ನೋಡಿರಿ
ಬ್ರಿಟನ್ನಲ್ಲೂ ಅಮೆರಿಕನ್ XL ಬುಲ್ಲಿ ಜಾತಿಯ ಪಿಟ್ಬುಲ್ ಶ್ವಾನ ಬ್ಯಾನ್! – ಕಾರಣವೇನು ಗೊತ್ತಾ?
ಪಿಟ್ಬುಲ್ ಜಾತಿಯ ನಾಯಿಗಳಿಂದ ಅನೇಕರ ಮೇಲೆ ದಾಳಿ ನಡೆಯುತ್ತಲೇ ಇದೆ. ಈಗಾಗಲೇ ಕೆಲವರು ಈ ಜಾತಿಯ ನಾಯಿ ದಾಳಿಯಿಂದ ಪ್ರಾಣ ಕಳೆದುಕೊಂಡಿದ್ದಾರೆ. ಶ್ವಾನಗಳಿಂದ ನಡೆದ ಸರಣಿ ದಾಳಿ ಸಾಕಷ್ಟು ವರದಿಯಾದ ಬೆನ್ನಲ್ಲೇ ಯುಕೆ ಪ್ರಧಾನಿ ರಿಷಿಸುನಕ್‌ ಅವರು ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದ್ದಾರೆ. ಅಮೆರಿಕನ್ ಎಕ್ಸ್ಎಲ್ ಬುಲ್ಲಿ ಜಾತಿಯ ಪಿಟ್ಬುಲ್ ಶ್ವಾನವನ್ನು ಬ್ರಿಟನ್ನಲ್ಲಿ ಬ್ಯಾನ್ ಮಾಡಲಾಗುವುದು ಎಂದು ಆದೇಶ ಹೊರಡಿಸಿದ್ದಾರೆ.
ಈ ಬಗ್ಗೆ ಟ್ವೀಟ್‌ ಮಾಡಿರುವ ರಿಷಿ ಸುನಕ್, ನಮ್ಮ ಸಮುದಾಯಗಳಿಗೆ ಅಮೆರಿಕನ್ ಎಕ್ಸ್ಎಲ್ ಬುಲ್ಲಿ ಶ್ವಾನಗಳು ಅಪಾಯಕಾರಿಯಾಗಿವೆ. ಅದರಲ್ಲೂ ಮಕ್ಕಳಿಗೆ ಇದರ ಬೆದರಿಕೆ ಹೆಚ್ಚಾಗಿದೆ. ಇದು ಕೆಟ್ಟ ತರಬೇತಿ ಪಡೆದ ನಾಯಿಗಳ ಬಗ್ಗೆ ಅಲ್ಲ. ಇದು ಅದರ ನಡವಳಿಕೆಯ ಕುರಿತಾಗಿದೆ. ಹೀಗಾಗಿ ಈ ಜಾತಿಯ ಶ್ವಾನಗಳ ಸಾಕಾಣಿಕೆ ಮುಂದುವರಿಸಲು ಸಾಧ್ಯವಿಲ್ಲ ಎಂದು ರಿಷಿ ಸುನಕ್ ತಿಳಿಸಿದ್ದಾರೆ. ಅಷ್ಟೇ ಅಲ್ಲದೇ ಇತ್ತೀಚಿನ ನಾಯಿ ದಾಳಿಯ ವಿಡಿಯೋಗಳನ್ನು ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ: ನಾಯಿ ಸಾಕಾಣಿಕೆಗೂ ಬಂತು ಹೊಸ ರೂಲ್ಸ್‌! – ಹೊಸ ನಿಯಮಗಳೇನು?
ಈ ದಾಳಿಗಳನ್ನು ತಡೆಯುವ ಮಾರ್ಗಗಳ ಕುರಿತು ತಮ್ಮ ಸರ್ಕಾರವು ತುರ್ತಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ರಿಷಿ ಸುನಕ್ ಅವರು ಸಾರ್ವಜನಿಕರಿಗೆ ಭರವಸೆ ನೀಡಿದ್ದಾರೆ. ಇದು ಪ್ರಸ್ತುತ ಕಾನೂನಿನಲ್ಲಿ ವ್ಯಾಖ್ಯಾನಿಸಲಾದ ತಳಿಯಲ್ಲ. ನಾವು ಅಪಾಯಕಾರಿ ನಾಯಿಗಳ ಕಾಯಿದೆಯಡಿಯಲ್ಲಿ ಈ ತಳಿಯನ್ನು ನಿಷೇಧಿಸುತ್ತೇವೆ. ಅಲ್ಲದೆ, ಈ ಕುರಿತು ಹೊಸ ಕಾನೂನುಗಳು ಜಾರಿಯಾಗಲಿವೆ ಎಂದು ಹೇಳಿದ್ದಾರೆ.
ಕಳೆದ ವಾರಾಂತ್ಯದಲ್ಲಿ, ಬರ್ಮಿಂಗ್ಹ್ಯಾಮ್ನಲ್ಲಿ ಬುಲ್ಲಿ ನಾಯಿಯ ದಾಳಿಯಿಂದ ಹುಡುಗಿಯೊಬ್ಬಳು ಗಾಯಗೊಂಡಿದ್ದಳು. ಅಲ್ಲದೆ, ಆಕೆಯನ್ನು ರಕ್ಷಿಸಲು ಬಂದ ಇನ್ನಿಬ್ಬರು ವ್ಯಕ್ತಿಗಳ ಮೇಲೂ ನಾಯಿ ದಾಳಿ ಮಾಡಿತ್ತು. ಸರಣಿ ದಾಳಿಗಳು ವರದಿಯಾಗುತ್ತಲೇ ಇದ್ದು, ಮುಂದಿನ ಅಪಾಯವನ್ನು ತಡೆಗಟ್ಟಲು ರಿಷಿ ಸುನಕ್ ಈ ಕ್ರಮ ತೆಗೆದುಕೊಂಡಿದ್ದಾರೆ.
