ನೋಡಿರಿ
ಊಟದ ವಿಚಾರಕ್ಕೆ ಗಲಾಟೆ – ಚಪ್ಪಲಿಯಲ್ಲಿ ಹೊಡೆದಾಡಿಕೊಂಡ ಬಿಗ್ ಬಾಸ್ ಸ್ಪರ್ಧಿಗಳು!
ಬಿಗ್ ಬಾಸ್ ಎಂದ ಮೇಲೆ ಭಾಷೆ ಯಾವುದೇ ಆಗಿರಲಿ, ಅಲ್ಲಿ ಪ್ರೀತಿ-ಪ್ರೇಮ ಒಂದಿಷ್ಟು ಅಶ್ಲೀಲ ಎಲ್ಲವೂ ಕಾಮನ್ ಆಗಿವೆ. ಕೆಲವೊಮ್ಮೆ ಇದು ಸ್ಕ್ರಿಪ್ಟೆಡ್ ಎಂದೂ ಬಿಗ್ಬಾಸ್ ಮನೆಯಿಂದ ಹೊರಕ್ಕೆ ಬಂದವರು ಹೇಳುವುದು ಇದೆ. ಪ್ರೀತಿ ಪ್ರೇಮ ಎಲ್ಲಾ ಇಲ್ಲದೇ ಹೋದರೆ ಬಿಗ್ಬಾಸ್ ವೀಕ್ಷಕರನ್ನು ಹಿಡಿದಿಟ್ಟುಕೊಳ್ಳುವುದು ಸಾಧ್ಯವಿಲ್ಲ ಅನ್ನುವ ಕಾರಣಕ್ಕೆ ಲವ್, ಜಗಳ, ಒಂದಿಷ್ಟು ವಿವಾದ, ಮನೆಯವರನ್ನು ನೆನೆದು ಕಣ್ಣೀರು ಹಾಕುವುದು… ಎಲ್ಲವನ್ನೂ ಮೊದಲೇ ಸ್ಕ್ರಿಪ್ಟ್ ಮಾಡಿ ಕೊಡಲಾಗುತ್ತದೆ ಎಂದೂ ಹೇಳಲಾಗುತ್ತದೆ. ಆರೋಪಗಳು ಏನೇ ಇರಲಿ, ಒಟ್ಟಿನಲ್ಲಿ ಬೈದುಕೊಳ್ಳುತ್ತಲೇ ಶೋ ನೋಡುವ ದೊಡ್ಡ ವರ್ಗವೇ ಇದೆ. ಇನ್ನು ಬಿಗ್ ಬಾಸ್ ಮನೆಯಲ್ಲಿ ಒಮ್ಮೆ ಕ್ಲೋಸ್‌ ಆಗಿದ್ದವರು ಮತ್ತೆ ದೊಡ್ಡ ಶತ್ರುಗಳಂತೆ ವರ್ತಿಸುತ್ತಾರೆ. ಕೆಲವೊಂದು ಬಾರಿ ಸಣ್ಣ ಪುಟ್ಟ ಮನಸ್ತಾಪದಿಂದಾಗಿ ದೊಡ್ಡ ಮಟ್ಟದ ಜಗಳವೇ ನಡೆದುಹೋಗುತ್ತೆ. ಇದೀಗ ಬಿಗ್ ಬಾಸ್ ಮನೆಯಲ್ಲಿ ಸ್ಪರ್ಧಿಗಳಿಬ್ಬರು ಚಪ್ಪಲಿಯಿಂದ ಹೊಡೆದುಕೊಂಡಿದ್ದಾರೆ.
ಹೌದು, ಬಿಗ್ ಬಾಸ್ ಅಂದ ಮೇಲೆ ಅಲ್ಲಿ ಹಲವು ಕಿರಿಕ್ಗಳು ಇದ್ದೇ ಇರುತ್ತೆ. ಎಷ್ಟೇ ಆಪ್ತರಾಗಿದ್ದರೂ ಕೂಡ ದೊಡ್ಮನೆಯಲ್ಲಿ ಕಿತ್ತಾಡಿಕೊಂಡು ಇರುತ್ತಾರೆ. ಗಂಡ-ಹೆಂಡತಿ ಜೊತೆಯಾಗಿ ಬಿಗ್ ಬಾಸ್ ಮನೆಯಲ್ಲಿ ಸ್ಪರ್ಧಿಸಿದರೂ ಸಹ ಕಿತ್ತಾಟ ತಪ್ಪಿಸಲು ಸಾಧ್ಯವಿಲ್ಲ. ಅದಕ್ಕೆ ಬೆಸ್ಟ್ ಉದಾಹರಣೆ ಎಂದರೆ ಅಂಕಿತಾ ಲೋಖಂಡೆ ಮತ್ತು ವಿಕ್ಕಿ ಜೈನ್. ಬಾಲಿವುಡ್ನಲ್ಲಿ ಗುರುತಿಸಿಕೊಂಡಿರುವ ಇವರಿಬ್ಬರು ‘ಬಿಗ್ ಬಾಸ್ ಹಿಂದಿ ಸೀಸನ್ 17’ ಶೋನಲ್ಲಿ ಭಾಗವಹಿಸಿದ್ದಾರೆ. ಹೊರಜಗತ್ತಿನಲ್ಲಿ ತುಂಬ ಚೆನ್ನಾಗಿ ಇದ್ದ ಈ ದಂಪತಿಯು ದೊಡ್ಮನೆಗೆ ಬಂದ ಬಳಿಕ ಬದ್ಧ ವೈರಿಗಳಂತೆ ಜಗಳ ಮಾಡಿಕೊಳ್ಳುತ್ತಿದ್ದಾರೆ. ಗಂಡನಿಗೆ ಅಂಕಿತಾ ಲೋಖಂಡೆ ಅವರು ಚಪ್ಪಲಿಯಲ್ಲಿ ಹೊಡೆದಿದ್ದಾರೆ.
ಇದನ್ನೂ ಓದಿ: ಕಾರ್ತಿಕ್‌ ಜೊತೆ ರಂಪಾಟ – ಬಿಗ್ಬಾಸ್ ಮನೆಯಿಂದ ಸಂಗೀತ ಔಟ್?
ಊಟದ ವಿಚಾರಕ್ಕೆ ಬಿಗ್ ಬಾಸ್ ಮನೆಯಲ್ಲಿ ಚರ್ಚೆ ನಡೆಯುತ್ತಿತ್ತು. ವಿಕ್ಕಿ ಜೈನ್ ಹೇಳಿದ ಮಾತುಗಳು ಅಂಕಿತಾ ಲೋಖಂಡೆ ಅವರಿಗೆ ಇಷ್ಟ ಆಗಲಿಲ್ಲ. ಅದನ್ನು ಅವರು ವಿರೋಧಿಸಿದರು. ಜಗಳ ಇನ್ನೊಂದು ಹಂತಕ್ಕೆ ಹೋದಾಗ ಅಂಕಿತಾ ಲೋಖಂಡೆ ಅವರು ತಾಳ್ಮೆ ಕಳೆದುಕೊಂಡರು. ಗಂಡನಿಗೆ ಅವರು ಚಪ್ಪಲಿ ಬೀಸಿ ಹೊಡೆದರು. ವಿಕ್ಕಿ ಜೈನ್ ತಪ್ಪಿಸಿಕೊಳ್ಳಲು ಪ್ರಯತ್ನಿಸಿದರೂ ಕೂಡ ಅದು ಸಾಧ್ಯವಾಗಲಿಲ್ಲ. ಇವರಿಬ್ಬರು ಕಿತ್ತಾಡುತ್ತಿರುವ ಪ್ರೋಮೋವನ್ನು ಖಾಸಗಿ ಚಾನೆಲ್‌ ಸೋಶಿಯಲ್‌ ಮೀಡಿಯಾದಲ್ಲಿ ಪೋಸ್ಟ್‌ ಮಾಡಿದೆ. ಇದನ್ನು ನೋಡಿದ ವೀಕ್ಷಕರು ಮುಂದಿನ ದಿನಗಳಲ್ಲಿ ಇವರಿಬ್ಬರ ಸಂಬಂಧ ಇನ್ನಷ್ಟು ಕೆಟ್ಟು ಹೋಗುವ ಸಾಧ್ಯತೆ ಇದೆ ಅಂತಾ ಮಾತನಾಡಿಕೊಂಡಿದ್ದಾರೆ.
ಹೆಂಡತಿಯಿಂದ ಚಪ್ಪಲಿ ಏಟು ತಿಂದರೂ ಕೂಡ ವಿಕ್ಕಿ ಜೈನ್ ಅವರು ಕೂಲ್ ಆಗಿ ವರ್ತಿಸಿದ್ದಾರೆ. ಆ ಕ್ಷಣವನ್ನು ಅವರು ತುಂಬ ತಮಾಷೆಯಾಗಿ ಸ್ವೀಕರಿಸಿದ್ದಾರೆ. ‘ಹೆಂಡತಿ ತುಂಬಾ ದುಬಾರಿ ಚಪ್ಪಲಿಯಲ್ಲಿ ಹೊಡೆದಿದ್ದಾಳೆ’ ಎಂದು ಜೋಕ್ ಮಾಡುತ್ತಾ, ವಾತಾವರಣವನ್ನು ತಿಳಿಗೊಳಿಸಲು ಅವರು ಪ್ರಯತ್ನಿಸಿದ್ದಾರೆ. ಹಾಗಿದ್ದರೂ ಕೂಡ ಅಂಕಿತಾ ಲೋಖಂಡೆ ಅವರು ನಡೆದುಕೊಂಡ ರೀತಿ ನೋಡಿ ಇನ್ನುಳಿದ ಸ್ಪರ್ಧಿಗಳಿಗೆ ಅಚ್ಚರಿ ಆಗಿದೆ. ಈ ಮೊದಲಿನ ಎಪಿಸೋಡ್ಗಳಲ್ಲೂ ಕೂಡ ಗಂಡನ ಬಗ್ಗೆ ಅಂಕಿತಾ ಅವರು ಹಲವು ಆರೋಪಗಳನ್ನು ಮಾಡಿದ್ದರು.
ಹಿಂದಿ ಕಿರುತೆರೆಯ ಮೂಲಕ ಅಂಕಿತಾ ಲೋಖಂಡೆ ಗುರುತಿಸಿಕೊಂಡರು. ಸುಶಾಂತ್ ಸಿಂಗ್ ರಜಪೂತ್ ಜೊತೆ ಅವರು ‘ಪವಿತ್ರಾ ರಿಷ್ತಾ’ ಸೀರಿಯಲ್ನಲ್ಲಿ ನಟಿಸಿದ್ದರು. ಇಬ್ಬರ ನಡುವೆ ನಿಜ ಜೀವನದಲ್ಲೂ ಪ್ರೀತಿ ಮೂಡಿತ್ತು. ಆದರೆ ಒಂದಷ್ಟು ವರ್ಷಗಳ ಬಳಿಕ ಅಂಕಿತಾ ಲೋಖಂಡೆ ಮತ್ತು ಸುಶಾಂತ್ ಸಿಂಗ್ ರಜಪೂತ್ ಅವರು ಬ್ರೇಕಪ್ ಮಾಡಿಕೊಂಡರು. ಆ ನಂತರ ಸುಶಾಂತ್ ಅವರು ರಿಯಾ ಚರ್ಕವರ್ತಿ ಜೊತೆ ಪ್ರೀತಿಯಲ್ಲಿ ಮುಳುಗಿದರು. ಅಂಕಿತಾ ಅವರು ವಿಕ್ಕಿ ಜೈನ್ ಜೊತೆ ಮದುವೆಯಾದರು. ಈಗ ಇವರಿಬ್ಬರು ಬಿಗ್ ಬಾಸ್ನಲ್ಲಿ ಸ್ಪರ್ಧಿಸುತ್ತಿದ್ದಾರೆ.
