ಬಲೆಯಲ್ಲಿ ಸಿಲುಕಿ ಕಾಗೆ ಒದ್ದಾಟ – ಕಾಗೆ ಕಷ್ಟಕ್ಕೆ ಬಾಲಕನೇ ಆಪದ್ಬಾಂಧವ..

ಇಂದಿನ ದಿನಗಳಲ್ಲಿ ಕರುಣೆ, ಸಹನೆ ಕಣ್ಮರೆಯಾಗುತ್ತಿದೆ. ತಮ್ಮ ಕಣ್ಣ ಮುಂದೆಯೇ ಜೀವ ಹೋಗುತ್ತಿದ್ದರೂ ಯಾರೊಬ್ಬರು ಸಹಾಯ ಮಾಡಲು ಮುಂದೆ ಬರುವುದಿಲ್ಲ. ಸಹಾಯ ಮಾಡಿದರೂ ಕೂಡ ಅದನ್ನು ವಿಡಿಯೋ ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಶೇರ್ ಮಾಡಿ ಕೊಚ್ಚಿಕೊಳ್ಳುತ್ತಾರೆ. ಅಲ್ಲೊಂದು ಇಲ್ಲೊಂದು ಮಾನವೀಯತೆ ಮೆರೆದ ಸಂಗತಿಗಳನ್ನು ಇತ್ತೀಚಿನ ದಿನಗಳಲ್ಲಿ ಕಾಣುತ್ತೇವೆ. ಇಲ್ಲೊಬ್ಬ ಬಾಲಕ ಕಾಗೆಯ ಜೀವ ಉಳಿಸಿ ಮಾನವೀಯತೆ ಮೆರೆದಿದ್ದಾನೆ. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಇದನ್ನೂ ಓದಿ: ಚಾಲಕನಿಲ್ಲದೆ ಶೋ ರೂಮ್ ಒಳಗೆ ನುಗ್ಗಿದ ಟ್ರ್ಯಾಕ್ಟರ್ – ಆಮೇಲೆನಾಯ್ತು ಗೊತ್ತಾ?

ವೈರಲ್ ಆದ ವಿಡಿಯೋದಲ್ಲಿ ಶಾಲಾ ಆವರಣದಲ್ಲಿ ಕಾಗೆಯೊಂದು ಬಲೆಯಲ್ಲಿ ಸಿಲುಕಿಕೊಂಡು ಒದ್ದಾಡುತ್ತಿತ್ತು. ತನ್ನ ಸಹಾಯಕ್ಕೆ ಯಾರೂ ಧಾವಿಸುವುದಿಲ್ಲ. ಇನ್ನೇನು ತನ್ನ ಜೀವವೇ ಹೊರಟು ಹೋಗುತ್ತೆ ಅಂತಾ ಕಾಗೆ ಅಂದುಕೊಂಡಿತ್ತು. ಈ ವೇಳೆ ಬಾಲಕನೊಬ್ಬ ಅಲ್ಲಿಗೆ ಬಂದು ಆ ಕಾಗೆಯನ್ನು ಬಲೆಯಿಂದ ಬಿಡಿಸಿದ್ದಾನೆ. ಅದೇ ಸಮಯಕ್ಕೆ ಅವನ ಗೆಳೆಯರು ಬಂದು ಬಾಲಕನ ಸಹಾಯಕ್ಕೆ ನಿಂತಿದ್ದಾರೆ. ಕಾಗೆಯನ್ನು ಬಲೆಯಿಂದ ಬಿಡಿಸಿದ ಬಳಿಕ ಅದಕ್ಕೆ ನೀರು ಕುಡಿಸಿದ್ದಾರೆ. ಅಲ್ಲದೇ ಮಾನವೀಯತೆ ಮೆರೆದ ಬಾಲಕನಿಗೆ ಆತನ ಸ್ನೇಹಿತರು ಚಪ್ಪಾಳೆ ತಟ್ಟಿದ್ದಾರೆ. ಬಳಿಕ ಆ ಕಾಗೆಯನ್ನು ಹಾರಲು ಬಿಟ್ಟಿದ್ದಾರೆ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ.

ವೈರಲ್ ವಿಡಿಯೋದ ತುಣುಕನ್ನು ಸಬಿತಾ ಚಂದಾ ಎಂಬ ಬಳಕೆದಾರರು ಟ್ವಿಟ್ಟರ್‌ನಲ್ಲಿ ಶೇರ್ ಮಾಡಿದ್ದಾರೆ. “ಕರುಣಾಮಯಿ ಹೃದಯವು ಅಸಂಖ್ಯಾತ ಜೀವವನ್ನು ಸ್ಪರ್ಶಿಸುತ್ತದೆ” ಎಂಬ ಶೀರ್ಷಿಕೆಯೊಂದಿಗೆ ಹಂಚಿಕೊಂಡಿದ್ದಾರೆ.