ನೋಡಿರಿ
ಸೆಲೆಬ್ರಿಟಿಗಳ ನಿದ್ದೆಗೆಡಿಸಿದ ಡೀಪ್‌ಫೇಕ್ ಫೋಟೋ! – ಶುಭ್ಮನ್ ಗಿಲ್ – ಸಾರಾ ಫೋಟೋ ವೈರಲ್!
ತಂತ್ರಜ್ಞಾನ ಏನು ಸೃಷ್ಟಿ ಮಾಡ್ತಿದೆ, ಮಾಡ್ತಿಲ್ಲ ಅಂತಾ ಊಹಿಸೋದು ಕಷ್ಟವಾಗಿಬಿಟ್ಟಿದೆ. ತಂತ್ರಜ್ಞಾನ ಪ್ರತಿ ಜಗತ್ತಿಗೂ ಬೇಕು ಆದರೆ ಅದು ಒಳ್ಳೆ ರೀತಿಯಲ್ಲಿ ಬೇಕು. ನಾಣ್ಯದ ಎರಡು ಮುಖಗಳಂತೇ ಒಳ್ಳೆಯದರ ಕಲ್ಪನೆಯ ಹಿಂದೆಯೂ ದುರದ್ದೇಶಿತ ಕೆಲಸಗಳು ಎಗ್ಗಿಲ್ಲದೆ ನಡೆಯುತ್ತಿವೆ. ನಟಿ ರಶ್ಮಿಕಾ ಮಂದಣ್ಣನ ಮೇಲೆ ಡೀಪ್‌ಫೇಕ್ ಆದಾಗಿಂದಲೂ ಈ ಟೆಕ್ನಾಲಜಿಯ ಬಗ್ಗೆ ದೇಶದೆಲ್ಲೆಡೆ ಭಾರಿ ಚರ್ಚೆಯಾಗುತ್ತಿದೆ. ಈ ಬೆನ್ನಲ್ಲೇ ಸಾರಾ ತೆಂಡೂಲ್ಕರ್ ಹಾಗೂ ಶುಭ್ಮನ್ ಗಿಲ್ ಫೋಟೋ ಕೂಡ ಭಾರಿ ವೈರಲ್ ಆಗಿದೆ. ಇದರಿಂದಾಗಿ ಸೆಲೆಬ್ರಿಟಿಗಳಿಗೆ ಹೊಸ ತಲೆನೋವು ಶುರುವಾಗಿದೆ. ಮಾರ್ಫಿಂಗ್‌ ಮಾಡಲಾದ ಇಮೇಜ್‌ನಿಂದಾಗಿ ಸೆಲೆಬ್ರಿಟಿಗಳ ಖ್ಯಾತಿಗೆ ಭಾರಿ ಧಕ್ಕೆಯಾಗುತ್ತಿದೆ.
ಏಕದಿನ ಕ್ರಿಕೆಟ್‌ನಲ್ಲಿ ನಂಬರ್‌ ವನ್‌ ಶ್ರೇಯಾಂಕದ ಶುಭ್ಮನ್ ಗಿಲ್ ಮತ್ತು ಸಚಿನ್‌ ತೆಂಡೂಲ್ಕರ್ ಪುತ್ರಿ ಸಾರಾ ತೆಂಡೂಲ್ಕರ್ ರಹಸ್ಯವಾಗಿ ಡೇಟಿಂಗ್ ನಡೆಸುತ್ತಿರುವ ಕುರಿತಾಗಿ ವರ್ಷಗಳಿಂದ ಸುದ್ದಿ ಹರಿದಾಡುತ್ತಿದೆ. ಈ ವದಂತಿಗಳಿಗೆ ಪುಷ್ಠಿ ನೀಡುವ ಉದ್ದೇಶದಿಂದ ಕಿಡಿಗೇಡಿಗಳು ಡೀಪ್‌ಫೇಕ್ ಫೋಟೋವನ್ನು ಸೃಷ್ಟಿ ಮಾಡಿ ವೈರಲ್ ಮಾಡಿದ್ದಾರೆ. ವೈರಲ್ ಆದ ಫೋಟೋದಲ್ಲಿ ಶುಭ್ಮನ್ ಗಿಲ್ ಅವರ ಹೆಗಲಿಗೆ ಸಾರಾ ಕೈ ಹಾಕಿ ನಿಂತಿರುವಂತೆ ಕಾಣಿಸುತ್ತಿದೆ.
ಇದನ್ನೂ ಓದಿ: ರಶ್ಮಿಕಾ ಮಂದಣ್ಣ ಆಯ್ತು ಈಗ ಕತ್ರಿನಾ ಕೈಫ್ ಸರದಿ – ಡೀಪ್‌ಫೇಕ್ ಟೆಕ್ನಾಲಜಿ ಮೂಲಕ ಕೈಪ್ ಅಶ್ಲೀಲವಾಗಿ ಫೋಟೋ ವೈರಲ್
‘ಸಾರಾ ತೆಂಡೂಲ್ಕರ್ ಅವರು ಶುಭ್ಮನ್ ಗಿಲ್ ಅವರೊಂದಿಗೆ ಡೇಟಿಂಗ್ ಮಾಡುತ್ತಿರುವುದನ್ನು ಖಚಿತಪಡಿಸಿದ್ದಾರೆ’ ಎಂಬ ಶೀರ್ಷಿಕೆಯಡಿ ಫೋಟೋ ವೈರಲ್ ಆಗ್ತಿದೆ. ಈ ಫೋಟೋ ವೈರಲ್ ಆಗುತ್ತಿದ್ದಂತೆ ಆರಂಭದಲ್ಲಿ ಅಭಿಮಾನಿಗಳು ಖುಷಿಯಾಗಿದ್ದರು. ಆದರೆ ಈ ಫೋಟೋ ಅಸಲಿಯಲ್ಲ ಮಾರ್ಫ್ಡ್‌ ಎಂಬುದು ಬಯಲಾಗಿದೆ. ಇದೀಗ ಈ ಡೀಪ್‌ಫೇಕ್ ಟೆಕ್ನೋಲಜಿ ವಿರುದ್ಧ ಆಕ್ರೋಶ ವ್ಯಕ್ತವಾಗಿದೆ.
ಮೂಲ ಚಿತ್ರವನ್ನು ಸಾರಾ ಅವರು ತಮ್ಮ ಸಹೋದರ ಅರ್ಜುನ್ ತೆಂಡೂಲ್ಕರ್ ಅವರ 24ನೇ ಹುಟ್ಟುಹಬ್ಬದಂದು ಸೆಪ್ಟೆಂಬರ್ 24, 2023ರಂದು ಒಂದೆರಡು ಫೋಟೋಗಳೊಂದಿಗೆ ಹಂಚಿಕೊಂಡಿದ್ದಾರೆ. ಹೀಗಾಗಿ, ಮೂಲ ಚಿತ್ರದಲ್ಲಿ ಅರ್ಜುನ್ ಕುರ್ಚಿಯ ಮೇಲೆ ಕುಳಿತಿದ್ದು, ಕೈಯಲ್ಲಿ ಐಸ್ ಕ್ರೀಮ್ ಕೋನ್ ಹಿಡಿದುಕೊಂಡು ಹಸಿರು ಪ್ಯಾಂಟ್‌ನೊಂದಿಗೆ ಕಪ್ಪು ಟೀ ಶರ್ಟ್‌ನಲ್ಲಿ ಡ್ಯಾಪರ್ ಆಗಿ ಕಾಣುತ್ತಿದ್ದಾರೆ.
ಅದೇ ಚಿತ್ರದಲ್ಲಿ, ಕಪ್ಪು ಪ್ಯಾಂಟ್‌ನೊಂದಿಗೆ ಜೋಡಿಯಾಗಿರುವ ಕಂದು ಬಣ್ಣದ ಟಾಪ್‌ನಲ್ಲಿ ಮುದ್ದಾಗಿ ಕಾಣುತ್ತಿದ್ದ ಸಾರಾ, ತನ್ನ ಸಹೋದರನನ್ನು ತಬ್ಬಿಕೊಳ್ಳುತ್ತಿರುವುದು ಕಂಡುಬಂದಿದೆ. ಇದೇ ಚಿತ್ರವನ್ನು ಎಡಿಟ್ ಮಾಡಲಾಗಿದ್ದು, ಎಲ್ಲೆಡೆ ವೈರಲ್ ಆಗ್ತಿದೆ.
