ಬ್ಯಾಚುಲರ್ಸ್ ಅಡುಗೆ ಮಾಡುವುದ್ದಕ್ಕೆ ಕಷ್ಟ ಪಡ್ತಾ ಇದ್ದೀರಾ? – ಈ ಸಿಂಪಲ್ ಸೌತೆಕಾಯಿ ಮಜ್ಜಿಗೆ ಹುಳಿ ಟ್ರೈ ಮಾಡಿ

ಸಾಕಷ್ಟು ಜನರಿಗೆ ಅಡುಗೆ ಮಾಡುವುದು ದೊಡ್ಡ ಯುದ್ಧ ಮಾಡಿದಂತೆ. ಅದರಲ್ಲೂ ಬ್ಯಾಚುಲರ್ಸ್ ಅಡುಗೆ ಮಾಡುವುದ್ದಕ್ಕೆ ಹರಸಾಹಸ ಪಡಬೇಕಾಗುತ್ತೆ. ಹೀಗೆ ಅಡುಗೆ ಮಾಡುವುದ್ದಕ್ಕೆ ಕಷ್ಟ ಪಡುವವರಿಗೆ ಒಂದು ಸಿಂಪಲ್ ರೆಸಿಪಿ ಇದೆ. ಈ ರೆಸಿಪಿಯನ್ನ ನೀವು ಫಾಟಫಟ್ ಅಂತ ಮಾಡಬಹುದು. ಅದುವೆ ಸೌತೆಕಾಯಿ ಮಜ್ಜಿಗೆ ಹುಳಿ. ಹಾಗಿದ್ರೆ ಸೌತೆಕಾಯಿ ಮಜ್ಜಿಗೆ ಹುಳಿ ಮಾಡುವುದು ಹೇಗೆ ಅನ್ನೋದ್ದನ್ನ ನೋಡೋಣ ಬನ್ನಿ..

ಬೇಕಾಗುವ ಪದಾರ್ಥಗಳು…

ಸೌತೆಕಾಯಿ- 2
ಮೊಸರು – 1 ಬಟ್ಟಲು
ಎಣ್ಣೆ – ಸ್ವಲ್ಪ
ಒಣ ಮೆಣಸಿನಕಾಯಿ- 2
ಜೀರಿಗೆ- ಸ್ವಲ್ಪ
ಕೊತ್ತಂಬರಿ ಸೊಪ್ಪು- ಸ್ವಲ್ಪ
ಉಪ್ಪು-ರುಚಿಗೆ ತಕ್ಕಷ್ಟು
ತೆಂಗಿನಕಾಯಿ ತುರಿ- 1/4 ಕಪ್
ಬೆಳ್ಳುಳ್ಳಿ- ಸ್ವಲ್ಪ
ಹಸಿರು ಮೆಣಸಿನಕಾಯಿ-2
ಸಾಸಿವೆ – ಸ್ವಲ್ಪ
ಈರುಳ್ಳಿ- 1 ಚಿಕ್ಕದ್ದು
ಕರಿಬೇವು-ಸ್ವಲ್ಪ
ಅರಿಶಿನ ಪುಡಿ-ಸ್ವಲ್ಪ

ಮಾಡುವ ವಿಧಾನ…

ಮೊದಲು ಒಂದು ಮಿಕ್ಸಿ ಜಾರ್‌ಗೆ ತೆಂಗಿನಕಾಯಿ, ಬೆಳ್ಳುಳ್ಳಿ, ಕೊತ್ತಂಬರಿ ಸೊಪ್ಪು, ಜೀರಿಗೆ, ಹಸಿ ಮೆಣಸಿಕಾಯಿ, ಒಂದು ಚಿಕ್ಕ ಈರುಳ್ಳಿ, ಸ್ವಲ್ಪ ನೀರು ಹಾಕಿ ನುಣ್ಣಗೆ ರುಬ್ಬಿಕೊಂಡು ಒಂದು ಬೌಲ್‌ಗೆ ಹಾಕಿಟ್ಟುಕೊಳ್ಳಿ.
ಈಗ ಒಂದು ಬೌಲ್‌ಗೆ 2 ಕಪ್ ಮೊಸರು ಹಾಕಿ ಸ್ವಲ್ಪ ನೀರು ಸಹ ಹಾಕಿಕೊಂಡು ಅದನ್ನು ಸ್ವಲ್ಪ ತೆಳುವಾಗುವಂತೆ ಮಿಕ್ಸ್ ಮಾಡುತ್ತಾ ತೆಳು ಮಾಡಿ.
ಈಗ ಸೌತೆಕಾಯಿಯನ್ನು ಚಿಕ್ಕದಾಗಿ ಕತ್ತರಿಸಿಕೊಂಡು ಇಟ್ಟುಕೊಳ್ಳಿ.
ಒಲೆ ಮೇಲೆ ಒಂದು ಬಾಣಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿ ಬಳಿಕ ಸಾಸಿವೆ, ಜೀರಿಗೆ, ಒಣಗಿದ ಮೆಣಸಿನಕಾಯಿ, ಈರುಳ್ಳಿ ಹಾಕಿಕೊಂಡು ಫ್ರೈ ಆಗಲು ಬಿಡಿ. 2 ನಿಮಿಷ ಬಿಟ್ಟ ಬಳಿಕ ಇದಕ್ಕೆ ಕರಿಬೇವು, ಅರಶಿಣ ಪುಡಿ, ಉಪ್ಪು ಸಹ ಹಾಕಿಕೊಂಡು ಫ್ರೈ ಮಾಡಿ.
ಈಗ ಸಣ್ಣದಾಗಿ ಹೆಚ್ಚಿಕೊಂಡಿರುವ ಸೌತೆಕಾಯಿಯನ್ನು ಇದಕ್ಕೆ ಹಾಕಿ 1 ನಿಮಿಷ ಫ್ರೈ ಮಾಡಿಕೊಳ್ಳಿ. ಈಗ ಮೊದಲು ರುಬ್ಬಿಕೊಂಡಿದ್ದ ಮಸಾಲೆಗಳನ್ನು ಇದಕ್ಕೆ ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ಹಾಗೆ ಅರ್ಧ ಕಪ್ ನೀರು ಹಾಕಿ ಮಿಕ್ಸ್ ಮಾಡಿ.
1 ನಿಮಿಷ ಹಾಗೆಯೆ ಬಿಟ್ಟು ಅನಂತರ ಒಲೆ ಆಫ್ ಮಾಡಿಕೊಂಡು ತಣ್ಣಗಾಗಲು ಬಿಡಿ. ಸ್ವಲ್ಪ ತಣ್ಣಗಾದ ಬಳಿಕ ಮತ್ತೆ ಉಳಿದ ಮೊಸರನ್ನು ಇದಕ್ಕೆ ಹಾಕಿಕೊಳ್ಳಿ. ಇದೀಗ ರುಚಿಕರವಾದ ಸೌತೆಕಾಯಿ ಮಜ್ಜಿಗೆ ಹುಳಿ ಸವಿಯಲು ಸಿದ್ಧ.