಂಡಿದೆ. ಡೆಲ್ಲಿ ಫ್ರಾಂಚೈಸಿಯ ಡೈರೆಕ್ಟರ್ ಆಫ್ ಆಪರೇಶನಲ್ ಹೆಡ್ ಸೌರವ್ ಗಂಗೂಲಿ ನೀಡಿರುವ ಒಂದು ಹೇಳಿಕೆ, ಟೀಮ್ ಇಂಡಿಯಾದ ಮಾಜಿ ಕೋಚ್ ರಾಹುಲ್ ದ್ರಾವಿಡ್, ಡೆಲ್ಲಿ ತಂಡದ ಕೋಚ್ ಹುದ್ದೆಗೇರ್ತಾರಾ ಎಂಬ ಅನುಮಾನ ಹುಟ್ಟಿ ಹಾಕಿದೆ. ನಾನು 2025ರ ಐಪಿಎಲ್ಗೆ ಯೋಜನೆ ರೂಪಿಸಬೇಕಿದೆ. ಒಮ್ಮೆಯಾದ್ರೂ ಡೆಲ್ಲಿ ಕ್ಯಾಪಿಟಲ್ಸ್ ಐಪಿಎಲ್ ಟ್ರೋಫಿ ಗೆಲ್ಲಲು ಬಯಸುತ್ತೇನೆ. ಮೆಗಾ ಹರಾಜು ನಡೆಯಲಿದ್ದು, ಈಗಿನಿಂದ ಯೋಜನೆ ರೂಪಿಸಲು ಮುಂದಾಗಿದ್ದೇನೆ. ರಿಕಿ ಪಾಂಟಿಂಗ್ ಡೆಲ್ಲಿ ಕ್ಯಾಪಿಟಲ್ಸ್ ಕೋಚ್ ಆಗಿರುವುದಿಲ್ಲ. ನಾನು ಫ್ರಾಂಚೈಸಿ ಜೊತೆ ಮಾತನಾಡಬೇಕು. ಹುದ್ದೆಗೆ ಭಾರತೀಯ ಕೋಚ್ನ ನೋಡಲು ಕೇಳಬೇಕು ಎಂದಿದ್ದಾರೆ ಗಂಗೂಲಿ. ಗಂಗೂಲಿ ನೀಡಿರುವ ಭಾರತೀಯ ಕೋಚ್ನ ನೋಡಬೇಕು ಎಂಬ ಹೇಳಿಕೆಯೇ ಹೊಸ ಚರ್ಚೆಗೆ ಕಾರಣವಾಗಿದೆ. ಟೀಮ್ ಇಂಡಿಯಾಗೆ ವಿಶ್ವಕಪ್ ಗೆಲ್ಲಿಸಿಕೊಟ್ಟ ರಾಹುಲ್ ದ್ರಾವಿಡ್ಗೆ ಸಿಕ್ಕಾಪಟ್ಟೆ ಡಿಮ್ಯಾಂಡ್ ಶುರುವಾಗಿದ್ದು, ಗಂಗೂಲಿ ಕೂಡ ಗಾಳ ಹಾಕ್ತಾರಾ ಅನ್ನೋ ಚರ್ಚೆ ಶುರುವಾಗಿದೆ. ರಾಹುಲ್ ದ್ರಾವಿಡ್ ಕೂಡ ಈ ಹಿಂದೆ ಡೆಲ್ಲಿ ಡೇರ್ಡೆವಿಲ್ಸ್ ತಂಡದ ಮೆಂಟರ್ ಆಗಿದ್ರು. 2 ವರ್ಷಗಳ ಕಾಲ ತಂಡದ ಮೆಂಟರ್ ಆಗಿ ಫ್ರಾಂಚೈಸಿ ಜೊತೆಗೆ ಕೆಲಸ ಮಾಡಿದ್ದಾರೆ. ಮ್ಯಾನೇಜ್ಮೆಂಟ್ ತಂಡದ ವಾತಾವರಣ ಹಾಗೂ ಕೆಲ ಆಟಗಾರರ ಜೊತೆಗೆ ದ್ರಾವಿಡ್ ಉತ್ತಮ ಒಡನಾಟ ಹೊಂದಿದ್ದಾರೆ. ಹೀಗಾಗಿ ದ್ರಾವಿಡ್ ಕೋಚ್ ಆದ್ರೆ, ತಂಡಕ್ಕೆ ಪ್ಲಸ್ ಪಾಯಿಂಟ್ ಆಗಲಿದೆ. ಅಲ್ದೇ ಗೌತಮ್ ಗಂಭೀರ್ ತೆರವಿನಿಂದ ಹಾಲಿ ಚಾಂಪಿಯನ್ ಕೆಕೆಆರ್ ಮೆಂಟರ್ ಸ್ಥಾನವೂ ಖಾಲಿ ಇದೆ. ಹೀಗಾಗಿ ಶಾರುಖ್ ಖಾನ್ ಕೂಡ ದ್ರಾವಿಡ್ಗೆ ಆಫರ್ ಮಾಡಿದ್ದಾರೆ ಎನ್ನಲಾಗಿದೆ. ಟಿ20 ವಿಶ್ವಕಪ್ ಗೆಲ್ಲಿಸಿಕೊಟ್ಟ ರಾಹುಲ್ ದ್ರಾವಿಡ್ಗೆ ಐಪಿಎಲ್ನಲ್ಲಿ ಭರ್ಜರಿ ಡಿಮ್ಯಾಂಡ್ ಶುರುವಾಗಿದೆ.

ಅಸಲಿಗೆ ರಾಹುಲ್ ದ್ರಾವಿಡ್ ಆ್ಯಂಡ್ ಸೌರವ್ ಗಂಗೂಲಿ ಭಾರತೀಯ ಕ್ರಿಕೆಟ್ ಕಂಡ ದಿಗ್ಗಜ ಆಟಗಾರರು. ಈ ಇಬ್ಬರು ಟೀಮ್ ಇಂಡಿಯಾಗೆ ನೀಡಿದ ಕೊಡುಗೆ ಅಪಾರ. ಎಲ್ಲಕ್ಕಿಂತ ಹೆಚ್ಚಾಗಿ ಆಪ್ತ ಸ್ನೇಹಿತರು. ಈ ರಾಹುಲ್ ದ್ರಾವಿಡ್, ಟೀಮ್ ಇಂಡಿಯಾದ ಹೆಡ್ ಕೋಚ್ ಆಗಲು ಮುಖ್ಯ ಕಾರಣವೇ ಸೌರವ್ ಗಂಗೂಲಿ. ಅಂದು ಬಿಸಿಸಿಐ ಅಧ್ಯಕ್ಷ ಸ್ಥಾನದಲ್ಲಿದ್ದ ಗಂಗೂಲಿ, ಆಪ್ತ ಸ್ನೇಹಿತ ರಾಹುಲ್ ದ್ರಾವಿಡ್ ಬೆನ್ನು ಬಿದ್ದಿದ್ದರು. ಟೀಮ್ ಇಂಡಿಯಾಗೆ ದ್ರಾವಿಡ್ರಂಥ ಸ್ಟ್ರಿಕ್ಟ್ ಮಾಸ್ಟರ್ ಬೇಕು ಎಂಬ ಕಾರಣಕ್ಕೆ ಹಠ ಹಿಡಿದು ದ್ರಾವಿಡ್ ಕಾಡಿ ಬೇಡಿ ಒಪ್ಪಿಸಿ, ಕೋಚ್ ಹುದ್ದೆಗೆ ಕರೆತಂದಿದ್ರು. ನಂತರ ಆಗಿದ್ದೆಲ್ಲ ಈಗ ಇತಿಹಾಸ. ಇದೀಗ ಗಂಗೂಲಿ ಬಹುತೇಕ ದ್ರಾವಿಡ್ಗೆ ಗಾಳ ಹಾಕೋ ಲೆಕ್ಕಾಚಾರದಲ್ಲಿದ್ದಾರೆ. ವರ್ಷದಲ್ಲಿ ಕೇವಲ 3 ತಿಂಗಳ ಅವಧಿಯ ಕಾರ್ಯವಾಗಿರೋದ್ರಿಂದ ದಾದಾ ಆಫರ್ ಮಾಡಿದ್ರೆ, ದ್ರಾವಿಡ್ ಒಪ್ಪೋ ಸಾಧ್ಯತೆ ಹೆಚ್ಚಿದೆ. ಒಟ್ನಲ್ಲಿ ಐಪಿಎಲ್ಗೆ ಇನ್ನೂ 8 ತಿಂಗಳು ಬಾಕಿ ಇರುವಾಗಲೇ ಫ್ರಾಂಚೈಸಿಗಳಲ್ಲಿ ಮೇಜರ್ ಸರ್ಜರಿ ಆಗ್ತಿದೆ. ರಾಹುಲ್ ದ್ರಾವಿಡ್ ಯಾವ ಟೀಂ ಸೇರ್ತಾರೆ ಅನ್ನೋದೇ ದೊಡ್ಡ ಕ್ಯೂರಿಯಾಸಿಟಿ ಹುಟ್ಟಿಸಿದೆ.