ನೋಡಿರಿ
ಕ್ಯಾಪ್ಟನ್ ಆಗಿ ಬಂದ ABD – 4 ವರ್ಷಗಳ ಬಳಿಕ ಕೈಗೆ ಬ್ಯಾಟ್
ಮಿಸ್ಟರ್ 360 ಬ್ಯಾಟರ್ ಅಂತಾ ಕರೆಸಿಕೊಳ್ತಿದ್ದ ಎಬಿ ಡಿವಿಲಿಯರ್ಸ್ ಮೈದಾನದಿಂದ ಹಿಂದೆ ಸರಿದು 4 ವರ್ಷಗಳೇ ಕಳೆದಿವೆ. ಡಿವಿಲಿಯರ್ಸ್ 2018ರ ಮೇ ತಿಂಗಳಿನಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದ ನಿವೃತ್ತಿ ಹೊಂದಿದ್ದರೂ, 2021 ರವರೆಗೆ ಐಪಿಎಲ್ನಲ್ಲಿ ಆಡುವುದನ್ನು ಮುಂದುವರೆಸಿದ್ದರು. ಅದಾದ ಬಳಿಕ ಎಲ್ಲಾ ಮಾದರಿಯ ಕ್ರಿಕೆಟ್ನಿಂದ ನಿವೃತ್ತಿ ಘೋಷಿಸಿದ್ರು. ದಕ್ಷಿಣ ಆಫ್ರಿಕಾದ ಅದೇ ಮಾಜಿ ನಾಯಕ ಈಗ ಮೈದಾನಕ್ಕೆ ಇಳಿಯೋಕೆ ರೆಡಿಯಾಗಿದ್ದಾರೆ. ಬಲಗೈ ಬ್ಯಾಟರ್ ಎಬಿಡಿ ಕ್ಯಾಪ್ಟನ್ ಆಗಿ ಅಂಗಳಕ್ಕೆ ಧುಮುಕುತ್ತಿದ್ದಾರೆ.
ಇದನ್ನೂ ಓದಿ : ಆಂಗ್ಲರು ಗೆಲ್ಲೋಕೆ ಚಾನ್ಸೇ ಇಲ್ವಾ – ರಾಜ್ ಕೋಟ್ ನಲ್ಲಿ ರಾಜ ಯಾರು?
ಸೌತ್ ಆಫ್ರಿಕಾ ತಂಡದ ಮಾಜಿ ನಾಯಕ ಎಬಿ ಡಿವಿಲಿಯರ್ಸ್ ಮತ್ತೊಮ್ಮೆ ಬ್ಯಾಟ್ ಹಿಡಿಯಲಿದ್ದಾರೆ. ಹಾಗಂತ ಐಪಿಎಲ್ನಲ್ಲಿ ಅಲ್ಲ. ಮುಂದಿನ ಜುಲೈನಲ್ಲಿ ನಡೆಯುವ ವಿಶ್ವ ಚಾಂಪಿಯನ್‌ಶಿಪ್ ಆಫ್ ಲೆಜೆಂಡ್ಸ್ ನ ಎರಡನೇ ಆವೃತ್ತಿಯಲ್ಲಿ ಗೇಮ್ ಚೇಂಜರ್ಸ್ ಸೌತ್ ಆಫ್ರಿಕಾ ಚಾಂಪಿಯನ್ಸ್ ತಂಡದ ನಾಯಕರಾಗಿ ಆಡಲಿದ್ದಾರೆ. ಇಂಟರ್ ನ್ಯಾಷನಲ್ ಕ್ರಿಕೆಟ್ಗೆ ಗುಡ್ ಬೈ ಹೇಳಿದ್ದ ನಂತ್ರ ಮಹತ್ವದ ಕಮ್‌ಬ್ಯಾಕ್ ಆಗಿದೆ. ಡಿವಿಲಿಯರ್ಸ್ ಅವ್ರೇ ಸ್ವತಃ ಈ ಸುದ್ದಿಯನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. 2021 ರಲ್ಲಿ ಎಲ್ಲಾ ಮಾದರಿಯ ಕ್ರಿಕೆಟ್ನಿಂದ ನಿವೃತ್ತರಾಗಿದ್ದ ಎಬಿಡಿ ವರ್ಲ್ಡ್ ಚಾಂಪಿಯನ್‌ಶಿಪ್ ಆಫ್ ಲೆಜೆಂಡ್ಸ್ ಟೀಂ ಮುನ್ನಡೆಸಲಿದ್ದಾರೆ. ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಈ ಬಗ್ಗೆ ಬರೆದುಕೊಂಡಿರುವ ಡಿವಿಲಿಯರ್ಸ್, ‘ಇದು ಅಧಿಕೃತವಾಗಿದೆ, ಮುಂಬರುವ ವಿಶ್ವ ಚಾಂಪಿಯನ್‌ಶಿಪ್ ಆಫ್ ಲೆಜೆಂಡ್ಸ್ 2025 ರಲ್ಲಿ ನಾನು ದಕ್ಷಿಣ ಆಫ್ರಿಕಾ ತಂಡಕ್ಕಾಗಿ ಆಡುತ್ತೇನೆ. ನಿಮ್ಮ ಕ್ಯಾಲೆಂಡರ್‌ನಲ್ಲಿ ದಿನಾಂಕವನ್ನು ಗುರುತು ಹಾಕಿಕೊಳ್ಳಿ ಈ ಪಂದ್ಯಾವಳಿಯು ಜುಲೈ 18 ರಿಂದ ಆಗಸ್ಟ್ 2 ರವರೆಗೆ ನಡೆಯುತ್ತದೆ. ಇತರ ಐದು ದೇಶಗಳ ಸ್ಟಾರ್ ಆಟಗಾರರೊಂದಿಗೆ ಆಡುವ ಕ್ಷಣಕ್ಕಾಗಿ ಎದುರು ನೋಡುತ್ತಿದ್ದೇನೆ ಎಂದು ಬರೆದುಕೊಂಡಿದ್ದಾರೆ.
ಸೌತ್ ಆಫ್ರಿಕಾ ಕಂಡ ಬೆಸ್ಟ್ ಪ್ಲೇಯರ್ಗಳಲ್ಲಿ ಇವ್ರೂ ಒಬ್ರು. 114 ಟೆಸ್ಟ್ ಪಂದ್ಯಗಳಲ್ಲಿ ಆಫ್ರಿಕಾ ತಂಡವನ್ನು ಪ್ರತಿನಿಧಿಸಿರುವ ಡಿವಿಲಿಯರ್ಸ್ 22 ಶತಕಗಳ ಸಹಾಯದಿಂದ 8765 ರನ್ ಗಳಿಸಿದ್ದಾರೆ. ಹಾಗೆಯೇ ಏಕದಿನದಲ್ಲಿ ಆಡಿದ 218 ಇನ್ನಿಂಗ್ಸ್‌ಗಳಲ್ಲಿ 9577 ರನ್ ಗಳಿಸಿದ್ದಾರೆ. ಇದರಲ್ಲಿ 25 ಶತಕಗಳು ಸೇರಿವೆ. ಟಿ20 ಮಾದರಿಯಲ್ಲೂ 78 ಪಂದ್ಯಗಳನ್ನಾಡಿರುವ ಅವರು 10 ಅರ್ಧಶತಕಗಳ ಸಹಾಯದಿಂದ 1672 ರನ್ ಗಳಿಸಿದ್ದಾರೆ. ಐಪಿಎಲ್‌ನಲ್ಲೂ ಅಬ್ಬರಿಸಿರುವ ಎಬಿಡಿ ಆಡಿರುವ 184 ಪಂದ್ಯಗಳಲ್ಲಿ 5162 ರನ್ ಗಳಿಸಿದ್ದು, ಇದರಲ್ಲಿ 3 ಶತಕಗಳು ಸೇರಿವೆ. ಸದ್ಯ ಎಬಿಡಿ ಕಮ್ ಬ್ಯಾಕ್ ಬಗ್ಗೆ ದಕ್ಷಿಣ ಆಫ್ರಿಕಾ ಚಾಂಪಿಯನ್ಸ್‌ನ ಸಹ-ಮಾಲೀಕ ಮತ್ತು ಗೇಮ್ ಚೇಂಜರ್ಸ್‌ನ ಸಂಸ್ಥಾಪಕ ಅಮನ್‌ದೀಪ್ ಸಿಂಗ್, ಡಿವಿಲಿಯರ್ಸ್ ತಂಡವನ್ನು ಸೇರುವ ಬಗ್ಗೆ ಹರ್ಷ ವ್ಯಕ್ತಪಡಿಸಿದ್ದಾರೆ. ವಿಶ್ವದ ಲೆಜೆಂಡ್ಸ್ ಚಾಂಪಿಯನ್‌ಶಿಪ್‌ನಲ್ಲಿ ಸ್ಪರ್ಧಿಸಲು ಮತ್ತು ನಮ್ಮ ಕ್ರಿಕೆಟ್ ದಿಗ್ಗಜರ ಅದ್ಭುತ ಪ್ರತಿಭೆಯನ್ನು ಪ್ರದರ್ಶಿಸಲು ನಮಗೆ ಗೌರವವಿದೆ. ನಮ್ಮ ನಾಯಕನಾಗಿ ಎಬಿ ಡಿವಿಲಿಯರ್ಸ್ ಹಿಂತಿರುಗುವುದು ನಮ್ಮ ತಂಡಕ್ಕೆ ಹೊಸ ಉತ್ಸಾಹ ಬಂದಿದೆ ಮತ್ತು ಅವರ ನಾಯಕತ್ವವು ನಿಸ್ಸಂದೇಹವಾಗಿ ನಮ್ಮನ್ನು ಹೊಸ ಎತ್ತರಕ್ಕೆ ಪ್ರೇರೇಪಿಸುತ್ತದೆ ಎಂದಿದ್ದಾರೆ.
