ನೋಡಿರಿ
ಅಮಿತ್ ಶಾ ಜಮ್ಮು & ಕಾಶ್ಮೀರ ಭೇಟೆ ಬೆನ್ನಲ್ಲೇ ಕಾಶ್ಮೀರಿ ಪಂಡಿತ್ ಸಮುದಾಯಕ್ಕೆ ಬೆದರಿಕೆ
ಕೇಂದ್ರ ಗೃಹಸಚಿವ ಅಮಿತ್ ಶಾ ಗುರುವಾರದಿಂದ (ಫೆಬ್ರವರಿ 5) ಜಮ್ಮು ಮತ್ತು ಕಾಶ್ಮೀರಕ್ಕೆ ಮೂರು ದಿನಗಳ ಭೇಟಿ ಆರಂಭಿಸಲಿರುವ ಸಂದರ್ಭದಲ್ಲೇ, ಫಾಲ್ಕನ್ ಸ್ಕ್ವಾಡ್ ಎಂದು ಕರೆದುಕೊಳ್ಳುವ ಗುಂಪಿನ ಹೆಸರಿನಲ್ಲಿ ಬೆದರಿಕೆ ಸಂದೇಶ ಬಂದಿದೆ. ಆ ನೋಟಿನಲ್ಲಿ, ಲಷ್ಕರ್-ಎ-ತೈಬಾ ಸಂಘಟನೆಯ ಅಂಗಸಂಸ್ಥೆಯಾದ ದಿ ರೆಸಿಸ್ಟನ್ಸ್ ಫ್ರಂಟ್ ಜತೆ ಈ ಗುಂಪು ಸಂಬಂಧ ಹೊಂದಿದೆ ಎಂದು ಉಲ್ಲೇಖಿಸಲಾಗಿದೆ. ಅಲ್ಲದೆ, ಕಾಶ್ಮೀರ ಕಣಿವೆಗೆ ಮರಳುವ ಅಥವಾ ಈಗಾಗಲೇ ಅಲ್ಲಿ ವಾಸಿಸುತ್ತಿರುವ ಕಾಶ್ಮೀರಿ ಪಂಡಿತ ಸಮುದಾಯದ ಸದಸ್ಯರಿಗೆ ಎಚ್ಚರಿಕೆ ನೀಡಲಾಗಿದೆ.
ಫೆಬ್ರವರಿ 3ರ ಈ ಸಂದೇಶವು ಎನ್ಕ್ರಿಪ್ಟ್ ಮಾಡಲಾದ ಚಾನೆಲ್ಗಳು ಹಾಗೂ ಉಗ್ರ ವಿರೋಧಿ ಸಂಸ್ಥೆಗಳು ನಿಗಾ ವಹಿಸುವ ಆನ್ಲೈನ್ ವೇದಿಕೆಗಳಲ್ಲಿ ಹರಿದಾಡುತ್ತಿರುವುದು ಕಂಡುಬಂದಿದೆ. ಜಮ್ಮು ಮತ್ತು ಕಾಶ್ಮೀರದ ಭದ್ರತಾ ಹಾಗೂ ಗುಪ್ತಚರ ಅಧಿಕಾರಿಗಳು ಈ ಬೆದರಿಕೆಯನ್ನು ಗಂಭೀರವಾಗಿ ಪರಿಗಣಿಸಲಾಗಿದೆ ಎಂದು ಹೇಳಿದ್ದು, ಅದರ ಉದ್ದೇಶ ಮತ್ತು ಸಾಧ್ಯವಿರುವ ಕಾರ್ಯಾಚರಣಾತ್ಮಕ ಸಂಪರ್ಕಗಳ ಬಗ್ಗೆ ಪರಿಶೀಲನೆ ನಡೆಸಲಾಗುತ್ತಿದೆ ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ: ಸಿಲಿಕಾನ್ ಸಿಟಿ ಮಂದಿಗೆ ಶಾಕ್ ಕೊಟ್ಟ ಬಿಎಂಆರ್ಸಿಎಲ್! – ಫೆ.9ರಿಂದ ಮೆಟ್ರೋ ದರ ಏರಿಕೆ?
ಕಾಶ್ಮೀರಿ ವಲಸೆ ಪಂಡಿತರನ್ನು ಬೆದರಿಸುವ ಉದ್ದೇಶದಿಂದಲೇ ಈ ಸಂದೇಶ ಹೊರಡಿಸಲಾಗಿದೆ ಎನ್ನಲಾಗುತ್ತಿದೆ. ಅದರಲ್ಲಿ ಸಮುದಾಯದ ಸದಸ್ಯರ ಮೇಲಿನ ಹಿಂದಿನ ಹತ್ಯೆಗಳ ಉಲ್ಲೇಖವಿದೆ. ಹಿಂದೆ ಬಲಿಯಾದವರಂತೆ ನೀವು ಆಗಬೇಡಿ ಎಂದು ಎಚ್ಚರಿಕೆ ನೀಡಲಾಗಿದೆ.ಹೆಸರು ಬಹಿರಂಗಪಡಿಸಲು ಇಚ್ಛಿಸದ ಹಿರಿಯ ಗುಪ್ತಚರ ಅಧಿಕಾರಿಯೊಬ್ಬರು, ಈ ಸಂದೇಶವು ಅಸಹಾಯಕ ಅಲ್ಪಸಂಖ್ಯಾತರಲ್ಲಿ ಭಯವನ್ನು ಉಂಟುಮಾಡಲು ಬಳಸಲಾಗಿದೆ ಎಂದಿದ್ದಾರೆ.
ಕಣಿವೆಯ ಸೂಕ್ಷ್ಮ ಪ್ರದೇಶಗಳು ಮತ್ತು ಕಾಶ್ಮೀರಿ ಪಂಡಿತರ ಸರ್ಕಾರಿ ನೌಕರರ ನಿಯೋಜಿತ ವಸತಿಗಳ ಸುತ್ತಲೂ ಭದ್ರತಾ ಪಡೆಗಳು ಬಲವಾಗಿವೆ. 2021 ಮತ್ತು 2022ರಲ್ಲಿ ಕಣಿವೆಯಾದ್ಯಂತ ಪ್ರತ್ಯೇಕ ಘಟನೆಗಳಲ್ಲಿ ಸರ್ಕಾರಿ ನೌಕರರು ಮತ್ತು ನಾಗರಿಕರು ಸೇರಿದಂತೆ ಹಲವಾರು ಅಲ್ಪಸಂಖ್ಯಾತ ಸಮುದಾಯದ ಸದಸ್ಯರನ್ನು ಗುಂಡಿಕ್ಕಿ ಹತ್ಯೆ ಮಾಡಲಾಗಿದೆ. ಸರಣಿ ಹತ್ಯೆಗಳ ನಂತರದ ಮೊದಲ ಪ್ರಮುಖ ಸಂದೇಶ ಇದು. ಈ ಹತ್ಯೆಗಳು ಪುನರ್ವಸತಿ ಯೋಜನೆಗಳ ಅಡಿಯಲ್ಲಿ ನೇಮಕಗೊಂಡ ವಲಸೆ ನೌಕರರಲ್ಲಿ ಭಯವನ್ನು ಹರಡಿದ್ದವು ಮತ್ತು ಅಲ್ಪಸಂಖ್ಯಾತ ವಸತಿ ಸಮೂಹಗಳ ಭದ್ರತಾ ಪರಿಶೀಲನೆಗಳನ್ನು ಪ್ರೇರೇಪಿಸಿದವು.
2020ರಲ್ಲಿ ಅನಂತನಾಗ್ನಲ್ಲಿ ಅಜಯ್ ಪಂಡಿತ ಭಾರ್ತಿ ಅವರ ಹತ್ಯೆ, 2021ರಲ್ಲಿ ಪುಲ್ವಾಮಾದಲ್ಲಿ ಪುರಸಭೆಯ ನಾಯಕ ರಾಕೇಶ್ ಪಂಡಿತ ಮತ್ತು ಶ್ರೀನಗರದಲ್ಲಿ ಖ್ಯಾತ ಔಷಧ ವ್ಯಾಪಾರಿ ಮಖನ್ ಲಾಲ್ ಬಿಂದ್ರೂ ಅವರ ಮೇಲೆ ಗುಂಡಿನ ದಾಳಿ ಮತ್ತು 2022ರಲ್ಲಿ ಬುಡ್ಗಾಮ್ನಲ್ಲಿ ಸರ್ಕಾರಿ ಉದ್ಯೋಗಿ ರಾಹುಲ್ ಭಟ್, ಕುಲ್ಗಾಮ್ನಲ್ಲಿ ಶಿಕ್ಷಕ ರಜನಿ ಬಾಲಾ ಮತ್ತು ಶೋಪಿಯಾನ್ನಲ್ಲಿ ರೈತ ಪೂರಣ್ ಕೃಷ್ಣ ಭಟ್ ಅವರ ಹತ್ಯೆಗಳು ನಡೆದಿದ್ದವು. 2023ರ ಫೆಬ್ರವರಿಯಲ್ಲಿ ಸಮುದಾಯಕ್ಕೆ ಸೇರಿದ ಸಶಸ್ತ್ರ ಭದ್ರತಾ ಸಿಬ್ಬಂದಿ ಕಾವಲುಗಾರ ಸಂಜಯ್ ಶರ್ಮಾ ಅವರನ್ನು ಪುಲ್ವಾಮಾದಲ್ಲಿ ಗುಂಡಿಕ್ಕಿ ಹತ್ಯೆ ಮಾಡಲಾಗಿತ್ತು.
