ಹಳ್ಳಿ ಸೊಗಡು, ಹಸುವಿಗಾಗಿ ಹುಡುಕಾಟ – ವಲವಾರ ಸಿನಿಮಾ ಇಷ್ಟವಾಗೋದು ಯಾಕೆ ಗೊತ್ತಾ?

ಕನ್ನಡದಲ್ಲಿ ಒಂದು ಚೆಂದದ ಕಥೆ ಕಟ್ಟಿ, ಸಿನಿಮಾ ರೂಪಕ್ಕೆ ಇಳಿಸಿ ನೋಡಿದಷ್ಟು ಆಳಕ್ಕೆ ಇಳಿಯುವಂತೆ ಮಾಡದ ಸಿನಿಮಾ ವಲವಾರ. ಸಿಂಪಲ್ ಸ್ಟೋರಿ ಸಿನಿಮಾ ಆಗೋದು ಹೇಗೆ, ಆ ಸಿನಿಮಾ ವೀಕ್ಷಕರಿಗೆ ಯಾಕೆ ಇಷ್ಟವಾಗುತ್ತೆ ಅನ್ನೋದಕ್ಕೆ ಒಂದು ಬೆಸ್ಟ್ ಉದಾಹರಣೆಯೇ ಈ ವಲವಾರ.

ಇದನ್ನೂ ಓದಿ:ರಕ್ಕಸಪುರದೋಳ್ ಗೆದ್ದ ವಿಲನ್ – ರಾಜ್ ಎದುರು ರಕ್ಕಸನಂತೆ ಅನಿರುದ್ಧ್ ಭಟ್ ನಟನೆ

ಕನ್ನಡದಲ್ಲಿ ವಲವಾರ  ಸಿನಿಮಾ ತೆರೆಗೆ ಬಂದಿದೆ. ಸೂತನ್ ಗೌಡ ಎಂಬ ಹೊಸ ನಿರ್ದೇಶಕ ಈ ಸಿನಿಮಾಗೆ ಆಕ್ಷನ್ ಕಟ್ ಹೇಳಿದ್ದಾರೆ. ಸಕಲೇಶಪುರದ ಒಂದು ಹಳ್ಳಿಯಲ್ಲಿ ನಡೆಯೋ ಈ ಸಿನಿಮಾ. ತೀರ ಸಹಜವಾಗಿ ಮೂಡಿಬಂದಿದೆ. ಈ ಸಿನಿಮಾ ನೋಡುತ್ತಿದ್ದಂತೆ ಅನೇಕರಿಗೆ ಅವರ ಬಾಲ್ಯ ನೆನಪಾಗುತ್ತಿದೆ. ಯಾಕೆಂದರೆ, ಈ ಸಿನಿಮಾ ರಿಯಾಲಿಟಿಗೆ ಹತ್ತಿರವಾಗಿದೆ. ಎಲ್ಲೂ ನಾಟಕೀಯತೆ ಕಾಣಿಸೋದೆ ಇಲ್ಲ. ಇನ್ನು ಈ ಸಿನಿಮಾದಲ್ಲಿ ನಟಿಸಿರೋ ಪ್ರತಿಯೊಬ್ಬರು ಸಹ ಪಾತ್ರಗಳೇ ಆಗಿ ಹೋಗಿದ್ದಾರೆ. ಕನ್ನಡದಲ್ಲಿ ಈ ರೀತಿ ಸಿನಿಮಾ ಬರೋದಿಲ್ಲ ಎನ್ನುವವರು ವಲವಾರದಂತಹ ಸಿನಿಮಾವನ್ನ ನೋಡಲೇಬೇಕಿದೆ. ಮನಸ್ಸಿಗೆ ಮುದ ನೀಡುವ ಈ ಸಿನಿಮಾವನ್ನ ಮನೆ ಮಂದಿಯೆಲ್ಲಾ ನೋಡಬಹುದು. ಅದರಲ್ಲೂ ಗ್ರಾಮೀಣ ಪರಿಸರದಲ್ಲಿ ಬೆಳೆದವರಿಗೆ. ಬಡತನದ ಬದುಕನ್ನ ಅನುಭವಿಸಿರೋರಿಗೆ ಈ ಸಿನಿಮಾ ಮನಸಿಗೆ ಹತ್ತಿರವಾಗುತ್ತದೆ. ಕಾಣೆಯಾದ ಹಸುವನ್ನು ಹುಡುಕುವ ಅನ್ವೇಷಣೆಯಲ್ಲಿ ಯುವ ಸಹೋದರರ ಕಥೆ ಈ ಸಿನಿಮಾ ಮೂಲಕ ಮನ ಮುಟ್ಟುವಂತಿದೆ.

ಇನ್ನು ಸಿನಿಮಾ ನೋಡಿದವರು ಕೂಡಾ ತಮ್ಮದೇ ಶೈಲಿಯಲ್ಲಿ ಸಿನಿಮಾ ನೋಡಲು ಕನ್ನಡಿಗರನ್ನು ಪ್ರೋತ್ಸಾಹಿಸುತ್ತಿದ್ದಾರೆ.  ಈ ಸಿನಿಮಾವನ್ನು ಗೆಲ್ಲಿಸಿಕೊಳ್ಳದಿದ್ದ ಮೇಲೆ, ಉತ್ತಮ ಸಿನಿಮಾಗಳು ಬರುತ್ತಿಲ್ಲ ಎಂದು ಆರೋಪಿಸುವ ಹಕ್ಕು ನಮಗಿಲ್ಲ. ಇದು ಸಿನಿಮಾವಲ್ಲ; 70-90 ರ ನಡುವಿನಲ್ಲಿ ಹಳ್ಳಿಯಲ್ಲಿ ಹುಟ್ಟಿದ ಪ್ರತಿ ಬಡವನ ಕತೆ! ಇಲ್ಲಿ ನಿಮ್ಮ ಅಮ್ಮ ನಿಮಗೆ ಹೊಸ ರೂಪದಲ್ಲಿ ಸಿಗುತ್ತಾರೆ. ನೀವಾಕೆಯನ್ನು ಅಪ್ಪಿ ಅಳುವಿರಿ. ನಿಮ್ಮ ಬಾಲ್ಯ ನಿಮಗೆ ಟನ್ ಗಟ್ಟಲೆ ವಾಪಸ್ ಸಿಗುತ್ತದೆ. ನೀವದನ್ನು ಅಪ್ಪಿ ನಗುವಿರಿ. ಆ ಊರು, ಆ ಕೆರೆ, ಆ ಹಸು, ಆ ಹೊಲ, ಆ ಕೋಳಿ, ಅದೊಂದು ಪೊದೆ… ಎಲ್ಲವೂ ನಮ್ಮದೇ! ಒಂದು ಫೀಲ್ ಗುಡ್ ಮೂವಿ.  ಹೀಗೆ ಈ ಸಿನಿಮಾದ ಬಗ್ಗೆ ಒಳ್ಳೇ ವಿಮರ್ಶೆಗಳು ಕೇಳಿ ಬರುತ್ತಿದೆ.

ಇತ್ತೀಚೆಗೆ ತೆರೆಕಂಡ ರಕ್ಕಸಪುರದೋಳ್ ಜೊತೆಗೆ ವಲವಾರ ಸಿನಿಮಾಗಳನ್ನು ಕನ್ನಡಿಗರು ನೋಡಬೇಕು. ನೋಡಿ ಬೇರೆಯವರಿಗೂ ನೋಡುವಂತೆ ಪ್ರೋತ್ಸಾಹಿಸಬೇಕು. ಹೀಗಾದಾಗ ಮಾತ್ರ ರಿಯಲ್ ಪ್ರತಿಭೆಗಳಿಗೆ ಪ್ರೋತ್ಸಾಹ ಸಿಗುತ್ತದೆ. ಜೊತೆಗೆ ಸ್ಯಾಂಡಲ್‌ವುಡ್‌ನಲ್ಲೂ ಇಂತಹ ಸಿನಿಮಾಗಳಿಗೆ ಪ್ರೋತ್ಸಾಹ ಸಿಕ್ಕಿದಂತಾಗುತ್ತದೆ.