ನೋಡಿರಿ
ಇಂದಿನ ಶತ್ರುಗಳೇ.. ನಾಳೆಯ ಮಿತ್ರರು – ಭಾರತಕ್ಕೆ ಚೀನಾ ಮಣೆ ಹಾಕ್ತಿರೋದ್ಯಾಕೆ?
ಗಡಿ ವಿವಾದ ಮಧ್ಯೆ ಈ ಸ್ನೇಹವೇಕೆ?
ಇಂದಿನ ಶತ್ರುಗಳೇ ನಾಳೆಯ ಮಿತ್ರರು.. ಇಂದಿನ ಮಿತ್ರರೇ ನಾಳೆಯ ಶತ್ರುಗಳು.. ಇದಕ್ಕೆ ತಾಜಾ ಉದಾಹರಣೆ ನಮ್ಮ ನೆರೆಯ ಚೀನಾ ರಾಷ್ಟ್ರ. ಭಾರತದೊಂದಿಗೆ ತನಗೆ ಜನ್ಮ ಜನ್ಮದ ವೈರತ್ವ ಇದೆ ಎಂಬಂತೆ ವರ್ತಿಸುತ್ತಿದ್ದ ಚೀನಾ ಇದೀಗ ಏಕಾಏಕಿ ಭಾರತವನ್ನು ತನ್ನ ಮಿತ್ರರಾಷ್ಟ್ರಗಳ ಪಟ್ಟಿಗೆ ಸೇರಿಸಿದಂತಿದೆ. ಗಡಿ ವಿಚಾರದಲ್ಲಿ ಚೀನಾದ ವೈರತ್ವವನ್ನು ಭಾರತ ಎದುರಿಸುತ್ತಲೇ ಬಂದಿದೆ. ಆದ್ರೂ ಈಗ ಮತ್ತೆ ಚೀನಾ ಭಾರತ ಒಂದಾಗುತ್ತಿದೆ.
ಭಾರತದೊಂದಿಗಿನ ತನ್ನ ರಾಜತಾಂತ್ರಿಕ ಮತ್ತು ಆರ್ಥಿಕ ಸಂಬಂಧವನ್ನು ಸುಧಾರಿಸುವ ಪ್ರಯತ್ನ ಆರಂಭಿಸಿದೆ ಚೀನಾ. ಇದಕ್ಕೆ ಪುಷ್ಠಿ ಎಂಬಂತೆ “ಜನವರಿ 1ರಿಂದ ಏಪ್ರಿಲ್ 9, 2025ರವರೆಗೆ ಭಾರತೀಯ ಪ್ರವಾಸಿಗರಿಗೆ ಒಟ್ಟು 85,000 ವೀಸಾಗಳನ್ನು ನೀಡಲಾಗಿದೆ. ಕಳೆದ ಬಾರಿಗೆ ಹೋಲಿಸಿದೆ ಈ ಬಾರಿ ಹೆಚ್ಚಿನ ಸಂಖ್ಯೆಯ ವೀಸಾಗಳನ್ನು ವಿತರಿಸಲಾಗಿದೆ.” ಎಂದು ಚೀನಾದ ರಾಯಭಾರ ಕಚೇರಿ ಸ್ಪಷ್ಟಪಡಿಸಿದೆ.
ಈ ಕುರಿತು ತಮ್ಮ ಅಧಿಕೃತ ಎಕ್ಸ್‌ ಅಕೌಂಟ್‌ನಲ್ಲಿ ಟ್ವೀಟ್‌ ಮಾಡಿರುವ ಭಾರತಕ್ಕೆ ಚೀನಾದ ರಾಯಭಾರಿ “ಏಪ್ರಿಲ್ 9, 2025ರವರೆಗೆ ಭಾರತೀಯ ನಾಗರಿಕರಿಗೆ 85,000ಕ್ಕೂ ಹೆಚ್ಚು ವೀಸಾಗಳನ್ನು ನೀಡಲಾಗಿದೆ. ಚೀನಾಕ್ಕೆ ಬರುವ ಭಾರತೀಯರನ್ನು ನಾವು ಸ್ವಾಗತಿಸುತ್ತೇವೆ. ಚೀನಾವು ಮುಕ್ತ, ಸುರಕ್ಷಿತ, ರೋಮಾಂಚಕ, ಪ್ರಾಮಾಣಿಕ ಮತ್ತು ಸ್ನೇಹಮಯಿ ರಾಷ್ಟ್ರವಾಗಿದೆ. ನಾವು ಹೆಚ್ಚೆಚ್ಚು ಭಾರತೀಯರು ಚೀನಾ ಪ್ರವಾಸ ಮಾಡಬೇಕು ಎಂದು ಬಯಸುತ್ತೇವೆ.” ಎಂದು ಹೇಳಿದ್ದಾರೆ.
ಭಾರತೀಯರಿಗಾ ಚೀನಾವು ತನ್ನ ವೀಸಾ ನಿಯಮಗಳಲ್ಲಿ ಈ ಕೆಳಗಿನ ಬದಲಾವಣೆಗಳನ್ನು ಮಾಡಿದೆ. ವಿಸಾಕ್ಕಾಗಿ ಆನ್‌ಲೈನ್‌ನಲ್ಲಿ ಅಪಾಯಿಂಟ್‌ಮೆಂಟ್‌ಗಾಗಿ ಕಾಯುವ ಅಗತ್ಯವಿಲ್ಲ. ನೇರವಾಗಿ ವೀಸಾ ಕೇಂದ್ರಕ್ಕೆ ಹೋಗಿ ಅರ್ಜಿ ಸಲ್ಲಿಸಬಹುದು. ಕಡಿಮೆ ಅವಧಿಗೆ ಚೀನಾಕ್ಕೆ ಭೇಟಿ ನೀಡುವವರಿಗೆ, ಬಯೋಮೆಟ್ರಿಕ್ ಮಾಹಿತಿ ನೀಡುವ ಅಗತ್ಯವಿಲ್ಲ. ವೀಸಾ ಶುಲ್ಕವನ್ನು ಕಡಿಮೆ ಮಾಡಲಾಗಿದ್ದು, ಇದರಿಂದ ಚೀನಾಗೆ ಭೇಟಿ ನೀಡುವ ಭಾರತೀಯರಿಗೆ ಅನುಕೂಲವಾಗಲಿದೆ ವೀಸಾ ಬೇಗನೆ ಸಿಗುವಂತೆ ಮಾಡಲಾಗಿದ್ದು, ವ್ಯಾಪಾರ ಮತ್ತು ಪ್ರವಾಸಕ್ಕೆ ಚೀನಾಕ್ಕೆ ಹೋಗುವವರಿಗೆ ಇದು ಅನುಕೂಲಕರ. ಭಾರತೀಯ ಪ್ರವಾಸಿಗರನ್ನು ಆಕರ್ಷಿಸಲು ಚೀನಾವು ತನ್ನ ಸಾಂಸ್ಕೃತಿಕ ಮತ್ತು ಪ್ರವಾಸಿ ತಾಣಗಳ ಬಗ್ಗೆ ಹೆಚ್ಚು ಪ್ರಚಾರ ಮಾಡುತ್ತಿದೆ.
ಇದೇ ವೇಳೆ ಭಾರತ-ಚೀನಾ ಆರ್ಥಿಕ ಸಂಬಂಧದ ಬಗ್ಗೆ ಮಾತನಾಡಿರುವ ಚೀನಾ ರಾಯಭಾರಿ ಕಚೇರಿಯ ವಕ್ತಾರೆ ಯು ಜಿಂಗ್, “ಚೀನಾ-ಭಾರತ ಆರ್ಥಿಕ ಮತ್ತು ವ್ಯಾಪಾರ ಸಂಬಂಧವು ಪರಸ್ಪರ ಪೂರಕ ಮತ್ತು ಪ್ರಯೋಜನಕಾರಿಯಾಗಿದೆ. ಅಮೆರಿಕದ ಸುಂಕದ ದುರ್ಬಳಕೆಯನ್ನು ಎದುರಿಸಲು, ಎರಡು ದೊಡ್ಡ ಅಭಿವೃದ್ಧಿಶೀಲ ರಾಷ್ಟ್ರಗಳು ಒಟ್ಟಾಗಿ ನಿಲ್ಲಬೇಕು.” ಎಂದು ಮತ್ತೊಮ್ಮೆ ಕರೆ ನೀಡಿದ್ದಾರೆ.
ಭಾರತ ಮತ್ತು ಚೀನಾ ನಡುವೆ ಗಡಿ ವಿವಾದ ಇನ್ನೂ ಬಗೆಹರಿದಿಲ್ಲ. ಈ ವಿಚಾರದಲ್ಲಿ ಉಭಯ ರಾಷ್ಟ್ರಗಳ ನಡುವೆ ಸಾಕಷ್ಟು ಭಿನ್ನಾಭಿಪ್ರಾಯಗಳಿವೆ. ಎಲ್‌ಎಸಿ ಬಳಿ ಮಿಲಿಟರಿ ಸಂಘರ್ಷಗಳು ನಡೆಯುತ್ತಿವೆ. ಆದರೂ, ಚೀನಾವು ಭಾರತದೊಂದಿಗೆ ಸೌಹಾರ್ದಯುತ ಸಂಬಂಧ ಹೊಂದಲು ಬಯಸಿದೆ. ಇದಕ್ಕೆ ಪೂರಕವಾಗಿ ವೀಸಾ ನೀಡಿಕೆ ಹೆಚ್ಚಳವು ಭಾರತ ಮತ್ತು ಚೀನಾ ನಡುವಿನ ಬಾಂಧವ್ಯವನ್ನು ಬಲಪಡಿಸುವ ಪ್ರಯತ್ನವಾಗಿದೆ. ಟ್ರಂಪ್ ಸುಂಕ ಹೆಚ್ಚಳ ಮಾಡುತ್ತಿದ್ದಂತೆ ಚೀನಾ ಭಾರತದ ಕಡೆ ಮುಖ ಮಾಡಿದೆ.
ಚೀನಾದ ಮೇಲೆ ಮತ್ತೆ ಶೇ.245 ರಷ್ಟು ಸುಂಕ ಹಾಕಿದ ಅಮೆರಿಕ
ಅಮೆರಿಕವು ಚೀನಾದ ಉತ್ಪನ್ನಗಳ ಮೇಲೆ 145% ಸುಂಕ ವಿಧಿಸಿದ ನಂತರ ಉಭಯ ರಾಷ್ಟ್ರಗಳ ನಡುವಿನ ಸುಂಕ ಸಮರ ಉತ್ತುಂಗಕ್ಕೇರಿತು. ಇದಕ್ಕೆ ಪ್ರತಿಕ್ರಿಯೆಯಾಗಿ, ಚೀನಾ ಅಮೆರಿಕದ ವಿರುದ್ಧ ಈ ಕಠಿಣ ಕ್ರಮಗಳನ್ನು ತೆಗೆದುಕೊಂಡಿತು. ಇದೀಗ ಅಮೆರಿಕವು ಚೀನಾದ ಸರಕುಗಳ ಮೇಲಿನ ಸುಂಕವನ್ನು ಬರೋಬ್ಬರಿ ಶೇ.245ಕ್ಕೆ ಹೆಚ್ಚಿಸುವ ಮೂಲಕ ಪ್ರತೀಕಾರ ತೀರಿಸಿಕೊಂಡಿದೆ. ಈ ಮೂಲಕ ಸುಂಕ ಸಮರವು ಟ್ರೇಡ್‌ ವಾರ್‌ ರೂಪ ಪಡೆಯುತ್ತಿದೆ. ಎರಡೂ ದೇಶಗಳು ಪರಸ್ಪರ ವಿರುದ್ಧ ಕಠಿಣ ನಿರ್ಧಾರ ತೆಗೆದುಕೊಳ್ಳುತ್ತಿ, ಚೀನಾ ಕೂಡ ಟ್ರೇಡ್‌ ವಾರ್‌ ಎಚ್ಚರಿಕೆ ನೀಡಿದೆ. ಹೀಗಾಗಿ ಅಮೆರಿಕ ಜೊತೆ ಆಗುತ್ತಿರುವ ಈ ಸುಂಕದ ಕಿರಿಕ್‌ಗೆ ಚೀನಾ ಭಾರತಕ್ಕೆ ಹತ್ತಿರವಾಗುತ್ತಿದೆ ಅನ್ನೋದು ಮಾತ್ರ ಸತ್ಯ.
