ನೋಡಿರಿ
ಯೋಜನೆಗಳ ತಾತ್ಕಾಲಿಕ ಸ್ಥಗಿತ.. ಹೊಸ ಯೋಜನೆಗಳ ವಿಸ್ತರಣೆಗಿಲ್ಲ ಅವಕಾಶ – ಪಾತಾಳಕ್ಕೆ ಕುಸಿದಿರುವ ಪಾಕಿಸ್ತಾನಕ್ಕೆ ಚೀನಾದಿಂದಲೂ ಬಿಗ್ ಶಾಕ್
ಆರ್ಥಿಕವಾಗಿ ದಿವಾಳಿಯಾಗಿರುವ ಪಾಕಿಸ್ತಾನಕ್ಕೆ ಚೀನಾ ಬಿಗ್ ಶಾಕ್ ಕೊಟ್ಟಿದೆ. ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್‌ ಅವರ ಮಹತ್ವಾಕಾಂಕ್ಷಿ ಯೋಜನೆಯಾದ ‘ಚೀನಾ-ಪಾಕಿಸ್ತಾನ ಆರ್ಥಿಕ ಕಾರಿಡಾರ್‌’ (ಸಿಪಿಇಸಿ) ನಿಂದ ಪಾಕಿಸ್ತಾನವನ್ನು ಹೊರದಬ್ಬಲಾಗಿದೆ ಎಂದು ಪಾಕ್‌ನ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.
ಸಿಪಿಇಸಿ ಜಾರಿಯ ಉಸ್ತುವಾರಿ ಹೊತ್ತಿರುವ ಜಂಟಿ ಸಹಕಾರ ಸಮಿತಿ (ಜೆಸಿಸಿ) ನಡೆಸಿದ 11ನೇ ಸಭೆಯಲ್ಲಿ, ಪಾಕಿಸ್ತಾನ ಸರಕಾರವು ಚೀನಾ ಎದುರು ಹಲವು ಯೋಜನೆಗಳ ಪ್ರಸ್ತಾವನೆ ಇರಿಸಿತ್ತು. ಈ ಮೂಲಕ ಒಂದಷ್ಟು ಸಾಲ ಪಡೆಯಲು ಕೂಡ ಪಾಕಿಸ್ತಾನವು ಹೊಂಚು ಹಾಕಿತ್ತು. ಆದರೆ, ಚೀನಾದ ಅಧಿಕಾರಿಗಳು ಪಾಕ್‌ನಲ್ಲಿನ ಎಲ್ಲ ಯೋಜನೆಗಳ ತಾತ್ಕಾಲಿಕ ಸ್ಥಗಿತಕ್ಕೆ ಆದೇಶಿಸಿ, ಹೊಸ ಯೋಜನೆ ಅಥವಾ ಹಾಲಿ ಯೋಜನೆಗಳ ವಿಸ್ತರಣೆಗೆ ನಿರಾಕರಿಸಿದ್ದಾರೆ ಎಂದು ಪಾಕ್ ಮಾಧ್ಯಮ ‘ದಿ ಎಕ್ಸ್‌ಪ್ರೆಸ್‌ ಟ್ರಿಬ್ಯೂನ್‌’ ವರದಿ ಮಾಡಿದೆ.
ಇದನ್ನೂ ಓದಿ : ಬಾಹ್ಯಾಕಾಶ ಕ್ಷೇತ್ರದಲ್ಲಿ ಅಮೆರಿಕದಿಂದ ಮತ್ತೊಂದು ದೊಡ್ಡ ಸಾಧನೆ – ಕ್ಷುದ್ರಗ್ರಹದಿಂದ ಮಣ್ಣು ತಂದ ನಾಸಾ
ಗಿಲ್ಗಿಟ್‌- ಬಲ್ಟಿಸ್ತಾನ್‌, ಖೈಬರ್‌ ಪಖ್ತುಂಖ್ವಾ, ಪಾಕಿಸ್ತಾನ ಆಕ್ರಮಿತ ಕಾಶ್ಮೀರದಲ್ಲಿ ಇಂಧನ, ನೀರು ನಿರ್ವಹಣೆ, ಪ್ರವಾಸೋದ್ಯಮ, ಹವಾಮಾನ ವೈಪರಿತ್ಯ ನಿಯಂತ್ರಣ ಸೇರಿದಂತೆ ಉದ್ದೇಶಿತ ಹೊಸ ಯೋಜನೆಗಳನ್ನು ಶುರು ಮಾಡುವ ಪ್ರಸ್ತಾವನೆಯನ್ನು ಪಾಕ್ ಸರಕಾರವು ಚೀನಾ ಎದುರು ಇರಿಸಿತ್ತು. ಜತೆಗೆ, ಆಮದು ಮಾಡಿಕೊಳ್ಳಲಾದ ಕಲ್ಲಿದ್ದಲಿನಿಂದ ಗ್ವಾದರ್‌ ನಗರದಲ್ಲಿ ಹೊಸ ವಿದ್ಯುದಾಗಾರ ತೆರೆಯುವ ಚೀನಾ ಪ್ರಸ್ತಾವನೆಗೆ ಪಾಕ್ ಸರಕಾರ ಹಸಿರು ನಿಶಾನೆ ನೀಡಿತ್ತು. ಆದರೆ, ಚೀನಾ ಮಾತ್ರ ಇದಕ್ಕೆ ಒಪ್ಪಿಗೆ ನೀಡಲಿಲ್ಲ ಎನ್ನಲಾಗಿದೆ. 2022ರ ಅಕ್ಟೋಬರ್‌ನಲ್ಲಿ ಜೆಸಿಸಿ ಸಭೆ ನಡೆದಿತ್ತು. ಅದರಲ್ಲಿನ ಒಪ್ಪಂದಗಳಿಗೆ ಈ ವರ್ಷದ ಜುಲೈ 31ರಂದು ಚೀನಾ ಉಪ ಪ್ರಧಾನಿ ಹಾಗೂ ಪಾಕಿಸ್ತಾನದ ಆಗಿನ ಯೋಜನಾ ಸಚಿವ ಅಹ್ಸಾನ್ ಇಕ್ಬಾಲ್ ಅವರು ಸಹಿ ಹಾಕಿದ್ದರು. ಈ ವಿಳಂಬ ಸಾಕಷ್ಟು ಗೊಂದಲಗಳಿಗೆ ಕಾರಣವಾಗಿತ್ತು. ಬೀಜಿಂಗ್ ಜತೆ ಪಾಕ್ ಕರಡು ಹಂಚಿಕೊಂಡಿತ್ತು. ಆದರೆ ಎರಡೂ ದೇಶಗಳು ಸಹಿ ಹಾಕಿದ ಅಂತಿಮ ಒಪ್ಪಂದಗಳಲ್ಲಿ ಹಲವು ಬದಲಾವಣೆಗಳನ್ನು ಮಾಡಲಾಗಿತ್ತು. ಪಾಕಿಸ್ತಾನದಲ್ಲಿ ಇತ್ತೀಚೆಗೆ ಸರ್ಕಾರಗಳಲ್ಲಿ ಪದೇ ಪದೇ ಬದಲಾವಣೆ ಆಗಿರುವುದು ಕೂಡ ಚೀನಾದ ಯೋಜನೆಗೆ ಹಿನ್ನಡೆ ಉಂಟು ಮಾಡಿವೆ.
ಈಗಾಗಲೇ ಕರಾಚಿ ನಗರ ಹಾಗೂ ಸುತ್ತಲಿನ ಪ್ರದೇಶಗಳಲ್ಲಿ ಜರುಗುತ್ತಿರುವ ಸಿಪಿಇಸಿ ಕಾಮಗಾರಿಗೆ ಪಾಕಿಸ್ತಾನದಿಂದ ಸೂಕ್ತ ಭದ್ರತೆ ನೀಡಲಾಗುತ್ತಿಲ್ಲ. ಉಗ್ರರ ಉಪಟಳ ದಿನೇದಿನೆ ಹೆಚ್ಚುತ್ತಿದೆ ಎಂದು ಚೀನಾ ಅಧಿಕಾರಿಗಳು ಜಂಟಿ ಸಭೆಯಲ್ಲಿ ಪಾಕಿಸ್ತಾನಕ್ಕೆ ತಪರಾಕಿ ಹಾಕಿದ್ದಾರೆ ಎಂದು ತಿಳಿದುಬಂದಿದೆ. ಬಲೂಚಿಸ್ತಾನ ಪ್ರಾಂತ್ಯದ ಮೂಲಕ ಗ್ವಾದರ್‌ ಬಂದರಿನಲ್ಲಿ ಹಿಡಿತ ಸಾಧಿಸಿ ಅರಬ್ಬಿ ಸಮುದ್ರದಲ್ಲಿ ಪಾರುಪತ್ಯ ಸ್ಥಾಪಿಸಲು ಚೀನಾ ‘ಸಿಪಿಇಸಿ’ ಯೋಜನೆಯನ್ನು ಶುರು ಮಾಡಿದೆ. ಆರ್ಥಿಕವಾಗಿ ಕಂಗೆಟ್ಟಿರುವ ಪಾಕಿಸ್ತಾನಕ್ಕೆ ಸಾಲದ ಆಮಿಷ ತೋರಿಸಿ ಯೋಜನೆಗೆ ಪಾಕ್ ನೆಲ ಬಳಸಿಕೊಳ್ಳಲಾಗುತ್ತಿದೆ.
