5 ದಿನಗಳ ಕಾಲ ನಿರಂತರ ನೃತ್ಯ ಮಾಡಿ ವಿಶ್ವದಾಖಲೆ ಬರೆದ 16 ವರ್ಷದ ಬಾಲಕಿ!

ಡ್ಯಾನ್ಸ್ ಒಂದು ಅದ್ಭುತ ಕಲೆ. ದೇಹವನ್ನ ಬಳುಕಿಸುತ್ತಾ ಸಂಗೀತಕ್ಕೆ ತಕ್ಕಂತೆ ದೇಹ ಬಳುಕಿಸುವುದು ಸುಲಭದ ಮಾತಲ್ಲ. ಅದಕ್ಕೆ ಕಲೆ ಒಲಿದಿರಬೇಕು. ಹೀಗೆ ಡ್ಯಾನ್ಸ್ ಮಾಡೋಕೆ ನಿಂತರೆ 5 ನಿಮಿಷದಲ್ಲಿ ಸುಸ್ತು ಶುರುವಾಗುತ್ತೆ. ಆರಂಭದಲ್ಲಿ ಇರುವ ಜೋಶ್ ನಂತರ ಕಾಣಲ್ಲ. ಆದರೆ ಈ ಬಾಲಕಿಯ ಡ್ಯಾನ್ಸ್ ನೋಡಿದ್ರೆ ಅಚ್ಚರಿ ಪಡ್ತೀರ.

ಮಹಾರಾಷ್ಟ್ರದ 16 ವರ್ಷದ ಬಾಲಕಿಯೊಬ್ಬಳು ಡ್ಯಾನ್ಸ್ ಮ್ಯಾರಥಾನ್ ನಲ್ಲಿ ವಿಶ್ವದಾಖಲೆ ನಿರ್ಮಿಸಿದ್ದಾಳೆ. ಸೃಷ್ಟಿ ಸುಧೀರ್ ಜಗತಾಪ್ ಎಂಬ ಹದಿಹರೆಯದ ಬಾಲಕಿಯೊಬ್ಬಳು ಐದು ದಿನಗಳ ಕಾಲ ನಿರಂತರವಾಗಿ ನೃತ್ಯ ಮಾಡುವ ಮೂಲಕ 2018 ರಲ್ಲಿ ಸ್ಥಾಪಿಸಿದ ಹಿಂದಿನ ವಿಶ್ವ ದಾಖಲೆಯನ್ನು ಮುರಿದಿದ್ದಾಳೆ. ಇವರ ಈ ಸಾಧನೆಯು ಈಗ ಜಾಗತಿಕ ಗಮನವನ್ನು ಸೆಳೆದಿದೆ ಮತ್ತು ನೃತ್ಯದ ಮೂಲಕ ಭಾರತವನ್ನು ಪ್ರತಿನಿಧಿಸುವ ಸೃಷ್ಟಿ ಅವರ ಕನಸನ್ನು ಇನ್ನಷ್ಟು ಗಟ್ಟಿಗೊಳಿಸಿದೆ.

ಇದನ್ನೂ ಓದಿ : ಸತತ 100 ಗಂಟೆಗಳ ಕಾಲ ಅಡುಗೆ – ಗಿನ್ನೆಸ್ ದಾಖಲೆ ಬರೆದ ನೈಜೀರಿಯಾ ಮಹಿಳೆ!

ಗಿನ್ನಿಸ್ ವರ್ಲ್ಡ್ ರೆಕಾರ್ಡ್ಸ್ (ಜಿಡಬ್ಲ್ಯೂಆರ್) ಪ್ರಕಾರ, ಸೃಷ್ಟಿ ಜಗತಾಪ್ ಒಟ್ಟು 127 ಗಂಟೆಗಳ ಕಾಲ ನೃತ್ಯ ಮಾಡುವ ಮೂಲಕ ಈ ಗಮನಾರ್ಹ ಯಶಸ್ಸನ್ನು ಸಾಧಿಸಿದ್ದಾರೆ. ಈ ಹಿಂದೆ ನೇಪಾಳದ ನೃತ್ಯಗಾರ್ತಿ ಬಂದನಾ ನೇಪಾಳ್ 126 ಗಂಟೆಗಳ ಕಾಲ ನೃತ್ಯ ಮಾಡಿ ಸಾಧನೆ ಮಾಡಿದ್ದರು. ಸೃಷ್ಟಿ ಅವರ ಈ ಕಠಿಣ ಪ್ರಯತ್ನವು ಮೇ 29 ರ ಬೆಳಿಗ್ಗೆ ತನ್ನ ಕಾಲೇಜಿನ ಸಭಾಂಗಣದಲ್ಲಿ ಪ್ರಾರಂಭವಾಗಿದ್ದು ಜೂನ್ 3 ರ ಮಧ್ಯಾಹ್ನದವರೆಗೆ ನಡೆದಿದೆ.

ಆಡಿಟೋರಿಯಂ ತುಂಬಾ ಜನರಿದ್ದು, ಸೃಷ್ಟಿ ಅವರ ಮ್ಯಾರಥಾನ್ ಡ್ಯಾನ್ಸ್ ನ ಉದ್ದಕ್ಕೂ ಅವರನ್ನು ಹುರಿದುಂಬಿಸಿದರು. ಜಿಡಬ್ಲ್ಯೂಆರ್ ತೀರ್ಪುಗಾರ ಸ್ವಪ್ನಿಲ್ ಡಂಗರಿಕರ್ ಅವರು ಅಧಿಕೃತ ಗಿನ್ನಿಸ್ ಅರ್ಹತಾ ಮಾನದಂಡಗಳಿಗೆ ಇವರು ಬದ್ಧರಾಗಿದ್ದಾರೆ ಎಂದು ಖಚಿತಪಡಿಸಿಕೊಳ್ಳಲು ಹಾಜರಿದ್ದರು. ಐದು ದಿನಗಳಲ್ಲಿ ಅಲ್ಲಲ್ಲಿ ಆಯಾಸ ಅಂತ ಅನ್ನಿಸಿದಾಗ ಸೃಷ್ಟಿ ಅವರ ಪೋಷಕರು ಅವಳ ಪಕ್ಕದಲ್ಲಿಯೇ ಇದ್ದು ಆಕೆಯ ಮುಖಕ್ಕೆ ನೀರನ್ನು ಸಿಂಪಡಿಸಿದರು.

ಭಾರತೀಯ ಶಾಸ್ತ್ರೀಯ ನೃತ್ಯದ ಎಂಟು ಪ್ರಮುಖ ಪ್ರಕಾರಗಳಲ್ಲಿ ಒಂದಾದ ಕಥಕ್ ನಲ್ಲಿ ಸೃಷ್ಟಿ ತನ್ನ ಪ್ರತಿಭೆಯನ್ನು ಪ್ರದರ್ಶಿಸಿದರು. ಈ ಸಾಂಪ್ರದಾಯಿಕ ನೃತ್ಯ ಶೈಲಿಯು ಸಂಕೀರ್ಣವಾದ ಫುಟ್ವರ್ಕ್, ಆಕರ್ಷಕ ಚಲನೆಗಳು ಮತ್ತು ಅಭಿವ್ಯಕ್ತಿಶೀಲ ಕಥೆಯನ್ನು ಒಳಗೊಂಡಿದೆ. ಈ ಡ್ಯಾನ್ಸ್ ಮ್ಯಾರಥಾನ್ ಸಮಯದಲ್ಲಿ, ಸೃಷ್ಟಿ ಜಿಡಬ್ಲ್ಯೂಆರ್ ಒದಗಿಸಿದ ಮಾರ್ಗಸೂಚಿಗಳನ್ನು ಅನುಸರಿಸಿದರು. ನಿರಂತರ ಗಂಟೆಗಳ ಚಟುವಟಿಕೆಯ ನಂತರ ಅವರಿಗೆ ಐದು ನಿಮಿಷಗಳ ವಿಶ್ರಾಂತಿ ವಿರಾಮ ನೀಡಲಾಯಿತು. ಅವಳ ಹೆಚ್ಚಿನ ವಿರಾಮಗಳನ್ನು ಮಧ್ಯರಾತ್ರಿಯ ಸುಮಾರಿಗೆ ತೆಗೆದುಕೊಳ್ಳಲಾಯಿತು, ಇದು ಅವಳಿಗೆ ವಿಶ್ರಾಂತಿ ಪಡೆಯಲು, ಕಿರು ನಿದ್ದೆ ಮಾಡಲು ಮತ್ತು ಅವಳ ಹೆತ್ತವರೊಂದಿಗೆ ಸಂವಹನ ನಡೆಸಲು ಅನುವು ಮಾಡಿಕೊಟ್ಟಿತು.

ಈ ಬಗ್ಗೆ ಮಾತನಾಡಿರುವ ಸೃಷ್ಟಿ ಅವರು ಅಂತಿಮ ದಿನವು ವಿಶೇಷವಾಗಿ ತುಂಬಾನೇ ಸವಾಲಿನದ್ದಾಗಿತ್ತು, ಏಕೆಂದರೆ ತನ್ನ ದೇಹವು ಪ್ರತಿಕ್ರಿಯಿಸಲು ತುಂಬಾನೇ ಹೆಣಗಾಡಿತಂತೆ. ತನ್ನ ಕೈಕಾಲುಗಳಲ್ಲಿ ತುಂಬಾನೇ ನೋವಾಗುತ್ತಿದ್ದವು, ಆದರೆ ಆಕೆಯ ದೃಢನಿಶ್ಚಯವು ತನ್ನನ್ನು ಮುಂದುವರಿಸಿತು ಎಂದು ಹೇಳಿದರು. ತರಬೇತಿ ಪಡೆದ ಶಾಸ್ತ್ರೀಯ ಭಾರತೀಯ ನೃತ್ಯ ತರಬೇತುದಾರರೂ ಆಗಿರುವ ತನ್ನ ಅಜ್ಜ ಬಬನ್ ಮಾನೆ ಅವರ ಮಾರ್ಗದರ್ಶನದಲ್ಲಿ, ಅವರು 15 ತಿಂಗಳ ಕಾಲ ಈ ದಾಖಲೆ ಪ್ರಯತ್ನಕ್ಕಾಗಿ ತಯಾರಿ ನಡೆಸಿದರು. ಬಬನ್ ಮಾನೆ ಅವರು ಸೃಷ್ಟಿಗೆ ಕಥಕ್ ಕಲೆಯನ್ನು ಕಲಿಸಿದ್ದು ಮಾತ್ರವಲ್ಲದೆ, ಯೋಗ ನಿದ್ರೆ ಎಂದು ಕರೆಯಲ್ಪಡುವ ಮಾರ್ಗದರ್ಶಿತ ಧ್ಯಾನದ ರೂಪವಾದ ಯೋಗ ನಿದ್ರಾವನ್ನು ಸಹ ಕಲಿಸಿದರಂತೆ. ತರಬೇತಿಯ ಸಮಯದಲ್ಲಿ ಅವರು ದಿನದಲ್ಲಿ ನಾಲ್ಕು ಗಂಟೆಗಳ ಧ್ಯಾನ, ನಂತರ ಆರು ಗಂಟೆಗಳ ನೃತ್ಯ ಅಭ್ಯಾಸ ಮತ್ತು ಹೆಚ್ಚುವರಿಯಾಗಿ ಮೂರು ಗಂಟೆಗಳ ಇತರ ವ್ಯಾಯಾಮಗಳನ್ನು ಮಾಡುತ್ತಿದ್ದರು. ಸೃಷ್ಟಿ ದಿನಕ್ಕೆ ಕೇವಲ ಐದು ಗಂಟೆಗಳ ಕಾಲ ಮಲಗುತ್ತಿದ್ದರು, ರಾತ್ರಿ 10 ಗಂಟೆಗೆ ಮಲಗಿ ಮತ್ತೆ ಬೆಳಗ್ಗೆ 3 ಗಂಟೆಗೆ ಏಳುತ್ತಿದ್ದರಂತೆ.