ನೋಡಿರಿ
ಮತ್ತೊಂದು ಮಾರಣಾಂತಿಕ ಕಾಯಿಲೆ ಪತ್ತೆ – ಐವರನ್ನು ಬಲಿ ಪಡೆದ ಸ್ಕ್ರಬ್ ಟೈಫಸ್!
ವೈರಲ್‌ ಫಿವರ್‌, ಡೆಂಘೀ, ಮಲೇರಿಯಾ ನಡುವೆಯೇ ಮತ್ತೊಂದು ಮಾರಣಾಂತಿಕ ಕಾಯಿಲೆ ಲಗ್ಗೆ ಇಟ್ಟಿದೆ. ಈ ಮಾರಣಾಂತಿಕ ಕಾಯಿಲೆಗೆ ಶಿಮ್ಲಾದಲ್ಲಿ ಐವರು ಬಲಿಯಾಗಿದ್ದಾರೆ. ವರದಿಗಳ ಪ್ರಕಾರ ಈ ಮಾರಣಾಂತಿಕ ಕಾಯಿಲೆ ಸ್ಕ್ರಬ್ ಟೈಫಸ್ ಎಂಬ ಬ್ಯಾಕ್ಟೀರಿಯಾದಿಂದ ಹರಡುತ್ತಿದೆ ಎನ್ನಲಾಗಿದೆ.
ಸ್ಕ್ರಬ್ ಟೈಫಸ್ ಹೇಗೆ ಸಂಭವಿಸುತ್ತದೆ?
ಹಿಮಾಚಲ ಪ್ರದೇಶದಲ್ಲಿ ಸುಮಾರು 700ಕ್ಕೂ ಹೆಚ್ಚು ಜನರಲ್ಲಿ ಈ ಸೋಂಕು ಕಾಣಿಸಿಕೊಂಡಿದೆ. ಓರಿಯೆಂಟಿಯಾ ಸುತ್ಸುಗಮುಶಿ ಎಂಬ ಬ್ಯಾಕ್ಟೀರಿಯಾದಿಂದ ಈ ರೋಗ ಹರಡುತ್ತದೆ. ಕೆಲವು ರೀತಿಯ ಕೀಟಗಳ ಕಡಿತದಿಂದ ಮನುಷ್ಯರು ಈ ಬ್ಯಾಕ್ಟೀರಿಯಾದಿಂದ ಸೋಂಕಿಗೆ ಒಳಗಾಗುತ್ತಾರೆ. ಇವುಗಳಲ್ಲಿ ಚಿಗ್ಗರ್‌ಗಳು ಮತ್ತು ಲಾರ್ವಾ ಹುಳಗಳು ಸೇರಿವೆ. ಇವು ಅತ್ಯಂತ ಚಿಕ್ಕ ಕೀಟಗಳಾಗಿವೆ. ಈ ಕೀಟಗಳು ಅಷ್ಟೊಂದು ಸುಲಭವಾಗಿ ಕಣ್ಣಿಗೆ ಗೋಚರಿಸುವುದಿಲ್ಲ. ಹುಲ್ಲುಗಳು, ಪೊದೆಗಳಲ್ಲಿ ಇರುತ್ತವೆ. ಈ ಕೀಟಗಳು ಮಾನವನ ದೇಹ ಪ್ರವೇಶಿಸಿ ಕಣಕಾಲು, ಕೆಳಗಿನ ಕಾಲು, ಮೊಣಕಾಲು ಮತ್ತು ತೊಡೆಸಂದು ಪ್ರದೇಶಗಳನ್ನು ಕಚ್ಚುತ್ತವೆ. ಇದರಿಂದಾಗಿ ಈ ಸೋಂಕು ಉಲ್ಬಣಿಸುತ್ತದೆ.
ಇದನ್ನೂ ಓದು: ಕ್ಯಾನ್ಸರ್ ಗೆದ್ದ ನಟಿಗೆ ಮತ್ತೊಂದು ಕಾಯಿಲೆ – ಚರ್ಮದ ಬಣ್ಣ ಬದಲಾಗುತ್ತಿರೋದೇಕೆ?
ಅಧ್ಯಯನದ ಪ್ರಕಾರ, ಈ ರೋಗದ ಲಕ್ಷಣಗಳೆಂದರೆ ಮೂತ್ರಪಿಂಡ ವೈಫಲ್ಯ, ಅಂಗವೈಕಲ್ಯವನ್ನು ಒಳಗೊಂಡಿರುತ್ತದೆ. ಈ ರೋಗದ ಲಕ್ಷಣಗಳನ್ನು ನಿರ್ಲಕ್ಷಿಸುವುದರಿಂದ ಅಥವಾ ಚಿಕಿತ್ಸೆ ತೆಗದುಕೊಳ್ಳುವುದು ತಡವಾಗುವುದರಿಂದ ಸಾವಿಗೆ ಕಾರಣವಾಗಬಹುದು.
ಸ್ಕ್ರಬ್ ಟೈಫಸ್ ಸೋಂಕಿನ ಲಕ್ಷಣಗಳೇನು?
ಜ್ವರ, ನಡುಗುವುದು, ತಲೆನೋವು, ಸ್ನಾಯು ನೋವು, ಕೀಟ ಕಚ್ಚಿದ ಚರ್ಮದ ಬಣ್ಣದಲ್ಲಿ ಬದಲಾವಣೆ, ಗೊಂದಲ, ದದ್ದುಗಳು ಕೆಲವು ಪ್ರಕರಣಗಳಲ್ಲಿ, ವ್ಯಕ್ತಿಯು ಅಂಗಗಳು ವೈಫಲ್ಯಗೊಳ್ಳುವುದು ಸ್ಕ್ರಬ್ ಟೈಫಸ್ ಸೋಂಕಿನ ಲಕ್ಷಣಗಳಾಗಿವೆ.
ಸೋಂಕು ತಡೆಗಟ್ಟಲು ಸಾಧ್ಯವೇ?
ಸ್ಕ್ರಬ್ ಟೈಫಸ್‌ಗೆ ಇನ್ನೂ ಯಾವುದೇ ಲಸಿಕೆ ಇಲ್ಲ. ಆದ್ದರಿಂದ ಇದನ್ನು ತಡೆಗಟ್ಟಲು ಮುನ್ನೆಚ್ಚರಿಕೆಗಳನ್ನು ಅನುಸರಿಸಲು ಸಲಹೆ ನೀಡಲಾಗುತ್ತದೆ. ಹುಳಗಳ ಕಡಿತವನ್ನು ತಪ್ಪಿಸಲು, ನೀವು ಪೂರ್ಣ ತೋಳಿನ ಬಟ್ಟೆಗಳನ್ನು ಮತ್ತು ಪ್ಯಾಂಟ್ ಧರಿಸಬೇಕು ಮತ್ತು ಹುಲ್ಲು ಅಥವಾ ಹಸಿರು ತುಂಬಿರುವ ಸ್ಥಳಗಳಿಗೆ ಹೋಗಬೇಡಿ. ಅಲ್ಲದೆ, ಈ ರೋಗದ ಚಿಹ್ನೆಗಳ ಬಗ್ಗೆ ತಿಳಿದುಕೊಳ್ಳುವುದರಿಂದ ನೀವು ಸಮಯಕ್ಕೆ ಸರಿಯಾಗಿ ಚಿಕಿತ್ಸೆ ಪಡೆಯಬಹುದು.
ಗಂಭೀರ ಪರಿಸ್ಥಿತಿ ಎದುರಾಗಬಹುದೇ?
ಈ ರೋಗವು ಶಿಮ್ಲಾದಲ್ಲಿ ಇದುವರೆಗೆ ಐದು ಜೀವಗಳನ್ನು ಬಲಿ ತೆಗೆದುಕೊಂಡಿದೆ. ಇದನ್ನು ಲಘುವಾಗಿ ತೆಗೆದುಕೊಳ್ಳುವುದರಿಂದ ಮಾರಣಾಂತಿಕವಾಗಿ ಪರಿಣಮಿಸುತ್ತದೆ. ಇದು ಗಂಭೀರ ಹಂತವನ್ನು ತಲುಪಿದರೆ, ಅಂಗಾಂಗ ವೈಫಲ್ಯಕ್ಕೆ ಕಾರಣವಾಗಬಹುದು ಎಂದು ಸಂಶೋಧನೆ ಸೂಚಿಸುತ್ತದೆ. ಸಾಮಾನ್ಯವಾಗಿ ಸ್ಕ್ರಬ್ ಟೈಫಸ್ ಕಂಡುಬರುವವರಲ್ಲಿ ಹೆಪಟೈಟಿಸ್, ತೀವ್ರ ಮೂತ್ರಪಿಂಡದ ಹಾನಿ, ಮೆನಿಂಜೈಟಿಸ್, ಥ್ರಂಬೋಸೈಟೋಪೆನಿಯಾ, ತೀವ್ರವಾದ ಉಸಿರಾಟದ ತೊಂದರೆ ಸಿಂಡ್ರೋಮ್, ಮಯೋಕಾರ್ಡಿಟಿಸ್ ಕಾಣಿಸಿಕೊಳ್ಳುತ್ತದೆ.
