ನೋಡಿರಿ
ದೀಪಾವಳಿ ಹಬ್ಬಕ್ಕೆ ಮನೆಗೆ ಬಣ್ಣ ಹಚ್ಚುತ್ತಿದ್ದೀರಾ? – ವಾಸ್ತು ಪ್ರಕಾರ ಎಲ್ಲೆಲ್ಲಿಗೆ ಯಾವ ಬಣ್ಣ ಹೊಡಿಬೇಕು ಗೊತ್ತಾ?
ದೀಪಾವಳಿ ಹಬ್ಬಕ್ಕೆ ಮನೆಗೆ ಬಣ್ಣ ಬಳಿಯುವ ಮೊದಲು ನೋಡಿ! ವಾಸ್ತು ಪ್ರಕಾರ ಮನೆಯ ಪ್ರತಿ ಕೋಣೆಗೆ ಶುಭ ಬಣ್ಣ ಯಾವುದು? ನೀವು ನಿಮ್ಮ ಮನೆಗೆ ಬಣ್ಣ ಹಚ್ಚಲು ಯೋಜಿಸುತ್ತಿದ್ದರೆ, ವಾಸ್ತು ನಿಯಮಗಳ ಪ್ರಕಾರ ಬಣ್ಣಗಳನ್ನು ಆರಿಸುವುದು ಶುಭಕರ. ಸರಿಯಾದ ದಿಕ್ಕು ಮತ್ತು ವಾತಾವರಣಕ್ಕೆ ಅನುಗುಣವಾಗಿ ಆಯ್ಕೆಮಾಡಿದ ಬಣ್ಣಗಳು ಗೋಡೆಗಳ ಅಂದವನ್ನು ಹೆಚ್ಚಿಸುತ್ತದೆ. ಅಲ್ಲದೆ, ಮನೆಯಲ್ಲಿ ಸಕಾರಾತ್ಮಕ ಶಕ್ತಿಯನ್ನು ತರುತ್ತವೆ.
ಹೌದು, ದೀಪಾವಳಿ ಹಬ್ಬ ಮೀಪಿಸುತ್ತಿದ್ದಂತೆ, ಜನರು ಮನೆ ಸ್ವಚ್ಛಗೊಳಿಸುವುದು, ಬಣ್ಣ ಹಚ್ಚುವುದು ಮತ್ತು ಅಲಂಕಾರ ಮಾಡುವುದರಲ್ಲಿ ನಿರತರಾಗುತ್ತಾರೆ. ಈ ಬಾರಿ ನಿಮ್ಮ ಮನೆಗೆ ಬಣ್ಣ ಬಳಿಯುತ್ತಿದ್ದರೆ, ವಾಸ್ತು ಮತ್ತು ಫೆಂಗ್ ಶೂಯಿ ನಿಯಮಗಳ ಪ್ರಕಾರ ಬಣ್ಣಗಳನ್ನು ಆಯ್ಕೆ ಮಾಡುವುದು ಉತ್ತಮ. ಇದರಿಂದ ಶುಭ ಫಲಿತಾಂಶ ಪಡೆಯಬಹುದು.
ಲಿವಿಂಗ್ ರೂಮ್ಗೆ ಶುಭ ಬಣ್ಣಗಳು
ಮನೆಯಲ್ಲಿ ಲಿವಿಂಗ್ ರೂಮ್ ಅತಿ ಮುಖ್ಯ ಸ್ಥಳ. ಏಕೆಂದರೆ, ಇಲ್ಲಿ ಅತಿಥಿಗಳು ಬಂದು ಹೋಗುತ್ತಾರೆ. ಈ ರೂಮ್ ಅಥವಾ ಕೋಣೆಯ ಗೋಡೆಗಳಿಗೆ ಬಿಳಿ, ಕ್ರೀಮ್, ತಿಳಿ ಕಂದು ಅಥವಾ ಗುಲಾಬಿ ಬಣ್ಣಗಳು ಬಹಳ ಶುಭಕರ ಎಂದು ಪರಿಗಣಿಸಲಾಗಿದೆ. ಇದೇ ಬಣ್ಣಗಳ ಪರದೆಗಳು ಅಥವಾ ಕುಷನ್ ಕವರ್ಗಳನ್ನು ಆಯ್ಕೆ ಮಾಡುವ ಮೂಲಕ ನೀವು ವಾತಾವರಣವನ್ನು ಇನ್ನಷ್ಟು ಸುಂದರಗೊಳಿಸಬಹುದು.
ಕಿಚನ್ಗೆ ಸೂಕ್ತ ಬಣ್ಣಗಳು
ಅಡುಗೆ ಮನೆಯನ್ನು ಕುಟುಂಬದ ಶಕ್ತಿಯ ಕೇಂದ್ರ ಎಂದೇ ಪರಿಗಣಿಸಲಾಗುತ್ತದೆ. ಇಲ್ಲಿ ಬಿಳಿ ಬಣ್ಣಕ್ಕೆ ಆದ್ಯತೆ ನೀಡುವುದು ಉತ್ತಮ. ಈ ಬಣ್ಣ ಬೇಗ ಕೊಳಕಾಗಬಹುದು. ಆದರೆ, ನಿಯಮಿತ ಸ್ವಚ್ಛತೆಯಿಂದ ಅಡುಗೆಮನೆಯಲ್ಲಿ ಶುಚಿತ್ವ ಮತ್ತು ಸಕಾರಾತ್ಮಕತೆಯನ್ನು ಕಾಪಾಡುತ್ತದೆ. ಬಿಳಿ ಬಣ್ಣವನ್ನು ಬಳಸುವುದು ಮನೆಯಲ್ಲಿ ಸಂಪತ್ತು ಮತ್ತು ಆರೋಗ್ಯ ಎರಡನ್ನೂ ಸ್ಥಿರವಾಗಿಡಲು ಸಹಾಯ ಮಾಡುತ್ತದೆ.
ಮಲಗುವ ಕೋಣೆಗೆ ಸರಿಯಾದ ಬಣ್ಣ
ಬೆಡ್ರೂಮ್ ಅಥವಾ ಮಲಗುವ ಕೋಣೆಯು ವಿಶ್ರಾಂತಿ ಮತ್ತು ನೆಮ್ಮದಿ ಪಡೆಯುವ ಸ್ಥಳವಾಗಿದೆ. ಆದ್ದರಿಂದ, ಇಲ್ಲಿ ತಿಳಿ ಮತ್ತು ಸೌಮ್ಯ ಬಣ್ಣಗಳನ್ನು ಆಯ್ಕೆ ಮಾಡುವುದು ಉತ್ತಮ. ಆಕಾಶ ನೀಲಿ, ತಿಳಿ ಹಸಿರು, ಗುಲಾಬಿ ಮತ್ತು ಕ್ರೀಮ್ ಬಣ್ಣಗಳು ರೂಮ್ ಅನ್ನು ಶಾಂತಿಯುತವಾಗಿಸುತ್ತದೆ. ಅಲ್ಲದೆ, ಸಕಾರಾತ್ಮಕ ಶಕ್ತಿಯನ್ನು ಹೆಚ್ಚಿಸುತ್ತವೆ.
ಬಾತ್ರೂಮ್ ಮತ್ತು ಶಾವರ್ರೂಮ್
ಸ್ನಾನಗೃಹಕ್ಕೆ ಬಿಳಿ ಮತ್ತು ಗುಲಾಬಿ ಬಣ್ಣಗಳ ಬಳಕೆ ಸೂಕ್ತ ಎಂದು ಪರಿಗಣಿಸಲಾಗುತ್ತದೆ. ವಿಶೇಷವಾಗಿ, ಗುಲಾಬಿ ಬಣ್ಣವು ಇಲ್ಲಿ ಸಕಾರಾತ್ಮಕತೆಯನ್ನು ಹರಡುತ್ತದೆ. ಜೊತೆಗೆ ಆರೋಗ್ಯ ಸಂಬಂಧಿ ಸಮಸ್ಯೆಗಳನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಈ ಬಣ್ಣಗಳು ಸ್ನಾನಗೃಹದಲ್ಲಿ ಹಗುರ ಮತ್ತು ತಾಜಾತನದ ಭಾವನೆಯನ್ನು ನೀಡುತ್ತವೆ. ಬಣ್ಣ ಹಚ್ಚುವಾಗ ಈ ವಿಷಯಗಳನ್ನು ನೆನಪಿನಲ್ಲಿಡಿ! ಗಾಢ ಅಥವಾ ಕಪ್ಪು ಬಣ್ಣಗಳನ್ನು ಹೆಚ್ಚು ಬಳಸಬೇಡಿ, ಇವು ಬೆಳಕು ಮತ್ತು ಸಕಾರಾತ್ಮಕತೆ ಎರಡನ್ನೂ ಕಡಿಮೆ ಮಾಡಬಹುದು. ಬಣ್ಣ ಬಳಿಯುವ ಮೊದಲು ತೇವಾಂಶ ಅಥವಾ ಸೀಲ್ ಇರುವ ಸ್ಥಳಗಳನ್ನು ದುರಸ್ತಿ ಮಾಡಿಸಿ. ಪರಿಸರ ಸ್ನೇಹಿ ಮತ್ತು ಆರೋಗ್ಯಕ್ಕೆ ಸುರಕ್ಷಿತವಾದ ಬಣ್ಣವನ್ನು ಆರಿಸಿ.
