ಮೋದಿ ತವರಲ್ಲಿ ಕಾಂಗ್ರೆಸ್ ಕಹಳೆ – ನ.21 ರಿಂದ ಗುಜರಾತ್‌ನಲ್ಲಿ ಜನ್ ಅಕ್ರೋಶ್ ಯಾತ್ರೆ

ಗುಜರಾತ್ ಕಾಂಗ್ರೆಸ್ ಪಕ್ಷವು ರಾಜ್ಯಾದ್ಯಂತ ‘ಜನ್ ಅಕ್ರೋಶ್ ಯಾತ್ರೆ’ಯನ್ನು ನವೆಂಬರ್ 21 ರಿಂದ ಆರಂಭಿಸುತ್ತಿದೆ. ರೈತರು, ವಿದ್ಯಾರ್ಥಿಗಳು, ಯುವಕರು, ಮಹಿಳೆಯರು, ಸಣ್ಣ ವ್ಯಾಪಾರಿಗಳು ಮತ್ತು ಹಿಂದುಳಿದ ಸಮುದಾಯಗಳ ಸಮಸ್ಯೆಗಳನ್ನು ಸರ್ಕಾರದ ಗಮನಕ್ಕೆ ತರುವುದು ಇದರ ಮುಖ್ಯ ಉದ್ದೇಶವಾಗಿದೆ.  ಉತ್ತರ ಗುಜರಾತ್‌ನ ಧೀಮಾ ಗ್ರಾಮದಿಂದ ಆರಂಭವಾಗುವ ಈ ಯಾತ್ರೆಯು ಮೊದಲ ಹಂತದಲ್ಲಿ ಏಳು ಜಿಲ್ಲೆಗಳು, 40 ತಾಲೂಕುಗಳು ಮತ್ತು 12 ನಗರಗಳನ್ನು ಕ್ರಮಿಸಲಿದೆ. ಸುಮಾರು 1,100 ಕಿಲೋಮೀಟರ್ ದೂರವನ್ನು ಕ್ರಮಿಸಿ, ಡಿಸೆಂಬರ್ 3 ರಂದು ಬೆಹರಜಿ ದೇವಾಲಯದಲ್ಲಿ ಮೊದಲ ಹಂತವು ಸಂಪನ್ನಗೊಳ್ಳಲಿದೆ. ಎರಡನೇ ಹಂತದ ವಿವರಗಳು ಇನ್ನೂ ಪ್ರಕಟವಾಗಿಲ್ಲ.

ಇದನ್ನೂ ಓದಿ: ಟೆಸ್ಟ್ ಕ್ರಿಕೆಟ್ ಗೆ ಗಂಭೀರ ಗ್ರಹಣ – ತವರಿನಲ್ಲಿ ಇದೆಂಥಾ ಹೀನಾಯ ಸೋಲು?      

ಕಳೆದ ಮೂರು ದಶಕಗಳಿಂದ ಗುಜರಾತ್‌ನಲ್ಲಿ ಬಿಜೆಪಿ ಆಡಳಿತವು ಜನರನ್ನು ಗುಲಾಮರನ್ನಾಗಿಸಿ, ಶೋಷಿಸುತ್ತಿದೆ ಎಂದು ಗುಜರಾತ್ ಪ್ರದೇಶ ಕಾಂಗ್ರೆಸ್ ಸಮಿತಿ ಅಧ್ಯಕ್ಷ ಅಮಿತ್ ಚಾವ್ಡಾ ಆರೋಪಿಸಿದ್ದಾರೆ. ಗುಜರಾತ್‌ನಲ್ಲಿ ಭಯ, ಹಸಿವು ಮತ್ತು ಭ್ರಷ್ಟಾಚಾರ ಮನೆಮಾಡಿದೆ. ಸರ್ಕಾರದ ಬದಲಿಗೆ ಅಧಿಕಾರಿಗಳ ಆಡಳಿತ ನಡೆಯುತ್ತಿದೆ ಮತ್ತು ಜನರ ಸಂವಿಧಾನಬದ್ಧ ಹಕ್ಕುಗಳನ್ನು ಕಿತ್ತುಕೊಳ್ಳಲಾಗುತ್ತಿದೆ ಎಂದು ಅವರು ಹೇಳಿದ್ದಾರೆ.

ಬಿಜೆಪಿಯ ರೈತ ವಿರೋಧಿ ನೀತಿಯಿಂದಾಗಿ ಗುಜರಾತ್‌ನ ರೈತರು ತಲಾ 56,000 ರೂಪಾಯಿಗಳ ಸಾಲದಲ್ಲಿದ್ದಾರೆ. ಇದರಿಂದಾಗಿ ಅನೇಕ ರೈತರು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆ ಎಂದು ಚಾವ್ಡಾ ಆರೋಪಿಸಿದರು. ಪರಿಹಾರದ ಹೆಸರಿನಲ್ಲಿ ರೈತರಿಗೆ 50,000 ರೂಪಾಯಿಗಳ ನಷ್ಟಕ್ಕೆ ಕೇವಲ 3,500 ರೂಪಾಯಿಗಳನ್ನು ನೀಡಲಾಗುತ್ತಿದೆ. ಶಿಕ್ಷಣದ ವಾಣಿಜ್ಯೀಕರಣದಿಂದಾಗಿ ಬಡ ಕುಟುಂಬಗಳಿಗೆ ಶಿಕ್ಷಣ ಪಡೆಯುವುದು ಕಷ್ಟವಾಗಿದೆ. ಅಲ್ಲದೆ, ರಾಜ್ಯದಲ್ಲಿ ಕಾನೂನು ಮತ್ತು ಸುವ್ಯವಸ್ಥೆ ಹದಗೆಟ್ಟಿದೆ ಎಂದು ಅವರು ತಿಳಿಸಿದರು.